مەسرور و نوسینگەکەی لەوەڵام بە سکانداڵی فەسادی.. تاهیر عیسا

مەسرور و نوسینگەکەی لەوەڵام بە سکانداڵی فەسادی وگەندەڵیەکەی سکانداڵێکی دیکەی خستە پاڵ سکانداڵیەکانی دیکەی!

تۆزقاڵێک ڕانەچڵەکام کاتێک وەڵامە کرچ وکاڵ و ئاست نزمەکەی مەسروربارزانی ونووسینگەکەییم، خوێندەوە، لەپەیوەست بەو ڤێللاو دەرمانخانە هەژدەملیۆن دۆلاریەی، لە میامی ئەمریکادا، کڕیویەتی کە لەلایەن ڕۆژنامەوانێکی ئەمریکی بەناوی Zack kopplin کە لە ڕۆژنامەیەکی ئەمریکی لەژێر ناوی the american prospect وە، وەک سکانداڵێکی گەورەی ئەم سەرۆک وەزیرانە، بڵاوکرایەوە!
ئەوان وەک پیشەی هەمیشەییان لەوەڵام بەهەر چالاکێکی سیاسیی یان مەدەنی، لەکوردستاندا، کە هەڵس وکەوت و کردەوەی سیاسیی و ئابووریی ڕۆژانەی ئەوانی خستبێتە ژێر سانسۆرو چاودێرییەوە یان هەر ڕاپۆرت وگوزارشتێکیان لەبارەی دزی وفزی و فەزاحەتەکانیان، لەڕۆژنامەکاندا یان بەهەر شێوازێک لەشێوازەکانی ڕاگەیاندن ڕووبەکۆمەڵگادا بڵاو کردبێتەوە، یان تیرۆریان کردوون یان تۆمەتی ناڕەوایان بۆ هەڵبەستوون و داویانن بەداگا نادادپەروەریەکانیان و مەحکوم بەچەندین ساڵ زیندانیان کردوون!
کەم نین ئەوانەی لەم مەیدانەدا لە لایەن ئەم سەرۆکە و بنەماڵە و حیزبەکەیەوە تیرۆر کراون!
ئەمە نەیەکەم ڕاپۆرتێکە کەلەبارەی فەسادیەکانی ئەم بنەماڵە دەستڕۆیشتوانەی کوردستان وحکومەتەکەیان بڵاو کرابێتەوە، نەدوا ڕاپۆرتیش دەبێت.
پێشتر ویکیلیکس خاوەندارێتی مەسرور بارزانی بەبەڵگە بۆ گروپی کۆمپانیاکانی ستێرگروپ کە نزیکەی بیست کۆمپانیا لەناو ئەم ستێر گرووپەدا وەک ئیمپراتۆریەتی بنەماڵەی بارزانی، لەناو حکومەتێکی داتەپیوو داڕزیوی کوردستاندا کەتەواوی جومگەکانی ژیانی کۆمەڵگای تێدا کۆنتڕۆڵ کراوە بڵاو کردەوە، کەچی سۆران عومەرێک کە خودی ئەم بەڵگەنامانەی بەزمانێکی ڕۆژنامەوانی بڵاو دەکردەوە ئەمیان دەدا بەدادگاو پارێزبەندی پەڕلەمانییان لەسەر هەڵدەگرت، بۆ ئەوەی ئاسانتر وەک نموونەی ئەردۆغانی دۆستیان کە لەتورکیادا پەیڕەوی لێدەکرد لەدژی نەیارەکانی، ئەمانیش نەیارە سیاسیەکانیان بێدەنگ بکەن!
هەر ئێستا لەلایەن خودی ئەو کۆمپانیایەی خۆیان بۆ چاودێری لە فرۆشی نەوت ونرخ وداهاتەکەی گرێبەستیان لەگەڵدا کرد، کە ناوی دیلۆیدە، دەستبەسەرداگرتنی بڕی زیاتر لەنیو ملیار دۆلاری حکومەتی
هەرێمی لە بانقێکی لوبناندا، بڵاو کردەوە، کە دیارە بەنیازی سپیکردنەوەی ئەم بڕە پارەیە بوون، کەدواتریش مەعلووم نییە چارەنووسی چیدەبێت؟ کە ساڵێک لەمەوبەریش نزیکەی بڕی ملیارو نیوێکی دیکە هەر لەلوبناندا دەستی بەسەرداگیراو دواتریش چارەنووسەکەی کەس نەیزانی بەکوێ گەیشت!؟

مەسرورو نووسینگەکەی،ئێستاش، لەوەڵام بە ڕاپۆرتی زاک کۆپلین، و لەبەشێکیدا ئاوا دەنووسن:–
[…نووسەری ڕاپۆرتەکە بۆ هەڵبەستنی درۆیەکانی پشتی بە کۆنتراکتێک بەستووە، کە گوایە واژوی سەرۆکی حکومەتی هەرێمی کوردستانە، بەڵام ئەم واژویە هیچ پەیوەندییەکی بە سەرۆکی حکومەتەوە نیە.
ئاشکرای دەکات، دوای بەدواداچوونمان، دەرکەوت نووسەری ڕاپۆرتەکە، پەیوەندی لە گەڵ خێزانی پەرلەمانتارێکی کوردی پێشووی عێراقەوە هەیە کە هاووڵاتی ئەمەریکییە و بە هەڵوێستەکانی دژ بە خەڵکی کوردستان ناسراوە و بە هۆی کردەوە و هەڵوێستی خۆفرۆشانەی، لە لایەن خەڵکی نیشتمانپەروەری کوردستانەوە، سزا درا و لە دوا هەڵبژاردنی ئەنجومەنی نوێنەرانی عێراق، دەنگی پێ نەدرا و ڕیسوا کرا(ئەم سەرۆک وەزیرانە، مەبەستی لە سەرکەوت شەمسەدین، پەڕلەمانتاری پێشووی عێڕاق و هاوسەرەکەی شنیار ئەنوەر ە)
نوسینگەی سەرۆکی حکومەتی هەرێم ئاماژەی بەوەشکردوە، دووپاتی دەکەینەوە کە ئەم بابەتە، هەڵبەستراوە و بەشێکە لەو هەڵمەتە چەواشەکارییەی، کە دژی چاکسازییەکانی کابینەی نۆیەمی حکومەتی هەرێمی کوردستان و جەنابی سەرۆکی حکومەت دەکرێت.]

مەسرور بارزانی و نوسینگەکەی، بۆ خۆدزینەوە لە ئەسڵی بابەتەکە و پەردەپۆشکردنی سکانداڵیەکەی، پەلاماری کەسایەتی کەسانی تردەدات و تیرۆری ئەخلاقیان دەکات، کە وەک خۆیان واتە نووسەری ڕاپۆرتەکەو دەزگاکەیان، دەڵێن لەژیانیاندا نەیان بینیوە!
بەم هەنگاوەشیان بۆ جارێکی تر بەدنیایان پیشاندا کە ئەوان لە مافیایەکی تاسەر ئێسقان، بێمۆڕاڵی بەد ڕەوشت زیاتر، هیچیتر نین!
ئەوان ئەگەر پاشەڵیان پاک و تەمیزبووایا، دەیانتوانی، بەجۆرێکی دیکەو بەلێدوانێکی شیاوو گونجاوی پڕ لەمۆڕاڵیانەی دیکە، کە لەئاستی جێگاو ڕێگاکەیاندا بووایا، وەڵام بدەنەوە نەک پەنا ببەنە بەر تەشهیرو ناوزڕاندنی کەسانی دیکەی دەرەوەی ئەم بابەتەو نوسەرو ڕۆژنامەکەی.
من نازانم، چ پەیوەندیەک لەنێوان ئەم فەزیحەیەو هەڵبژاردنەوەو هەڵنەبژاردنەوەی پەڕلەمانتارێک و هاوسەرەکەیدا هەیە؟
ئێستا کەهەڵنەبژێردراوەتەوە، ئەی ئەگەر بۆ جارێکی دیکە هەڵبژێردرابایەوە چی لەم بابەتە دەگۆڕی یان چی لەهەڵوێستی مەسرورو نوسینگەکەی دەگۆڕی؟
ئایا لە ئاستیدا ئەوکاتە دانیان دەنا بەم فەزیحەیەو دەستیان لەحکومەت دەکێشایەوە؟
بێشک نەخێر، بەڵام دەلاقەی عەیب وعارەکانیان هێندە زۆرن، کە هەتا یەکێکیان بەدرۆو پینەو پەڕۆو لێدوانی ئاستنزمانە دەگرن، چەندین زەندۆڵی تریان تێدەبێت کە بەهیچ پینەو پەڕۆو درۆو لێدوانێک ناتوانن دایپۆشن،
ئەوان دەیانتوانی لایکەم، ئەگەر پەرێزپاک و پاشەڵپاکبوونایا، داوا لە پەڕلەمانە کارتۆنیەکەیان بکردبایا، کە لیژنەیەک هەڵبژیرن و بەدواداچوون بۆ ئەم بابەتە بکرێت !
یان لیژنەکەی سەرپشک دەکردو کۆمپیاڵەو سەنەدی قەبەڵکردنی بۆ ئیمزادەکردن!
یان دەیتوانی لە ڕێگای سکاڵاکردن، بەبەڵگەی ئەوەی کە هەم ناوی وەک سەرۆک وەزیرانێکی بێ تاوان وتۆمەت بۆهەڵبەستراو، زڕێندراوە، بەتایبەت لەوڵاتێکی دامەزراوەیی وەک ئەمریکا ڕێکارێکی شیاوو گونجاوو لەبار دەبوو، بۆ ئەستۆپاککردنی خۆی وحکومەت وبنەماڵەکەی، نەک پێچەوانەی ئەم ڕێکارانە، پەنا بباتە بەر ناوزڕاندنی کەسانی دیکەو لەناویشیاندا ژنێک تۆمەتبار بکات بەوەی کە پەیوەندی سۆزداری لەگەڵ نووسەری ڕاپۆرتەکەدا هەیە، بۆ بەلاڕێدابردنی کەیسەکە، کە ئەمەش لە نموونەی ئەوپەڕی بێڕەوشتی و بێمۆڕاڵی هاوشێوەی کەسانێکی زۆر لۆمپنی بازاڕیمان، پیشان دەدات، نەک کەسانێک لەلوتکەی دەسەڵات وفەرمانڕەواییدا.
ئەرێ بەڕاست لەناو ئەم هەموو فەزاحەتانەتاندا، دەتوانن پێمان بێژن چلەزەتێک لەم ژیانە پڕ لەڕیسواییەتان دەبینن؟؟

تاهیر عیسا

/١١.١٢.٢٠٢١

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.