ئەی یار وا تێمەگە.. قەسیدەی: ستیڤان شەمزینی
وا تێمەگە ئەمە تەنیا خەیاڵێکە
نا، من چیتر گۆرانی مەرگ ناچڕم
تا ئەو کاتەی نقومی لەشی تۆ بم
هەموو ئەو شیعرە نائومێدانەشم
بەدوای هیوای رۆژێکەوەن
لێوەکانمان بۆنی یەکتر بگرن
ئەو ئاوازە زۆر جار غەمگینەی
لە توێی وشەکانمەوە دێت
مانای تەرکدانی ژیان نییە
واتای ماراسۆنیش نییە بەرەو مەرگ
نا، ئەمە حەسرەتی دوورییە
لە نیگاری خۆرەتاوی باڵات
ئەو وڕێنانەی لە شەودا دەیانکەم
ونبوون نییە لەناو قەرەباڵغی بەرلین
نا، گەڕانە بەدوای رۆژێکدا
لەسەر لەشی رووتت
نەخشەی نیشتمانی لەززەت بدۆزمەوە
وا تێمەگە ئەمە تەنیا دەردەدڵێکە
خۆشەویستیت ئاگرێکی پرتەقاڵییە
لە سەوزایی دەشتی خەونەکانم بەربووە
جوانیت جادووی هاروت و مارووتە
لە ژیانی عەوداڵ و گەڕۆکم کراوە
ماچە تامەزرۆ شەرمنەکانت
ئەستێرەن بەلێومەوە دەدرەوشێنەوە
هەڵکردنی شەماڵی سینگ و بەرۆکت
کوژانەوەی تووڕەییەکانمی بەدەمەوەیە
ئەو پەنجانەی گیتاری دڵتەنگی دەژەنن
حەزیان لە سیسبوونەوە نییە
لەناو باخە شەکەتەکانی بێهودەییدا
نا، ئەوانە ماندوون
دەیانەوێت گەشت بکەن
بەناو تاڵ بە تاڵی پرچی گوڵاوڕێژتدا
وا تێمەگە بیر لە خۆکوشتن دەکەمەوە
سەد ئەوەندەی تر
چارەگران بم لای ژیان
دەست ناخەمە گەردنی خۆمەوە
هەمیشە ئومێدم هەیە
ماچەکانی تۆ
پەلکەزێڕینە لە لاملم بنەخشێنێت
ئەگەر شیعرێکێشم خۆکوژیی ئەنجام بدا
دیارە دڵی لەوە رەنجاوە نەیتوانیوە
وەسفێکی تەڕی ماچێکی تۆ بهۆنێتەوە
یان زمانی دەبەسترێ و واقی وڕ دەمێنێ
لە دیمەنی ئەو تابلۆ ئیرۆسییەی
لەسەر سیسەمی لێکئاڵان دەینەخشێنین
ئەگەر بینینت زمانی شیعرم کورت بۆتەوە
مانای کورتهێنانی عەشقی من نییە
نا، دەستی حەزم زیاتر درێژ کردووە
بۆ ئەوەی پەنجەکانم بگەنە
هەموو سەرچاوە روونەکانی چێژ
وا تێمەگە لە باسی مردندا
سەرقاڵی گۆڕهەڵکەندنم بۆ جوانییەکانم
نا، ئازیزم بابەتەکە مردنی مەرگە
بەو خەنجەرە نوک تیژانەی
لەرێگەی رژانمان بەسەر یەکدا
لە ناو سکی مردنی وەردەدەین
هێندە لە هۆگربوونم بە پایز سڵ مەکە
گەڵاڕێزان لە قامووسی مندا
پێچەوانەی مانا باوەکانی باخە
نا، ئازیزم وەرینی ماچە گەرمەکانی منە
بەسەر لەشی هەڵلەرزیوی تۆدا
گەڵاڕێزانی ئەسرینەکانی تۆیە
لە نێو دەفتەری شیعرەکانی مندا
واتێمەگە هێندە مەستی دەریام
ئیدی کانیاوی مەمکەکانت لە بیر دەکەم
نا، ئازیزم پێش ناسینی دەریا
لە هەر دوو کانییەکەی سینگت
تینووێتی سەفەری عەشقم دەشکاند
وا تێمەگە ئەی یار
لەهەنگاوە تیژتێپەڕەکانمدا
بەرەو شوێنێکی تر
ملی رێگەم گرتۆتە بەر
نا، ئازیزم ئەم پەلەپەلەم بۆ ئەوەیە
چرکەیەک زووتر بگەمە
دوورترین مەودای لەشی ناسکت
5-5-2019
سوێد – مالمۆ
ئەمڕۆ پاش گەڕانێکی زۆر بەناو شاری مالمۆدا لەگەڵ “دکتۆر فەرمان”ی پورزام. بە ماندوێتیی ئەم شیعرەم نووسی کە بە درێژایی پێنج کاتژمێری ناو شەمەندەفەری نێوان ستۆکهۆڵم بۆ مالمۆ بیرم لێ دەکردەوە. وشەکان لەو ساتەوە وەک پۆلە چۆلەکەیەکی ماندووی تینوو لەسەر چەمی مێشکم نیشتنەوە کاتێک لە سێنترال ستاخۆنی ستۆکهۆڵمەوە شەمەندەفەر کەوتە جوڵە رووەو کۆتا شاری باشووری سوێد واتە مالمۆ.
