سۆزی دڵ.. نەوزاد بەندی
وا ئەمشەویش ڕۆح بە جێما و دڵ لەناکاو سەفەری کرد .
بەو شەستە بارانە هات و کە هاتە ژوور ، ئەو دەری کرد .
من ئەمزانی دیوارێکی بەرز هەیە ئالەو نێوانە،
ئەو کێوانە ، هەموومانی لە تیشکی خۆر بێ بەری کرد .
بەو ناکاوە ، جانتاکانت چۆن ڕێکخست و ئامادە بوون ؟
زۆر ساده بوون ووشەکانت ، کە ڕۆحت وا بێبەری کرد .
ئاگاداری ڕێگاکان بە ، خۆت ڕادەستی خەیاڵ نەکەی ،
نەکەی وەک درەخت ، وەرزەکان چییان داپێی ، لەبەری کرد .
دەوران دەورانە ئەزیزم ، ئەو گوڵەی کە چاو هەڵدێنێ ،
ئەم بێ ئاگا پێی پیا ئەنێ و ئەو ئاگادار ، لەسەری کرد .
لەو شەقامه شێدارانەی قەوزه دیواری گرتووە ،
لە میترۆیەکا یادم کە ، گەر خەم لەگەڵتا شەڕی کرد .
لە پارکەکانی ئەوروپا ، لەگەڵ بەفرا وێنە بگرە ،
من لێرە چی بکەم گەر شیعرێ داوای دوڕ و گەوهەری کرد ؟
لەوێ بەناو گەڵا و گۆڵی باخێکی تەڕا نوقوم بە ،
قەینا مەپرسە کە دڵم بەخەم سەر ڕێژ بوو ، سەری کرد .
ئێرەیی نییە ئەزیزم ، لێره ئێرەییش بەجێی هێشت ،
چی بکەم دڵم تەنگە و دووریت زیاتریش تەنگەبەری کرد .
نەڵێی پێی ناخۆشە گەشتێ بکەم بە دنیای ڕۆشنا ،
یەک باڵداری شیعرم هەبوو ، گەشتی تۆ دەربەدەری کرد .
هەر ئێستا لە تاریکیدا ، نەخەوم دێ و نە خۆر هەڵدێ ،
نازانم کاممان قازانج و . کاممان شکا و زەرەری کرد
ئەگەر لەناو جانتایەکتا ، دەنکێ شیعرت ببردمایە ،
کاتێکت زانی برژانگت بۆتە سوختە و لەبەری کرد .
وا نەزانی ئەوێ ئیتر کانگای ئەوین و هیوایە ،
زۆر خەبیر پەنای بۆ برد و کەچی ئەو بێ خەبەری کرد .
هەمان دنیای وشک و ڕەقە ، ڕەنگەکان نەتخەڵەتێنن ،
نەکراوە هێشتا وەک ئەوەی کە بەشەر بە بەشەری کرد .
