خوشکانی ئیسلامیی چۆن پێشوازیان.. لە شیلان عوسمان کرد ؟!.. هیوا محەمەد ئەمین
.. لایەنێك ی جوان و ڕوناك لە ژیانی مرۆڤ دا ؛ بەدەر لە ڕەنگدانەوە و ئەزمونکردنی دنیا ی چاکە و خراپە لە ناخی بیرکردنەوە و ئاکاری مرۆڤ دا ، ئازادییە! ئازادیی فەلسەفەیەکە ، کە مرۆڤێك دەڕسکێنێت بۆ گەیشتن بە کەماڵ ی عەقڵ و مەعریفە و ویژدان ، دواجار ئازادیی هەم فەلسەفەی ڕەوشتە هەمیش هێزێك ی ناوەکیی و عەقڵیی ، کە هەلێك بۆ هێز ی توانایی و داهێنان ی مرۆڤ دەڕەخسێنێت . کاتێك مرۆڤێك ناخوازێت ئەزمونی فەلسەفەیەك ی لەم جۆرە لە عەقڵ و ئیرادەی خۆی دا پیادەبکات ، ئەوا بەسانایی دەبێتە ڕۆبۆتێك ی پڕۆگرامکراو ، کە ناتوانێت ببێتە خاوەنی ئیرادە ، بیرکردنەوە و داهێنانی خۆی . ماوەیەك لەمەوبەر گۆرانیبێژ ی کورد خاتون ( شیلان عوسمان ) ، لەڕێگە ی دەزگاکان ی ڕاگەیاندنەوە بڵاویکردەوە ، کە بووە باڵاپۆش و کۆتایی بە گۆرانیگووتن هێنا ! تاکو ئێرە لەوانەیە کارەکە ئاسایی یان وەك ئازادیی و ماف ی تاکەکەسیی بێتەپێشچاو ، بەڵام ئەم باسە تەنیا بەوەندە کۆتایی نایەت ، چونکە لەلایەك نە لە کۆمەڵگە ی کوردیی و ئیسلامییەکان دا شتێك بوونی هەیە بەناوی مافی تاکەکەسی، نە ئیسلامییەکانیش بە تەنیا ڕاگەیاندنێك ی لەوجۆرە ی خاتون شیلان دڵیان دادەسەکنێت! بەڵکو ئامانج لێرە دا گشتاندن یان چڕکردنەوە و توانەوەی کەس ی تاکی ( تۆ ) یە لەنێو کۆمەڵگەیەك دا کە بە فەلسەفەی ڕەوشت و ئازادیی نامۆیە . بابزانین ئەو هۆکارانەی ، کە بەڕێز خاتون شیلان عوسمان ی بەرەو دنیای باڵاپۆشیی برد چین؟! شڕۆڤە و لێکدانەوەکەی من، حوکومدان نیە کە ئاخۆ کارێك ی باشە یاخود خراپ ، بەڵکو خوێندنەوەیەکە بۆ ئەو هۆکارانە ی کە پاڵ بە کەسێك ی وەك بەڕێز شیلان عوسمانەوە دەنێت کە بەرەو دنیا ی خۆداپۆشین بڕوات! هۆکاری باڵاپۆشیی ئەو تەنیا، کاردانەوەیەك ی فیزیکیی، ئیحساساتیی و هەروەها جۆرێك لە گرێی هەست بە گوناه و ترسە لە یەزدان، ترسێك کە ماڵئاوایی لە ڕوناکیی ژیان و دەڤەرە کۆمەڵایەتییەکەی دەکات، نەك دەرکەوتنی قۆناخێكی فیکریی و مەعریفیی بە ئامانج ی گەیشتن بە یەزدانناسیی و فەزیڵەتێك ی ئەخلاقیی و ئیلاهیی ، لە ژیانی ئەو خاتونە دا: { عەمەلیاتێك ی قورسم هەبوو ، ووتم ئەگەر سەرکەوتو بووم وەعدم بە خوا دا ، کە ببمە باڵاپۆش }. باڵاپۆشبوونی بەڕێز شیلان دەشێت کاردانەوەیەك ی دەرونییش بێت لەبەرامبەر فەرامۆشبوونی ئەو لەنێو ژینگەیەك ی هونەریی لە نێو کۆمەڵگەکەی دا. ئەو هونەری ئەمڕۆ بە بێمانا وەسف دەکات: { من دەمێکە لە بواری گۆرانیی ماندوم، هونەری ئێستا بێمانایە }. کاتێك ئەو دەبینێت کە ئافرەتانێك ی گۆرانیبێژ لەمڕۆ دا هەن ، کە بەشێوەی نیمچەڕووت لە تی ڤی و ڕاگەیاندنەکان دا دەردەکەون و ژیانیان لەسایەی ڕووتبوونەوە دا زامنە ، ئەو ئیتر نائومێدانە دەخوازێت هێڵێك ی جیاکەرەوە ، بەڵام بە کەرەستە ی جل وبەرگی ئیسلامیی لەنێوان خۆی و ئەوانە دا بکێشێت و خۆی وەك ئافرەتێكی جیاوازتر و ئازادتر پێشان بدات: { من لە ٩٥ەوە کاری هونەرییم کردووە ، ئێستام باشترە وەك لە کاتی پێشوو }.
لەوانەیە تاکو ئێرە بۆ ئافرەتێك ی سادە و ساکاری وەك بەڕێز خاتون شیلان کارێك ی ناشایستە ، ناسروشتیی و کارەساتبار نەبێت بۆ خۆی و کۆمەڵگەکەی ، دواجار ؛ ناڕەوا و بێئەدەبییش نابێت ، ئەگەر بگەینە ئەو باوەڕەی ، کە باڵاپۆشیی و عەمرەکردنی ئەو لە دنیا ی بیرکردنەوەی خۆی دا تەنیا دەشێت دنیای و دیدگەیەکی تاکەکەسیی بێت ، کە هیچ سود یان بەرهەمێكی بۆ مەعریفە و باڵابردنی ڕەوشتی کۆمەڵگەی کوردیی نابێت ! دەمەوێت ئاماژە بەوە بکەم ، کە ئیمانداریی و نزیکبوونەوە لە فەلسەفەی یەزدانیی دەشێت تەنیا لە کەشێك ی مەعنەویی و زاتیی ئارام و خۆشۆڕکردنەوە بە ناخ دا ئەنجام بدرێت ، بەڵام دیوی ناسروشتیی مانیفێستەکەی خاتون شیلان ئەوەیە کە لەنێو کەشێکی پڕ ژاوەژاوی دەزگاکانی ڕاگەیاندنەوە ئەنجام دەدرێت ، کە لە دواجاردا خاتون شیلان دەبێتە قوربانیی و نێچیری خوشکانی ئیسلامیی ، دواجاریش و لە بنچینەدا باڵاپۆشیی هیچ پەیوەندیەكی بە ئیمان و یەزدانەوە نیە و یەزدانیش لە هیچ شوێنێك ی دەق ی قورئان دا فەرمانی بە باڵاپۆشیی و سەرداپۆشین نەکردووە ؟! ئیسلامییەکان وەکو هەنگوینیان لەنێو کلۆرەدار دا دۆزیبێتەوە ، هەر زوو ئەم باسەی شیلان عوسمانیان قواستەوە و کردیان بە مانۆرێكی سیاسیی و فیکری ئیخوانیی و بەستنی کۆڕ و کۆمەڵ ، و سازدانی ڤیستیڤاڵ ی ( تاجی شکۆ ). ئەم ڤیستیڤاڵە ، کە لەلایەن ڕێکخراوی خوشکانی ئیسلامییەوە ڕێکخرابوو ، نەك تەنیا مامەڵەی کەسێك ی تاوانبار و تەوبەکاریان لەگەڵ شیلان دا کرد ، بەڵکو سوکایەتیان بە کەسایەتیی خۆی و هونەرە بیست و هەشتساڵەکەی و هەموو ئافرەتێكی ناباڵاپۆش ( سفور ) کرد ، سەرەتا بەم جۆرە شیلان عوسمانیان بە بەشداربووانی ڤیستیڤاڵەکە ناساند: { خاتو شیلان عوسمان کە لە هونەرمەندیەوە گەیشتەوە بە باڵاپۆشیی …. }. بەرنامەی تەلەڤیزیۆنیی ( خاتون ) * لە ڤیستیڤاڵەکە دا ئامادەیە و خاتونی بێژەر بەمجۆرە تاجی زێڕین دەخاتە سەر گۆرانیبێژ شیلان عوسمان: { خوا هیدایەتی شیلان عوسمانی داو کردی بە باڵاپۆش . ماشەڵا ئەو باڵاپۆشیەت لێهاتووە و دەڵێی گوڵیت }. شیلان عوسمان ی کڵۆڵ بەبێ ئەوەی لە مەغزا و قوڵایی قسەکانی بێژەرە ئیسلامییەکە تێبگات ، بەبێ ئەوەی تێبگات کە دنیا و مانای فەلسەفەی جوانیی و گوڵبوون بۆ ئافرەتێكی کورد لە دید ، بیر و جیهانبینیی ئیسلامیی سەلەفیی، ئیخوانیی و داعشیەکانی کوردستان دا هەڵگری وەسفە ناسکەکەی گۆران ی شاعیر بۆ ئافرەت وگوڵ نیە ** ، بەڵکو تۆ وەك ئافرەتێك کاتێك شایستەیی ڕێز و بوون بە گوڵت پێدەبەخشرێت ، کە عەورەتی ئافرەتانەت داپۆشراو بێت ، وەك بڵێیت تۆ وەك ئافرەتێك تاکو ئەوکاتەی باڵاپۆش نیت ، هەموو جەستەت عەورەت و سیمبۆل ی شەیتان و هەڵگیرسێنەری فیتنە و ئاگری بزواندنی شەهوەتی پیاویت؟! شیلانی داماو و دەستەپاچە لە سادەیی خۆی دا لە مەبەستی بێژەرەکەی بەرنامەی خاتون تێناگات، کە ناڕاستەوخۆ ئەو وەك کەسێك ی تەوبەکار و خاوەن ڕابوردویەك ی ناشایستە و دزێوی دنیا ی مۆسیقا و گۆرانیی مامەڵە دەکات.
شیلان عوسمان لەوێ دا ، نەك لە ڕابوردوی هونەریی و ڕەوشتی خۆی و هەموو دنیا ی جوانیی و سەرنجڕاکێشیی گۆرانیی پەشێمانە ، بەڵکو دەگاتە ئەو باوەڕەی کە : { داوا لە ئافرەتان دەکەم کە ببنە باڵاپۆش ، ئافرەتی باڵاپۆش جوانتر و بەشەخصیەتترە لە ئافرەتی سەرڕووت . } . ڕادەی سوکایەتییپێکردنی خاتون شیلان لەلایەن خاتون ی بێژەرەوە دەگاتە ئەو ئاست و ڕادەیە ی کە ناڕاستەوخۆ تێیبگەێنێت کە: باڵاپۆشیی تۆ نەك تەنیا ناتوانێت دڵی خوا ڕازیی بکات و لە گوناهەکانت خۆشببێت ، بەڵکو بۆ دەرکردنی پیسیی ( نجس ) ، سپیکردنەوەی ڕووی خۆت لەلای خوا و پاکبوونەوەت لە گوناهی ڕشتنی ئاوی فەسادی هونەری مۆسیقا و گۆرانیەکانت ، دەبێت زیارەتی ماڵی خواش بکەیت ، بۆئەمەش بێژەرەکە مژدەی بەخشینی دیاریی عەمرەی پێدەدات لەلایەن کەسێك ی موسوڵمان یان ڕێکخراوێكی ئیسلامییەوە . ئەستێرە و ڕوناکیی خۆری خاتون شیلان لەوێ دا ئیدی ئاوا دەبێت کە وەك ڕۆبۆتێكی پڕۆگرامکراوی خوشکانی ئیسلامیی: { حیجاب تاجی زێڕینە دەنرێتە سەرت ، داوا لەو کچانە دەکەم کە موحەجەبە نین و ببنە موحەجەبە}.
کۆتایی
————————————
- ئاماژەیەکە بۆ شیعری ( ئۆپەرێتی گوڵی خوێناویی ) گۆران ی شاعیر .
** ئەم بەرنامە تەلەڤیزیۆنیە لەوەتەی هەیە بۆ جارێکیش نەبووە کە تاوانەکانی داعش و ابو بکر البغدادی بکاتە بابەتێك و تیای دا باسی ئەو تاوانانە بکات کە بەرامبەر کچانی کوردی ئێزدیی کراوە . هێندەی ڕاگەیاندنە ئەوروپیی و عەرەبیەکان لەو تاوانانە دواون ، خۆشکان و باڵاپۆشانی ئیسلامیی کورد هێندەی گەردێکیش ویژدانیان بۆ ئەو کچە ئێزدیانەی کە بوونە سەبایا و کۆیلەی موجاهیدە ئیسلامە فاشیستەکان نەبزوا ، ئەو فاشیستە ئیسلامیانەی کە مامەڵەی کڕین و فرۆشتنیان پێوەکردن و لە بازاڕەکانی نوخاسەی موسڵ و ڕەققە ی سوریا دا ساخیان کرنەوە . لە دانپێدانەکانی ژنی سێهەمی ابو بکر البغدادی ( نور ابراهیم ) لە کەناڵ ی العربیە دا هاتووە : { ١٠ سەبایا ی کچانی ئێزدیی لە ماڵەکەیان دا هەبووە } . یەکێك لەو سەبایانە خاتو ( سیپان خەلیل ) ی کچە کورد ی چواردە ساڵی ئێزدیە و دەڵێت : { ابوبکر البغدادی دەیان جار دەستدرێژیی ناموسی کردووەتەوەسەر }
هیوا محەمەد ئەمین
٣ ی ئازار ی ٢٠٢٤
.
