پێکهاتن و تێکبەربوون.. نەوزاد بەندی
بە داخەوە ئێمە کوڕی میللەتێکین لە جیاتی بە دوای خاڵە هاوبەشەکانی نێوانماندا بگەڕێین تاکو پێک بێین و یەکگرتوو بین ، بە دوای خاڵە دژەکانی نێوانماندا دەگەڕێین و لێک ئەترازێیین و یەکێتی وپارتییەکان دروست دەکەینەوە ..جەلالی و مەلاییەکان دروست دەکەینەوە ..تەنانەت گەر خاڵی دژیش نەبێ ، بە وەهم ئەو دژایەتییانە دروست دەکەینەوە و گەورەی دەکەینەوە وسەدان و هەزاران کوردیش ئامادەن بەسەر هەردوو سەنگەری دژدا دابەش بن و بەربنە گیانی یەکتریی ..
ئێستا لە سۆسیال میدیادا ، جنێو و قسەی ناشیرین ، لەفیشەک و ڕاجیمە کوشندەترن ..نازانم بۆچی بەو شێوە بەرفراوانە ئامادەین هەست و کەرامەتیی یەکتری بریندار و تەفر و تونا بکەین ؟
من دڵنیام زۆرینە لە ئەسڵی بابەتەکانیش تێ ناگەن و یەکسەر بە جنێوەوە خۆیان ئەکەن بە گفت وگۆکاندا ..وەک ئەوەی ئەگەر لەو جنێوگەلەدا بەشداریی نەکەن ، ئینتیمای نیشتمانییان زیانی پێ بگات .
دوو باری سەرنجی زۆر ئاسایی هەیە ، کە لە هەموو جیهاندا ئەو شتانە زۆر نورماڵن .. تەنانەت لە یانزەی سێپتەمبەر ، هەبوون دەیانووت ئەوە کاری پنتاگۆن خۆیەتی و هیچ پەیوەندی بە قاعیدەوە نیە .. هیچ کەسێکیش جنێوی بە هیچ کەسێک نەدا ..
کۆمەڵێ گەنج بە هێلکەوە هێرش دەکەنە سەر پەرلەمانتارێک لە ئەوروپا ..وەک ناڕەزاییەک کە پێشتریش هێرشی واکراوەتە سەر سەرۆک وەزیرانی بەریتانیا وفەڕەنسا وئیتاڵیا و کەسایەتی تریش …بەڵام هێرشی هێلکەکەی ئەوان بێدەنگ و پڕ هێلکە بوو ، لای ئەم گەنجانە پڕ لە قسە و هات وهاوار و کەم هێلکە بوو.. واتە تەنها هێلکەیەک بەر قاچی پەرلەمانتارەکە کەوت .. لە کاتێکدا ڕۆژنامەنوسێکی وەک مونتەسەر زەیدی پێڵاوەکانی هەڵدا بۆ سەری جۆرج دەبڵیو بۆشی سەرۆکی ئەمەریکا کە لەگەڵ مالیکی سەرۆکی عێراقدا لە چاوپێکەوتنێکی ڕۆژنامەوانیدا ڕاوەستا بوون ، هێندە قسە و هات و هاواری نەکرد ..
لە هەمان کاتدا ، ئەم کارە شەرمنانە و لاوازەی گەنجەکان ، وەک پێڵاو هەڵدانە شەرمنانەکەی دکتۆر کازم فاروق لە پەرلەماندا ، بە ڕای من یەکەمجار کەمباوەڕییە به بابەتەکە ، دوو دڵییە بەو کارەی پێی هەڵئەسێ ،.نائومێدییە بە کۆمەڵانی خەڵکی کوردستان .. ئەگینا نە هێلکە بارانکردن ئاوایە و نە پێڵاو تێگرتن بەو شێوەیەیە .. ئەمە هیچ نەگەیەنێت ئەوە ئەگەیەنێت ئێمەکردارمان زۆر کەم و کورت ولاوازە ، بەڵام گوفتارمان زۆر دوور و درێژ و قوڵ و جیاوازە ..
ئیسماعیل هێلکەیەک ئەگرێتە یاسین ،بەر قاچی ئەکەوێ و ئەکەوێتە سەر شەقام .. کەهێشتا بۆ هێلکە و ڕۆن دەستی دەدا ..یاسین کۆمەڵێک دەنێرێ بۆئەوەی اسماعیل تەمبێ بکەن ..
لێرەدا ئارام و قادر ، هەر یەکەیان دابەش دەبن بەسەر دوو سەنگەری دژ بە یەک ..ئێ ئەم دووانەیش هەزاران لایەنگر و هەزاران دوژمنیان هەیە ..هەربۆیە دوو بێناو کە دژایەتی یەکتریدەکەن ڕەنگە پەنجەرەیەک بشکێ ،بەڵام دوو ناودار کە بە شەڕ دێن ، ماڵەکە هەمووی دەڕوخێ ..
هیوادارم ئەو دووانە واز لەو قسە و قسەڵۆکەی نێوانیان بێنن ، چونکە لە بنچینەدا کارەکان نیشانەپێک نەبوون .
