غەزەلە نەوتراوەکان.. غەزەلی دووەم و کۆتایی.. ستیڤان شەمزینی
بۆ ناسینی خۆشەویستی من
رابردووی لێڵم مەپشکنە
فاڵ بۆ داھاتووی تاریکم مەگرەوە
سەیری ئەو گڕکانەی ئێستام بکە
لە شیعرەکانمەوە ھەڵدەچێت
لەو بومەلەرزەیەی ھەنووکە ورد بەرەوە
پێنووسی سەرکزم دەھەژێنێت
زۆر جار ئارەزوو دەکەم
کراسی قەترانیی بێھودەیی
لەبەرم داکەنم
بەرگی شاھانەی ئومێد بپۆشم
ھەواڵی مەرگی چرۆیەک
پەشیمانم دەکاتەوە
زۆر جاری تر
ئارەزووم کردووە
یەخەی کتێبەکانی
خۆشەویستی دادڕم
نامەیەکی خۆکوژانە
بۆ شیعر بنێرم
خۆشەویستی
ژنێکی دڵ پڕ لە ھەتاو
رسم دەکاتەوە بە خوری
نیگایەکت
چاوەکانم بێ سەروشوێن دەکەن
بزەیەکت
بە رووبارێکی شەرابدا
رەتم دەکات
بە ئەسرینێکت
شەکری بیرکردنەوەم
تاڵ تاڵ دەبێت
بە یەک ماچت
لەسەر چیای خۆکوشتن
دێمە خوارەوە
ئازیزم
لەنێوان من و خۆکوشتندا
تەنیا و تەنیا
چیرۆکی خۆشەویستی تۆ ھەیە
لە رووخسارتدا
غەمێکی ئەزەلی دەبینم
لە دەستەکانتدا
ماندووێتی کار سەیرم دەکا
لە قاچەکانتدا
ھەنگاوەکانی غەریبی دەبینم
لە وشەکانتدا
سەرەتاتکێی نھێنییەکی مەزن
چاو دەکەم
لە دڵتدا
سێبەری پیاوێکی شەرمن دیارە
بێ ناونیشانترین پیاوی دنیا
ئازیزم دەمەوێت
تا دوا دڵۆپی دەریا
بکەمە مرەکەب
سینگی چی گەڵا ھەیە
بیکەمە لاپەڕە
شیعری ورشەداری
خۆشەویستی تۆی
لەسەر بنووسم
دەستەکانم توند توند بگرە
پێش ئەوەی دەست بخەیتە
نێو ریشی سپی شیعرم
بەرلەوەی پەنجەکانت
بە خوێنی خەونی سەربڕدراوم
سوور سوور ببن
بەرلەوەی دەستی خەم
بخەیتە ژێر تابووتی
ئەو نۆ پیتەی
لە گەروومدا دەخنکێن
خ ۆ ش م د ە و ێ ی
ئازیزم
ھۆن ھۆن ئەشک دەبارێنم
من کە غەریبترین
پەڵە ھەوری نیشتمان بووم
لە کوێ دەتوانم
بەسەر چاوی غەریبیتدا ببارم؟
کەی لەو گۆرانییە
سەرھەڵگرتووە تێدەگەم
بەلێوی ئەم مەنفایەوە
وشک بۆتەوە؟
تاکو زیندوو بم
بیرت لێ دەکەمەوە
دەمەوێت وەک ماچێکی تینوو
لەنێو دوو رووباری سینگت بنووم
دەزانم بە شەپۆلێکی تووڕەدا
وەک بەلەمێکی تێکشکاو
فڕێمدەدەیتەوە کەنار و
لە گۆڕی ھیوایەکی ھەڵوەریودا
دەمنێژیت
من کەوتوومەتە بۆسەی مردنەوە
سەیرە ھێشتا چاو بۆ ژیان دەگێڕم
مۆمی عەشق
لە شەوەزەنگی بێ تۆیدا ھەڵدەکەم!
ئاگری شیعر دەنێم
بە بەرۆکی مەرگەوە
وەک فیشەکێکی وێڵ
بە تەوێڵی تۆوە دەنوسێم
چەند جوانە ئەم چارەنووسە!!
لە ژێر ساباتی رەشپۆشی گریاندا
فرمێسکێکی کۆچەریی دەمناسێتەوە
سەری دەسوڕمێ
چۆن چڵی پێکەنینم شکا!؟
چۆن خەنجەری تەنھایی
جەرگی خەیاڵی پێکەوەبوونی
خەڵتانی خوێن کردووە!؟
ھێندە کەمدووە
ھیچ ناڵێت و بە ئەسپایی
بەروومەتی شیعرمدا دێتە خوار
عەشقی ھوروژمداری من
لە گیرفانی بیابانی ساردوسڕتدا
کاڵ دەبێتەوە
ماچەکانیشم
بەدەم چاوەڕوانییەکی تولانییەوە
دەبنە مشتێک تۆزی بەردەم رەشەبا
ئازارە چرۆکردووەکانم بەر دەگرن
دەبنە ھەڵوژەیەکی تاڵی
نێو شەوە شادەکانم
دەبنە ھەناسەیەکی ساردی
نێو رۆژە گەرمەکانم
