شیعر/ ئێوارانە -٤٣.. سەردار جاف
کوا ئێواران
لە زمانی هەناسەی من تێدەگەی
تووڕە بوونت دەريايەکەو
لێی قورتار نابم
کە سەراولێژ ئۆغر بوونمە
ئەو دەمانەيش
دەخولێمەوە کە تەنهایی و وڕ و کاسی دەمگرێت و
هەر پاشگەزی بڕيار نابم
ئەم ئێوارە
لە کۆڵانە تەنگەکەی ئيشقا
گێژەڵوکێ
لە سەربانەکەی ماڵە باوانەوە
بۆ پێ دەشتە سەرابييەکە بەڕێوەيە
بن هەر دارێ
مۆرانە ساباتی خۆی لێخستووە و
هێدی هێدی
جەستەم دەخوا
بۆ نەمانم نيگای بەلای تەرزە و کڕێوەيە
ئەم ئێوارە لە جەژنە شەختەيەکدا
سەوزە داراکان بە لادا دەهاتن
گوڵەکان دەپوکانەوە
تارماييەکان دێوەزمەی بڕينەوەی هەناسەی من و تۆ بوون
بە سەر باڵی رچين دەچوون
پەنجەی پەنهان
لە ئاسمانی تەنهاييدا
بە سەر رۆحم لەرانەوە
گڵۆپ کزکز ….جراکان فوو لێکراون
دەنگە سرتە و چرپەکانيش
کپ کپ رووە و ئاوابوون چوون
يادەکانمان
بوونە کۆلارەی مناڵان
ئاسمانی گەڕەک
شەکەتی و مەرگ و فەنابوون
چما ئەم تانهاييە ئۆغر دەکا
زريان و تۆفان روو دەدا
چاو لە توانەوەی خۆم و باڵابوونی شەهلا دەکەم
بە نێو سەيوانەکانی پێچاوپێچی خۆر
رۆژانێ شەبەنگيم
دەبێتە پەشمەک و بە دەست مناڵانی چەتوونەوە
پيس و لێخن و بۆر
چ جەژنێکە
هێندە ساردە لە قوربانی من دەچێ
ئيدی ژوان دەتوێتەوە و
بەرەو نەمانی ژن دەچێ
پێ دەچێ ئەسکيمۆ بم و نەمزانی بێ
دەبێ شەوارەی شەوسڕی
زنەي زەنوێرستانی بێ
من هەر دەبێ وێڵی وێڵ بم
تەنهایی دوا کاروانمە و
جێ مەنزڵ و فرياد رەسم
ئەوە نييە ئازيزەکەم
خۆشم دەوێی خۆشەويسترين کەسم
٤ / ٧ / ٢٠٢٣
