ڕاکردن.. شیعری نەوزاد بەندی
لە بێدەربەستیی تۆ ڕامکرد ، قەت بڕوا مەکە بێمەوە ..
تکا دەکەم تۆیش واز بێنە و دوورە پەرێز بە لێمەوە ..
چەند جار تەنیاییت تێ بەردام ، ووشە و نیگام لە گۆ کەوتن ،
ئاگات لێ نەبوو بەو داخە ، تا بەیانی ئەتلێمەوە ..
بچووکترین هەل ڕەخسا بێ ، منت تێدا جێهێشتووە ،
لاتوابووە ئاڵودەت بووم ، هەر ناوی تۆ ئەڵێمەوە ..؟
لە ڕقی پیرۆز نازانی ، بەری دار نییە ، هی بەردە ،
کە دڵ داگیرسا وەک پشکۆ ، بە بێ تۆیش ئەگەشێمەوە ..
سەد جار بێ هۆ خۆتت وونکرد، ڕۆیشتی بۆ گەشت و بۆ گەڕان ..
به تەمای بە ئاماژەیەک ، زوو بۆ لات بگەڕێمەوە ..؟!
دیدار و پەیمانی درۆ ، شکاندیانی لەبەرچاوم ،
زامەکانی دەستی خۆتە ، ئێستا لای خۆت ئەکولێمەوە ..
ئەم غرور و لووتبەرزییە ، چییە سەری لێتێکداوی ؟ ،
زۆر دەمێکە من خەریکم داو بۆ غوربەت ئەنێمەوە ..
بە خەتکوژێن نا ، بە چەقۆ ، ئەیسڕمەوە شوێنەوارت ..
بۆ یەک جاریش ، خەندەیەکت
هەڵنەواسیوە پێمەوە ..
پیرەمێردێکی پڕ لە داخ ، ئەبێ کەڵکی چی تۆ بگرێ ؟
دروێنەی شیعرت مەبەستە ، بە بەراو و به دێمەوە ؟
ئەتەوێ لە ووشەی منا ، تەخت و تاراجێکت هەبێ ،
تەنانەت لە خەیاڵیشا نەهێڵی بحەسێمەوە ؟
بە داخەوە ! لە داخی تۆ ، ڕەنگە کتێبیش جێ بێڵم ،
بچمە شوێنێکی وا نادیار ، مەر بە مەرگ بدۆزرێمەوە .
