سۆڵۆیەکی تەپڵ.. شیعر: نزار قبانی.. وەرگێڕانی: پشکۆ ناکام
فەرمانڕەوا تەپڵ لێ ئەیا
و
هەموو دەزگاکانی ڕاگەیانن
ئەکێشن بەهەمان تەپڵا
و
هەموو دەزگاکانی هەواڵ
ریتمی تەپڵەکە زلتر ئەکا
و
ڕۆژنامە بچووک و گەورەکان
لە “مەلها”یەک ڕەقس ئەکەن
كە دەسەڵات بەڕێوەی ئەبا
لە مۆسیقایا
هیچ شتێ لە دەنگی دەسەڵات
ناخۆشتر نایە بە گوێتا
گۆرانی ووتنی ڕەسمی
وەک : نان
…چا
…پاقلە
لەسەر عەڕەبانەکان ئەفرۆشرێ
هەر وەک : حەبی مەنع
حەبی زەغت
پارچەی ئۆتۆمبیل ئەفرۆشرێ
گۆرانی ڕەسمی
وا لەسەر هەموو شەپۆلەکان
و
ووتەی دەسەڵات بریقەدارە
هەروەک : جل و بەرگی ڕاقیسەکان
كەس لە ” ڕەچەتە “
و
دەرمانی دەسەڵات ڕزگاری نابێ
سێ کەوچک پێش نان خواردن
سێ کەوچک دوای نان خواردن
سێ کەوچک پێش نوێژی بەیانی
سێ کەوچک دوای بوێژی عەسر
سێ کەوچک پێش مەراسیمی ناشتن
و
پێش چوونە ناو قەبر
لە مێژووا نەبوە
لەم خەفەتە گەورە تر
ئەم تەپڵە شێتی کردووین
خودایە پێمان ببەخشە کەمێک سەبر
دەسەڵات لە دروستکردنی ووشەیا : زانایە
لە ڕێزمانا : شارەزایە
لە “عەزەڵات” نیشاندان : بێ هاوتایە
لە شیعری دەسەڵات خراپتر نیە
هیچ درۆیەک
لە درۆی دەسەڵات زیرەکانە تر نیە
ڕۆژنامە…دەنگ و باس..کۆمێنتەکان
خودەیەکی شەوقداری ژێر خۆر
ئەستێرەی بریقەداری سەر شانەکان
تفەنگی فیشەکە درۆیینەکان
نیشتمانێک لەسەر ئانتێنەکان هەڵواسراو
نیشتمانێک لە بەڕێوەبردنی شەڕا
شک نابا یەک سەرە واو
جگە لە درۆ و قسە کردن
نیشتمانێک ئێستاش سروودی سەرکەوتن
بۆ ئەوانە ئەڵێ
لە پێناوایا مردن
هەر لە سەرەتاوە
ڕیتمی تەپڵی دەسەڵات دووبارەیە :
“ڕاوێژ کردن بە خەڵک ، بناغەی حوکمڕانیە”
“میللەت بە پێ ی دەستوەر..!! بناغەی حوکمڕانیە”
….جگە لە دەسەڵات
كەس ڕەقس لەسەر ووشەکانی ناکا
خودایە : لە دەنگی ئەو تەپڵە تێر بووین..
چیتر لە توانای مێشکمانا نیە
…کەس وەک دەسەڵات
زینا بە ووشەکان ناکا
داپڵۆسین ، بناغەی حوکمڕانیە
كوشتنی ئینسان ، بناغەی حوکمڕانیە
حوکمی پۆلیسیانە ، بناغەی حوکمڕانیە
بە ڕۆبۆت کردنی ئینسان ، بناغەی حوکمڕانیە
تێڵا تڕێنی ووشە ، بناغەی حوکمڕانیە
تێڵا تڕێنی ئینسان ، بناغەی حوکمڕانیە
تەپڵ…….تەپڵ
دەسەڵات جوانی خۆی
و
خشڵی خۆڕازانەوەی ئەخاتە بازاڕی جوملەوە
هیچ “ڕووتێک”
لە دەسەڵات بە ڕووتی
ناشرینتر ، نەبۆتەوە
تەپڵ….تەپڵ
ستافی کۆرس و گۆرانی ووتن
و
زانایان و ئەهلی فیکر
قازی شار
بە بیستنی تەپڵ هەڵئەلەرزن
گۆرانی ڕەسمی
وەک ڕاچڵەکین لە هەموو لایەکەوە دێ
و
گۆرانی ” نەوت” ئەیەوێ
ئینسان بخاتە بازاڕەوە
یەک دانە بەرمیل
لە بەهای ئینسان بە گرانتر ئەشکێتەوە
گۆرانی ڕەسمی
وەک گۆرانی” شەیتان” دووبارە ئەبێتەوە
و
کاتێ ” سولطان ” گۆرانی ووت
ئەبێ هەموان سەر بجۆڵێنینەوە
و
لەبەردەمی ئاسیشەکانا هاوار بکەین :
ئای ..ئای.. اللە لەو دەنگە…ئای
گۆرانییەک ، بە ڕقەوە سەپێنراوە
خۆشییەک ، بە ڕقەوە سەپێنراوە
مردنێک ، بە ڕقەوە سەپێنراوە
گۆرانی فەرمانڕەوا
وەک گۆرانی خوا
بە زۆر پیرۆز کراوە
“”””””””””””””””””””””””””””””””””””””””””””””””””””””””””””””””””””
(تێبینی : بۆ ئەوەی ڕیتم و داڕشتنە کوردییەکە چێژی شیعرەکە لە کیس نەیا ، بە ناچاری ووردە دەستکارییەکی کراوە..)
