سەفەرێک لەگەڵ خۆم-2-.. جەلال عەبدوڵا ساڵح
بەشی دووەم
سەفەرێک دەکەم لەگەڵ خۆم!
سەفەر دەمکات بە هاوڕێیی ئیغتراب و
کۆڵانە تاریکەکانی دابڕان
سەفەر بەرەو شوێنێکی نادیار دەمبات
لە سەفەر دا گیانەوەرێکی خۆڵاوی قوتم ئەدات
بۆ کۆتایی دەمکات بە پارچەیەک لە خۆی
دەمئاڵێنێت لە قژی قوڕاوی خۆی
دەمکات بە بەشێک لە ئێسقانە پیرەکانی مێژووی خۆی.
سەفەرێک دەمگرێتە باوەش و دەمکوژێت
سەفەر دوور لە جەنجاڵی شار
بۆ هەمیشە دەملاوێنێت
سەفەرێک دەکەم لەگەڵ خۆم
نە تۆم لەگەڵ دێیت و نە ئەو
ڕۆژی سەفەرم دەبێتە شایی کۆترەکان
لە پاش خۆم چەند مشتێک گەنمی بیرەوەریان بۆ بەجێ دەهێڵم!
بە ئاو دەڵێم ئاگای لێیان بێت
نەفرەت لە چەقۆ دەکەم ئازاریان بدات
ئەو ڕۆژەی سەفەر دەکەم
ڕەنگی ئاسمان دەبێتە کراسی هەور
کۆچەرییەکانی نیشتمان
وەک باڵندە دەئاڵێن لە دەلبەندی سنوورەکان
ئاسۆ دوور دوور
لە زۆر دوورەوە دەبینم
لە خەتی ملی قومری
حەوشەکەتان دەچێت
سەفەر دەکەم بۆ لات
ئەی ماڵی هەمیشەیی و کۆتاییم!
ئەی ئاوازی دووا گۆرانی ماڵئاوایم
گوێم لە ڕەزی ژیانە پێم دەڵێت:
سەفەری تۆ
لە گریانی ترێ دەچێت
پێش ئەوەی بیکەن بە شەراب
