کانیی ڕۆح بژیێنینه‌وه.. زیاد ڕەشاد قادر
جاران هیچ كه‌س ئاوا نه‌بوو
بۆ واى لێ هات به‌داخه‌وه
شه‌قام و شار و ئاوایی
دڵشكاون له ناخه‌وه
×××
مه‌كینه‌ى كینه و ئیره‌یی
ڕۆحى گشتمانى هاڕیوه
جه‌نجاڵى و غوبارى دونیا
هه‌ناسه‌ى جوانیی بڕیوه
×××
بێنه بیرت ساڵانى زوو
خه‌ڵك چه‌نده دڵى شا بوو
له خوڵك و خوو و مامه‌ڵه‌دا
به ماڵ گه‌دا، به دڵ شا بوو
×××
نه شه‌ڕ، نه تاوان و كێشه
وا میر و مێرى مه‌یدان بوون
نه خزمه‌ت و خزمایه‌تى
زه‌لیلى زیقى زیندان بوون
×××
درێغا بۆ ئه‌و ڕۆژانه‌ى
بۆ یه‌ك ده‌بووین به سا و سێبه‌ر
گوێمان له خه‌مى یه‌ك ده‌گرت
به‌شمان ده‌كرد كۆست و كه‌سه‌ر
×××
ده‌بوو پێكه‌وه برسی بین
نانێ با ده‌كرایه دوو كه‌رت
خوان و خێزان كۆك و كۆ بوون
نه‌ك وه‌ك نووكه په‌شێو و په‌رت
×××
ده‌ى با هه‌موو هیممه‌تێ كه‌ین
ئاشته‌وایی ئاشت كه‌ینه‌وه
به پرووشه به‌فرى ئه‌وین
كانیی ڕۆح بژیێنینه‌وه
×××
له شین و شایى هاوده‌م و
له كاردا ته‌با و ڕه‌با بین
بۆ به‌رى باخى ئارامى
نمه‌ى وه‌شت و شنه‌با بین
×××
كۆشى دایه و لوتفى بابه
ببێته ئۆخژن و نه‌وا
خوشك و برا، خزم و هاوسێ
بۆ ده‌ردى یه‌ك ببنه ده‌وا.
زیاد ڕەشاد قادر
هەولێر
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
