Skip to Content

ئیدی خەون نابینم.. شیعری: ستیڤان شەمزینی

ئیدی خەون نابینم.. شیعری: ستیڤان شەمزینی

Closed
by March 5, 2022 General, Poems

تۆ هێشتا نازانیت
شەقامەکانی هەستم چۆڵە و
دڵم رووبارێکی نیگەرانە
درەختی تەمەنم
هەر تەنیا یەک گەڵای پێوە ماوە
ئەویش بە یەک شێتە “با”ی
عەشقێک دەوەرێت
وێرانم، وەک ئەو شارانەی
دەبنە خۆڵەمێشی جەنگ و
غەریبم وەک ئەو رێبوارەی
لە چۆڵەوانیدا رێ دەکات
دەگریم، هەر دەگریم
چونکە خۆمم لێ ون بووە و
لە هیچ کۆڵانێکی رووناکدا نایدۆزمەوە
چاوەکانم هەمیشە کراوەن
ئیدی خەونێک نەماوە بیبینم
لێوەکانم وشک بوونەتەوە
لەم وشکەساڵیی ماچەدا
هەناسەکانم هێندەی مەریخ قورسن
کەوتوونەتە سەرشانی مەرگ
چەندین سەدەیە دەفڕم
لە ئاسمانە رەش داگیرساوەکانی مەراقدا
هەزاران هەزار ساڵە
بەسەر فەرشی گریاندا ئەڕۆم
لە پاپۆڕی تێکشکاوی زەمەندا
لە کەناری ژیلەمۆدا لەنگەر دەگرم و
سووتانی رۆحم ئەچنمەوە
ئەمێستا پڕم لە گۆرانی حەزین
کەچی چڕینم لە بیر چۆتەوە
پڕ پڕم لە مۆسیقای غەم
کەچی ژەنینم بیر چۆتەوە
ئاسمانم پڕە لە هەوری رەش
کەچی بارینم بیر چۆتەوە
تۆ هێشتا نازانیت، شەوان
تاریکی رائەخەم و
بێدەنگی ئەستێرەکان
ئەدەم بە خۆمدا
هەر تینووم بوو
پەرداخێک لە خەیاڵی
باوەشت ئەخۆمەوە
کە برسیشم بوو
لەتێک لە کێکی یادگارییەکانت ئەخۆم
کە بیرم کردیت
خوداش لەگەڵ خۆمدا دەخەمە گریان
تۆ نازانیت هەموو شەوێک
پرسیاری تۆ لە مانگ دەکەم و
تریفە وەڵامم ئەداتەوە
تۆ نازانیت، هەموو رۆژێک
سۆراغت لای پەلکە گیا دەکەم
ئاورینگ وەڵامم ئەداتەوە
تۆ نازانیت، هەر کات بێدەنگ بیت
زمانی شیعرم لە گۆ دەکەوێت
تۆ نازانیت، هەر کات تووڕە بیت
زریانی فرمێسکم هەڵدەچێ
تۆ نازانیت، هەر کات ون بیت
ژیان خۆیم لێ حەشار دەدا و
لە کۆڵانەکانی دڵتەنگیدا
بەدەم نەفەسدان
لە دوا سیگاری تەمەنەوە
دوا هەناسەم هەڵدەکێشم

2018
ستۆکهۆڵم

Previous
Next