ئەم شیعرە ناونیشانی نییە.. ستیڤان شەمزینی
بووم بە ژێر فرمێسکی خۆمەوە
خوێن بە لاجانگی شاردا دێتە خوارەوە
رۆژژمێری وڵات خوێناویی بووە
جارێکی تر
خوێن مێژوومان دەنووسێتەوە
گوڵە بۆنخۆشەکانی شار
چقڵی خۆیان پێدا دەچەقێت
تەمومژی مەرگ
ئاسمانی شاری داپۆشیوە
من لە نێو تەمومژی دەقێکدا
بە دوای سەری قرتاوی ئازادیدا دەگەڕێم
ناتوانم لە نێرڤانەی خۆم بێمە دەر
دەمەوێت بڕۆم شەقام بھەژێنم
دەشترسم خوێنی ئاڵم بکرێتە
یەکەم پێکی ئاشتبوونەوەی ئەو بۆقانەی
لە زەلکاوی سیاسەتدا دەقیڕێنن
ئەمڕۆ شۆڕشێکم بینی
خەونی نیشتمانی لەبارچوو
باوەڕ بە گوێچکەکانی خۆم ناکەم
ئەو دەنگە نەسازە مەرگھێنە
فیشەکی نەفامی کوردایەتی بێت
ئازادیی و نان بکاتە نیشانە
باوەڕ بە چاوەکانی خۆم ناکەم
ئەو تابلۆ توێ توێ کراوە
تەرمی چرۆیەکی تازەی وڵاتە
لەگەڵ نزیکبوونەوەی بەھاردا ھەڵدەوەرێت
باوەڕ بەو میھرەجانە خوێناوییە ناکەم
لەسەر شۆستەکانی ئەم شارە
ھەلھەلەی تەفروتوناکردنی جوانی لێدەدا
زۆر دەستەوەستانم
لە کتێبخانەی ماڵەکەمدا دێم و دەچم
وەک ئەوەی حەشیشم کێشا بێت
یان بە خەنجەر بیرکردنەوەم جنرابێت
حەوسەڵەی لادانی پەردەی ھۆدەکەمم نییە
لە ترسی بینینی ئەو بەچکە شەیتانانەی
مەیلی رازاندنەوەی مەرگیان ھەیە
لە ترسی بینینی ئەو دەمامکدارانەی
دەڵاڵی بە خوێنبەربوونی شارەوە دەکەن
لە ترسی بینینی ئەو گوللە ئێسک تاڵانەی
بە پەلەپڕوسکێ لە چەکی ژەنگاوی
ئەھلی شۆڕشی چەواشەوە دەردەچن و
لەشی خۆرەتاو قاژ قاژ دەکەن
لەترسی بینینی
ئەو قاچاخچییە فێڵاوییانەی
نیشتمانیان بە سنوورەکاندا پەڕاندەوە
لە ماڵە دراوسێکاندا ھەڕاجیان کرد
ھەنووکەش کون و قوژبنی شاریان
پڕ کردووە لە دوکەڵی شەرمەزار
دەیانەوێت شکۆمەندیی پێ بخنکێنن
سەرم وەک شاخێکی سەھۆڵ بەستوویەتی
شۆڕم کردۆتەوە بۆ ناو پشکۆی دڵم
ھێشتا ھەڵدەلەرزێت و قسە دەبڕزکێنێ
لەوە دەچێت ئاخاوتنی بیر چووبێتەوە
رەنگە لە جەلادەکانی شار تۆقیبێت
نەیەوێت لە ختوخۆڕایی بکەوێتە
بەر دەستڕێژی ئاگری دۆزەخی تووڕەییان
لە خۆم ناگەم، ھیچ لە خۆم ناگەم
وەک ئەوەی ماخۆلانم گرتبێت
بە کۆڵانەکانی بێ ئۆقرەییدا
ھاتۆچۆ دەکەم
دەمەوێت بڕۆم شەقام بھەژێنم
دەشترسم نەشوەی ئەم خەونە بزێوە
ببێتە مەرامی کۆبوونەوەی قالۆنچەکان
لەسەر مێزی کۆبوونەوەی ئاودەستەکان
دەترسم و دەمەوێت
دەمەوێت و دەترسم
ھیچ ھەڵپەیەکم بۆ ناکرێت
تەنھا ئەوەندە نەبێت
بە کوڵ دەگریم
فرمێسک دڵۆپ دڵۆپ
کوڵمەکانم دەکاتە جۆگەیەکی رەش
شاریش تا کەمەری
لە خوێندا نقوم بووە
خ
و
ێ
ن
١٨-٢-٢٠١١
رۆژی ھەینی – کاتژمێر یانزە و نیوی پێش نیوەڕۆ
سلێمانی – گەڕەکی فەرمانبەران
تێبینی: ئەم شیعرە رۆژی دوای خۆپیشاندانی گەنجانی شاری سلێمانی لە رۆژی ١٧ی شوباتی ٢٠١١ نووسراوە. ئەو دەم لە راڕاییەکی دەروونی گەورەدا بووم، ئایا ببمە بەشێک لە خۆپیشاندەران یان دوورەپەرێزی ھەڵبژێرم؟. رەوتی روودواوەکان بەو بڕوایەیان گەیاندم دوورەپەرێزیی ھەڵبژێرم، لێ بەو ھۆیەوە بە زۆری زۆردارەکی رایانکێشامە نێو بەرەی دژەوە، چوونکە بەرەی ئۆپۆزیسیۆن ستالین ئاسا، ئەو تێزە سواوەیان گەرم دەکردەوە ئەوەی لە بەرەی ئێمە نەبێت لە بەرەی نەیارەکانمانە. ھەرچەند ئەم شیعرەم ھەمان رۆژ نارد بۆ سایتی کوردستان نێت و بڵاوکرایەوە، کەچی ئەوان دەیانویست من بچمە ریزی ئەو ئیخوانیانەی دەستیان بەسەر ناڕەزاییەتەکەدا گرت و بەردەرکی سەرایان کردە گۆڕەپانی تەحریری قاھیرە و نوێژی بە کۆمەڵیان تێدا دەکرد، دواجار وا شکایەوە بکەومە بەرەی بەرامبەرەوە، ھەرچەند ئەوە تاڵترین ماوەیە لە ژیانی تایبەتی مندا.
