حیجاب لەنێوان ئازادی و ترس دا!.. شەماڵ بارەوانی
کێشە ئەو پارچەپەڕۆیە نییە کە ئەوان ناویان ناوە (حیجاب و نیقاب)، بەڵکو مەترسییەکە ئەو ئەجێندا ئیسلامگەرا و فیکرە ئیخوانگەرا مەترسیناکەیە کە لەپشت ئەو پڕۆژەی بە کابولکردنی کوردستان و ئەو تاجی قوڕلەسەرنانە(تاجی زێڕین)یە کە دەخرێتە سەری ئەو هەموو کچە منداڵ و هەرزەکارەی نیشتمانەکەم و مێشکیان پڕی کۆد و فیکری داعشی دەکەن.
کێشەکە هەر ئەوە نییە کە ئەوان دەبێ دەرگای فەزای تایبەتی و گشتی ئەو وڵاتە بۆ چاڵاکییە حزبی، ئایدیۆلۆژییە ئیسلامییەسیاسییەکەیان لەسەر پشت بێت و نابێت کەسیش ڕەخنه لەو هەموو هەوڵ و چاڵاکییە بە داعشکردن و بە تەعریبکردن و ئەنفالکردنەی کلتور و ناو و جل و بەرگ و هەموو شتێکی کوردیمان بگرێت، بەڵکو کارەساتەکە ئەوەیە کە جوودابیران و ئێمەی سیکۆلار و بۆمان نییە ساڵانەش بێت فێستیڤاڵێکی جلی مۆدێرن و نمایشێکی جیاواز و شتێکی جیاواز لە ئاڕاستە و دۆگم و ئیدەلۆژیای ئیسلامی سیاسی و سەلەفییەتی دینی بکەین.
کێشەکە هەر ئەوە نییە کە ئەقڵ و هۆش و منداڵێتی ئەو هەموو کچە منداڵ و هەرزەکارە بێ باکگراوەند، سادەلەوح، ناڕۆشنبیر و ناهۆشیارە وێران دەکەن و نیقاب و حیجابی خەلیجییان لەژێرناوی ئایین دەخەنە سەر، بەڵکو مەهزەلەکە ئەوەیە کە هەموو ئەوانە بە بیرێکی مەترسیناک و داعشی تەلقین دەدرێن و دەبن بە دووژمنێکی سەرسەختی ئازادییەکانی تاک و کۆمەڵگەی مەدەنی و کراوە و لە کۆمەڵگا و لە سۆشیال میدیا، دێن و جوێن به جودابیر، ئایینەکانی تر، کچی سفوور، هونەرمەند، ئەکتەر، گۆرانیبێژ، شایی ڕەشبەڵەک، شیعر و تابلۆ و هونەر و مۆسیقا و ئازادی و دار و بەرد دەدەن و بەهەرشتێکدا هەڵدەشاخێن و هێرشی دەکەنە سەر، کە لەگەڵ میزاج و فیکریان نەگونجێت. وەک ئەوەی ئێستا دەگوزەرێت لە کۆمەڵگەی کوردی.
ئەزیزم، مەڵێ ئەوە ئازادی تاکە و تۆ بۆ قسەی لەسەر دەکەیت؟!
هەڵبەتە لەچک و باڵاپۆشی بەو مانا و مەفهووم و حەملە ئیخوانییەی کە ئێستا لە کوردستان دەکرێت، هیچ پەیوەندییەکی بە ئازادی و شتەوە نییە. ئازادی دەبێ هۆشیاری لەگەڵ دابێت. نەک هەستی پاکی منداڵی هەرزەکار کە هیچ لە واتای ئازادی نازانیت، بقۆزیتەوە و بکەیت و بێیت و بە ئاگری دۆزەخ و ترسی ئایین و چەمکی بەڕەڵایی بیانترسێنیت، تا بۆت ببن بە کەرەسەکی خاو و داماو و بە ئاسانی بتوانیت ئایدیۆلۆژیای ئیسلامی سیاسی و کڵاوی ئیخوانییەت و ڤایرۆسی تەعریبیان بخەیتە سەر. بە دڵنیاییەوە ئازادی و ترس، چ جاران پێکەوە کۆنابنەوە. من دایک و خوشکەکانم هەموو موسوڵمانن و لەچکیش دەکەن و تا سەرمۆخی یەسقان ڕێزیان دەگرم و هەرگیز ئێمە دژی لەچک و باڵاپۆشی نین، بەڵکو دژی ئەو حەملە ئیخوانی و ئیسلامییە سیاسییە مەترسیناکەین کە ڕۆژانە و مانگانە و ساڵانە بە ناوی (تاجی زێڕین)ـەوە ئەنجامدەدرێت.
سەیرە! لەچک و جلپۆشین و چی پۆشین و چی نەپۆشین شتی تایبەتین و چی پێویست دەکات فێستیڤاڵی بۆ ڕێکخەیت و حەملەی ئیخوانی بۆ دەست پێبکەیت؟
