نامەی پیرۆزبایی بۆ چوارەمین کۆنگرەی فیدراسیۆنی شورا و سەندیکا کرێکاریەکان لە عێراق.. موئەیەد ئەحمەد
بە بۆنەی بەستنی چوارەمین کۆنگرەی (فیدراسیۆنی شورا و سەندیکا کرێکاریەکان لە عێراق)، سڵاوی دڵسۆزانە ئاراستەی بەشداربووانی خۆشەویستی کۆنگرە دەکەم و لە دڵەوە پیرۆزبایی بەستنی ئەم کۆنگرە گرنگەیان لێدەکەم.
بەستنی کۆنگرەکە لە لایەن سەندیکاکانی سەربە ئەم فیدراسیۆنە، لە پارێزگا جۆراوجۆرەکانی عێراقەوە، و بە دەستپێشخەری کادیرانی ڕابەری فیدراسیۆن، و بە بەشداریی کۆمەڵێکی بەرفراوان لە چالاکەوانی کرێکار، سەندیکالیست و چالاکەوانی سۆشیالیستی لە هەردوو رەگەز، خۆی لە خۆیدا دەستکەوتێکی گەورەیە بۆ بزووتنەوەی کرێکاری.
مێژووی فیدراسیۆن، لە ماوەی بیست ساڵی ڕابردووی بوونی خۆیدا، تا ڕادەیەک، مێژووی خەباتی سەندیکایی کرێکاران لە عێراقدا لە یەکێک لە قۆناغەکانی پڕ لە چەلێنج و كێشە و سەختییەکانیدا عەکس دەکاتەوە. خەباتی فیدراسیۆن لە پەیوەند بە خەباتی کرێکاران و خۆپیشاندان و ناڕەزایەتی کرێکاران لە کۆمپانیا جۆراوجۆرەکانی کەرتی پیشەسازی و خزمەتگوزاریدا بەڕیوە چووە، ئەمەش لە کەشوهەوای داگیرکاری سەربازیی ئەمریکا بۆ سەر عێراق، جێبەجێکردنی سیاسەتە ئابوورییە نیولیبراڵەکانی دەوڵەت، لە جەرگەی شەڕی تایفەگەری، تەقاندنەوەی تیرۆریستی، و سەرهەڵدانی داعش و هێزی میلیشیا و ئەوانی تر.
ئەمە و هەرگیز ئاسان نەبووە کە فیدراسیۆن هەر لە دامەزراندنیەوە ناچار بووە خەباتێکی تاڵ و دژوار بکات، نەک تەنیا دژی نەریتە کۆنەکانی سەندیکای کرێکاری، کە تێڕوانین و ئاسؤی ناسیۆنالیستی و ڕیفۆرمخوازی هەلەپەرستانە و سەندیکاگەرایی پەیوەست بە دەوڵەت و پارتە دەسەڵاتدارەکان زاڵ بووە بەسەریاندا، بەڵکو دژی هەوڵەکانی ڕەوت و پارتەکانی ئیسلامی سیاسی دەسەڵاتداریش بۆ کۆنترۆڵکردنی خەباتی سەندیکای کرێکاران، وە هەوڵەکانی سەندیکا و فیدراسیۆنە ڕیفۆرمخوازە جیهانییەکانیش، کە بە ئاسۆی سەرمایەداریی نیولیبراڵ گۆشکراون، بۆ بڵاوکردنەوەی کاریگەریی خۆیان لە نێو خەباتی سەندیکاییدا. لە سەرووی هەمووشیانەوە فیدراسیۆن دەبوا ڕووبەڕووی هەوڵەکانی بەشێکی چەپ ببێتەوە بۆ دروستکردنی دووبەرەکی لە ڕیزەکانیدا و زیانگەیاندن بە دڵسۆزی و خۆبەخشی سەرکردەکانی.
ئێمە هەموو ئەم قۆناغانەی خەباتی فیدراسیۆنمان تێپەڕاندووە و منیش شانبەشانی تێکۆشەرانی، بە تایبەتی فەلاح عەلوانی ئازیز و کۆمەڵێک لە چالاکەوانی تری سۆسیالیست، بەردەوام لە خەباتدا بووم، ئەمەش دەرهاویشتەی بڕاوی پتەوی خۆم بووە بە گرنگیی ئەم ئامرازە خەباتکارانەیە بۆ کرێکاران و خەباتی چینایەتی سەربەخۆیان و بۆ ڕیزی کرێکارانی سۆسیالیستی ناو بزووتنەوەی سەندیکایی.
بەشداربووانی ئازیزی ئەم کۆنگرەیە، چوارەمین کۆنگرەی فیدراسیۆن له توندپێچێکی مێژوویی گرنگ له ڕیچکەی خەباتی چینایەتیی کرێکاران له عێراق و ناوچەکەدا به ڕێوە دەچێت، که کاریگەرییەکانی قەیرانێکی قووڵ و فراوانی کۆمەڵایەتی بەتوندی لەسەر ژیان و گوزەرانی زۆربەی جەماوەر ڕەنگی داوەتەوە، و لە ئەنجامدا شێوە جۆراوجۆرەکانی خەباتی کرێکاران و هەوڵەکانیان بۆ گەیشتن بە داواکارییە دەستبەجێ و ڕۆژانەکانیان و ئامانجە چینایەتییەکانیان بە شێوەیەکی بەردەوام گەشە دەکات. جگە لەوەش کۆنگرە لە بارودۆخی ئەو شەڕە جینۆسایدیەی کە ئیسرائیل لەسەر غەززە بەڕێوەی بردووە، و توندبوونەوەی ململانێ جیۆپۆلەتیکیەکان لە ناوچەکە و ئەگەرەکانی فراوانبوونی زیاتری بازنەی شەڕ، بەڕێوەدەچێت.
ئەوەی کۆنگرە باسی دەکات و پەسەندی دەکات، نەک تەنها لەسەر فیدراسیۆن و پێگەی لە بزووتنەوەی کرێکاریدا، بەڵکو لەسەر خودی ئەم بزووتنەوەیە و گەشەسەندنی دواتری لە جەرگەی هەلومەرج و ڕەوەندە لۆکاڵی و ناوچەییەکان کە دەوریان داوە، کاریگەریی گەورەی دەبێت.
هیوای دڵسۆزانەم هەیە بۆ سەرکەوتنی کۆنگرەکە و پەسەندکردنی سیاسەت و پلانی پراکتیکی و میکانیزمی ڕێکخراوەیی، تا فیدراسیۆن ئامادە بکات بۆ بەجێگەیاندنی ئامانج و ئەرکەکانی بە تەواوی لە قۆناغی داهاتوودا.
لەگەڵ ڕێز و پێزانینی دڵسۆزانە
٢٥ی ژانویەی ٢٠٢٤
