ژانی ته‌نیایی.. ستار ئەحمەد
سبه‌ی ده‌ڕۆی
ده‌بمه هێڵ و
چه‌ند دێڕێكم پێده‌نووسی
حه‌رفێك ناكه‌یت به‌میوانم
وه‌كوو مه‌لێك
له‌بێچووی خۆی جوێبێته‌وه
رۆحم له‌گه‌ڵ تۆدا ده‌فڕێ
دڵم بۆ ژانی ته‌نیایی ده‌كرێته‌وه
كه‌چوونه‌وه
مه‌مخه‌ره نێو
ده‌ریای خه‌می بیرچوونه‌وه
من له‌عومری خۆم وه‌ڕسم
ژوانی تۆ
له‌یادی گڵا ده‌مژێنێ
ره‌نگه به‌بیرتا رابوورم
كسپه‌ی شیعرێكم راتژه‌نێ
ئه‌گه‌ر شه‌وێك
گوڵه ئه‌ستێره‌ی عه‌شقم هه‌ڵوه‌ری
په‌نجه‌ره‌ی سۆزت دانه‌خه‌ی
له‌سووچێكی ژووره‌كه‌تا
جێیكه‌ره‌وه
سبه‌ی ده‌ڕۆی
رۆحم له‌گه‌ڵ خۆتا مه‌به
بۆ چه‌ند ساتێك بمده‌ره‌وه
هه‌تا بتوانم بۆت بژیم
شیعری جوانترو جوانترت بۆ بنووسم
وه‌ك چۆن گه‌ڵا
له‌قه‌دو لاسكی دایبڕن
ده‌ستی نه‌مان هه‌ڵیده‌گرێ
كه‌جێمدێڵی
چاوی وه‌نه‌وز دامده‌پۆشێ
ویژدان له‌ده‌روونما ده‌مرێ
چاوه‌ڕوانم
له‌سێبه‌ری نیگایه‌كتا
به‌خوێنی زامی هه‌ناوم
په‌ڕه‌ی یادت بنه‌خشێنم
عومرێكی نوێم پێده‌به‌خشی
گه‌ر له‌خه‌ونیشا بتبینم
ستار ئەحمەد
•
