Skip to Content

(ژینا) چووە ریزی (نەمران)ەوە!.. عەبدوڕەحمان گەورکی

(ژینا) چووە ریزی (نەمران)ەوە!.. عەبدوڕەحمان گەورکی

Closed
by September 22, 2022 General, Opinion



لە کۆمەڵگایەک و وڵاتێکدا کە لێوانلێوە لە “سەرکوتکردن” و “دیکتاتۆر” خۆی وەک (خوا) بەسەر خەڵکدا فەرز دەکات، “ڕووداوێک” یەکسەر دەبێتە هۆی سەرهەڵدانی توڕەیی و ڕق و کینەی خەڵک بەرامبەر بە حکومەت. ئەمەش ئاماژەیە فح ئامادەبوونی هەلومەرجەکانی کۆمەڵگا بەرەو شۆڕش و راپەڕین!
پەلاماردان و لێدانی ژینا ئەمینی (مەهسا) لەلایەن پاسدارانی حکومەتەوە لە تاران و لە رۆژی ٢٢ی خەرمانانی ئەمساڵ (13ی سێپتەمبەری 2022) تەنها “ڕووداو” نەبوو کە باسی زنجیرەیەک لە تاوانەکانی حکومەتی بکات و روانگە و بۆچوونی حکومەتی ویلایەتی فەقیهی لەسەر خواست و ویستی کۆمەڵەگای ئێران و بە تایبەت کێشەی (ژنان و پۆشش) بخاتەڕوو، بەڵکو هەروەک چۆن لەسەر کێلی مەزارەکەی نووسرا، ناوی ژینا بوو بە “رەمز” و لەناو کۆمەڵگادا دەنگی دایەوە و جارێکی دیکە تەلیسمی ئەم روانگە کۆنەپەرستانەیەی تێکشکاند!
لەسەر کێلی مەزارەکەی ژینا نووسرابوو “تۆ نامری!”، کەوایە رەمزی ژین و ژیان و ئازادییە کە باس لە مردن و لەناوچوونی دیکتاتۆرییەت و روانگەی دەسەڵات بەرامبەر بە پرسەکانی کۆمەڵگا دەکات. ئەمە هەر ئەو هەلومەرجە لەبارەی کۆمەڵگایە بەرەو ڕاپەڕین و شۆڕش و داوا لە هەموو مرۆڤێکی ئەم سەرزەمینە دێرینە دەکات کە “راپەڕن” و ئاڵای شۆڕش و ڕاپەڕین لە دژی دیکتاتۆرییەت هەڵبکەن!
ژینا چووە تارانی پایتەخت و لەوێ لەلایەن پاسدارانەوە شەهید کرا و تەرمەکەی گەڕێندرایەوە بۆ سەقز لە کوردستان کە شوێنی لەدایکبوونیەتی. سەقز راپەڕی و سنە هاتە پاڵپشتی و دوای پەیامی خاتوو مریەم ڕەجەوی کە دەستبەجێ هاوخەمیی خۆی بۆ بنەماڵەی ژینا (مەهسا ئەمینی) دەربڕی و کوشتنی ژینای بە “دڕندانە” وەسف کرد و ماتەمینی گشتی لە سەرانسەری ئێراندا ڕاگەیاند. ئینجا سەراسەری ئێران هەستایە سەر پێ بۆ رێزگرتن لە ژینا. خاتوو ڕەجەوی وتی لە پەیامەکەیدا وتی: “پێویستە هێزی گەڕۆکی دوژمن بە ژنانی سەر بە ئیرشاد رژێمی ئێران هەڵبوەشێنرێتەوە. داوا لە ژنانی بە غیرەتی ئێران دەکەم بۆ دەربڕینی ناڕەزایەتی سەراسەری دژ بە رژێمی ژنکۆژ و پەلشتی ئاخوندی راپەڕن! زوڵم و زۆرداریی ئاخوندان و پاسدارانی نه‌زانی و تاوان، به‌ خۆڕاگری و بەرخۆدانی ژنانی ئێرانی تێکدەشکێت. بە تەواوی هێز و تواناوە دەبێت بەرەوڕووی ئەم رژێمە و هێزە گەڕۆکە سەرکوتکەرەکانی ببینەوە”. ئینجا لایەنە سیاسییەکانی ئۆپۆزیسیۆن مانگرتن لە کوردستانیان ڕاگەیاند کە لە لایەن جەماوەرەوە پێشوازی لێکرا.
بەڕێز (مەسعوود رەجەوی)یش لە پەیامێکدا ڕایگەیاند کە ” نابێت سنە و سەقز بە تەنیا بمێننەوە. پێویستە لە خۆڕاگریی ژنان و لاوانی تێکۆشەری شاری سنە وانەیەک وەربگیرێت. لاوانی شۆڕشگێڕ بۆ پشتیوانیکردنی خەڵکی شاری سنە، لە شارەکانی دیکە راپەڕن. ڕژیم دەبێ وڵامی یەک بە یەک خوێنڕشتن و تاوانەکانی وەربگرێتەوە”.
لاوان و زانکۆیی و چینە جیاوازەکانی کۆمەڵگای ئێران لەدژی ڕژێمی ژنکوژی ئاخوندی و ئەو تاوانە نوێیەی رژێم، ڕاپەڕین و ئەوەیش وایکرد ناوی (ژینا) لە سەراسەری ئێران دەنگ بداتەوە.
بەم شێوەیە ناوی ژینا بوو بە “ڕەمزی خروش”ی ئەو خەڵکەی دژی بێ عەدالەتی ڕژێمی ویلایەتی فەقیهی وەزاڵە هاتبوون. لە زۆربەی شارەکانی ئێران و بە تایبەت تاران، ناڕەزایەتی جەماوەری دژ بە حکوومەت گیانێکی نوێی بە بەردا کرا و لە کوردستانیش جگە لە پەرەسەندنی ڕاپەڕین و ناڕەزایەتییەکان، مانگرتنەکانیشی لەسەر زیاد کرا بەرانبەر بە تاوانی دڕندانەی حکومەت دژ بە ژینا و سروودی مەرگ و نەمانی حکومەتیان دووپات کردەوە. بەڵێ ژینا نەمردووە و زیندووە. ژینا رەمزی بزووتنەوەی دادخوازییە.
ئەم ڕووداوە نیشانی دا کە بە وتەی کاربەدەستانی فەرمی ئێران “حکومەتی ئێڕان گەیشتووەتە کۆتایی خۆی” و ئەوە بووە بە سەرەتای ڕاپەڕینێکیتر بەرەو ڕووخاندنی دیکتاتۆرییەتی ئایینی لە ئێران. ئەم ڕووداوە ژیانێکی نوێی بە کۆمەڵگای ئازادیخوازی ئێران بەخشی تا شوێنی (عەلی خامنەیی) و ڕژێمەکەی بخاتە لەرزین و ئەوەیش ڕووی دا! (لە کوردستانەوە تا تاران زوڵم لە دژی ژنان. مەرگ و نەمان بۆ دیکتاتۆر. ئەیکوژم، ئەیکوژم ئەوەی خوشکەکەمی کوشت. مەرگ و نەمان بۆ خامنەیی.. ژن، ژیان و ئازادی و … هتد) بوون بە دروشمی گەل و لە تۆڕە کۆمەڵایەتییەکان بوو بە (ترێند)ی چەند ملیۆنی. رادەیەک لە شکۆمەندی هاودەنگی و یەکڕیزیی خەڵک لە دژی دیکتاتۆرییەتی ئایینی، کە هەموو سیناریۆکانی حکومەتیان خستە پەڕاوێزە کە نەخشەی بۆ داڕشتبوون بۆ مانەوەی لە دەسەڵات!
ئەم توڕەییە هەڵچنراوە ڕۆژی شەممە ٢٦ی خەرامانانی ١٤٠١ و لە کاتی ناشتنی تەرمی مەهسا ئەمینی (ژینا) لە سەقز گەیشتە لوتکەی خۆی. خرۆشێک بە هەناسەیەکی نوێوە کە بەرەو ئەوە هەنگاوی نا کە وا لە دیکتاتۆر بکات کۆتایی خۆی ببینێت!
زۆر سەرنجڕاکێش و گاڵتەجاڕانەیە کە ئیبراهیم ڕەئیسی، کە وەک خوێنڕێژ و میرغەزەبێک لە لایەن خامنەییەوە دانراوە لە پۆستی سەرکۆماریی ئاخوندان لە ئیران، وەزیری ناوخۆی کابینەکەی، واتا پاسدار تیرۆریست (ئەحمەد وەحیدی) ڕاسپاردووە بۆ لێکۆڵینەوە لە کەیسی شەهیدبوونی ژینا ئەمینی (مەهسا). کە ئەوەیش نەک هەر برینەکانی بنەماڵەی شەهید سارێژ ناکات، بەڵکو دەبێتە هۆی پەرەسەندنی رق و توڕەیی خەڵکی ئێران و کوردستان دژ بە حکومەت. بە تایبەت کاتێک پاسدار ئەحمەد وەحیدی وتی کە “ژینا هەر لە منداڵییەوە کێشەی مێشکی هەبووە و پیاوانی حکومەت هیچ ئامێرێکی لێدانیان پێ نەبووە و ژینا بە هۆکاری سروشتی مردووە!” زۆر بێ شەرمانەیە قسەی واکردن و دەملارکردنەوە بەرانبەر بە خانەوادەی شەهید و خەڵکی ئێران!
ئەمە پەندێکی بەناوبانگ و ئاشنایە لە ئێران کە دەڵێت “لەگەڵ گورگدا مەڕ و چەوری دەخوات و لەگەڵ شوان فرمێسک دەڕێژێت!”. تاوانبار ئیبراهیم ڕەئیسی، هاوسۆزی خۆی بۆ بنەماڵەی ژینا ئەمینی دەردەبڕێت، لە هەمان کاتدا، وەزیری کابینەکەی ڕادەسپێرێت بۆ لێکۆڵینەوە! بەدڵنیاییەوە دەملارکردنەوەی ئیبراهیم ڕەئیسی بۆ بنەماڵەی شەهید و خەڵکی ئێران،جگە لە توڕەیی و ڕق و کینەی خەڵک بەرامبەر بە ڕژێمی بکوژان بەرهەمی نابێت.
هەر بۆیە لە لایەن بنەماڵەی مەهسا ئەمینی (ژینا) و خەڵکی کوردستانەوە، قسە و وتەکانی پاسدار ئەحمەد وەحیدی بە “گاڵتەجارانە” و ئەو فیلم و کلیپانەی لە میدیاکانی حکومەت پەخش کرا بە “پچر پچر” و هاوسۆزی سەرانی حکومەت بۆ بنەماڵەی ژینا، بە “فرمێسکی تیمساح” دەزانرێت.
دەرئەنجام..
گۆڕانی سەردەم، کە هێنانە سەرکاری ئیبراهیم رەئیسی دەرخەریەتی، راستە و هەل و مەرجەکان بۆ شۆڕش ئامادەن. عەلی خامنەیی، ئیبراهیم ڕەئیسی هێناوەتە سەر کار بۆ ئەوەی بەر بە شۆڕش و راپەڕینە جەماوەرییەکان بگرێت. بەڵام ئەوەی دەبینرێت ئەو راستیەیە کە “ئیبراهیم ڕەئیسی دوا سەرۆکی ئەم ڕژێمە دەبێت”. خەڵک بڕیاری خۆی داوە کە لە “ڕووداوەکان” ڕاپەڕین و لە ڕاپەڕینەکانە “شۆڕش و سەرکەوتن” بەرهەم بهێنێت. ئازادیخوازانی ئێرانیش هەر لەبەر ئەم هۆکارە زیندوون و هەناسە دەدەن. ئەوان دڵیان بۆ ئازادی گەل و نیشتمان لێدەدات!

عەبدوڕەحمان گەورکی، نووسەر و لێکۆڵەری سیاسی

Previous
Next