لە نەبوونتا.. شیعر/ کاوە عوسمان
بیرم بێ، ژیانم …
پارچە شیعرێکی نامۆیی بوو،
زۆر بێهودانە ،
ویستم بۆتی بنوسم،
بەڵام ئەفسووس ،
هاژەی وەیشوومی…
ڕۆژە نامۆکانی سەفەر،
نەیهێشت بینوسم،
گەر جارێکی تر،،
چڕپەی لێوتم،،،
لەدارستانی بیرەوەریما..
لێ وونبوو،،
گەر گوڵە لەیلەکی..
مۆری عیشقم،،
لە بیابانی نەهاتنتا ،،
وشک و سیسبوو،،
گەر بەنەمانی فرمێسکی …
مرواریئاسای شەوانەتا،،
برینی قووڵی ڕێگای دوورم،،
بێ تیماربوو،،
گەر لە شەوەزەنگی تاریکیدا ،،،
زرنگە زەنگی ئەستێرە پرشنگدارەکانی..
نێو نیگاتم لێ بزربوو،،
بزانە ئێستاش،،
لە خامۆشیی کوژەری..
سەر کەناری کۆچی ئەبەدیتا،،
هەر چاوەڕێیی چارۆکەی..
کەشتی وێڵی بوونتم،،،
بێباک لەمەرگم،
لە دورخەی نامۆییما،،
هەزاران شوشە نامەی..
حەسرەتی سەفەرت بۆ ئەنوسم
هەربۆت ئەنوسم
…………………………………………………………………………………………………………………………..
وێنەکە کارێکی هونەری فۆتۆگرافەر (سروشت .م.ن )، بە سوپاسەوە لە پەیجی فەرمی خۆی وەرگیراوە
