تۆ دوور ڕۆیشتووی، من هێشتا.. نەوزاد بەندی
من هێشتا لەو دەور وبەرە دەسوڕێمەوە ..
تۆ زۆر دوور ڕۆیشتووی ..
هیچ تۆڕێکی تەلەفۆن و ..
ئینتەرنێت ، پێت ڕاناگا ..
من هێشتا لە شەقام و
کافیتریا و
مەیدانەکانی گفت و گۆ ،
دێم و دەچم ..
تۆ سەد بەردت بەدوادا هەڵداوم ..
بە چەقۆیەکی تیژ ،
منت لە هەموو دەمارەخانەکانتا ،
کوژاندۆتەوە ..
من هێشتا بە باخە گشتییەکان و..
بە پارکەکان و ..
بە قاوەخانەکاندا ،
لەسەر مێزێکی دوو کورسی دادەنیشم ..
بە عەقڵی سوکی خۆم ،
هەمیشە دوو قاوە داوا ئەکەم ..
لە ژێر ڕەشماڵی چاوەڕوانیدا ،
وەک ئەو کەشتیەوانە ئاسمانییانە وەهام
کە چاوەڕێی هێمایەک ئەکەن لە ئەستێرە دوورەکانی گەردوونەوە ..
تۆ سەد چارشێوی وونبوونت داوە بەسەرتا …
لەسەد کون ، خۆت شاردۆتەوە ..
هەزار دەریا و زەریای تووڕە بوونت بڕیوە ..
لە هەرچی پیت و وشەی خولیا و تامەزرۆییە زویر بووی ..
لە هەموو بەرەکانەوە ، جەنگت ڕاگەیاند ..
لە هەرچی لووتکەی لەیادچوون هەیە ، منت فڕێداوەتە خوارەوە ..
لە هەموو ئەشکەوتەکانی پەنهانیی خۆت مەڵاس دا ..
من هێشتا لەو گوزەرەدا دەسوڕێمەوە ..
چاوەڕێم بڵێی کامێرای شاراوە بوو ..
من بە ناو ئاپۆڕەی خەڵکا دێم و دەچم ،
چاوەڕێم لە دواوە هەردوو چاوم بگریت ،
بڵێی : هەڵی بێنە ، بزانە من کێم ..
من هێشتا بە تەمای ئەوەم
تکت بڕی ئامانەکە پێم بڵێ :
ئەو خانمە پارەی تۆی داوە ..
بڕوام بەخۆم هێناوە ، کاشێری چێشتخانەکە بڵێ :
حیسابی خواردنەکەی تۆ دراوە ، گەورەم ..
تۆ لە پشت هەورە تاریکەکانەوە ،
بەدوای تیژترین شمشێری بروسکەدا دەگەڕێی ..
لەناو شەپۆلی لافاوەکاندا ، چاوەڕێی ،
قاچم هەڵخلیسکێ و
لەناو قوڕاویی کۆڵانە هەژارەکانا بخنکێم ..
تۆ لەگەڵ کەلەپچە و سندما لە چەند و چووندای ،
بزانی مەچەک و بەلەکم ژمارە چەندن و
بە کامەیان قوڕومچە دەبن ..
من هێشتا چاوەڕێم لە کۆمێنتی ڕۆژنامەیەکدا ،
بنووسی هێندەی هەموو دنیا بیرت دەکەم ..
لە بەرایی تیکتۆکا بنووسیت ،
به هیچ هێزێ ، ناتوانم دەست بەردارت بم ..پاشاکەم ..
هێشتا بە تەمام ، بە کوپێ قاوەوە ،
لە پڕ بێیتە سەر مێزەکەم ..
چەپۆکێ بکێشی بە شانما و
بڵێی : تۆ غەریبیت داهێنا ، لەم شارە ، بەساقە !
بڵێی : هۆگربوون ، تۆ لەناو شەقامەکاندا نوسیتەوە ..
من هێشتا ، بە ساویلکەیی خۆم ، لەو باوەڕەدام ،
بەیانییەک بە دێلیڤەریی ، ڤیزەی
ووڵاتێکی بەفراویم بۆ ئەنێری ..
ئەڵێی سبەی شەو لە فڕۆکەخانە ، چاوەڕێتم ..
تۆ هەموو بەنداوەکانت بەسەرما تەقاندەوە ..
کۆتری هەموو گومەزەکانت هەڵفڕاند ..
هەموو کوکوختییەکانت شەواره کرد ..
هەرچی درۆن و ڕۆکێتە ،
له ئاسمانی منا ، داتمەزراند ..
تۆ هەرچی ووشە و پیتی نێوانمان بوو ،
پاشەکەوتت کرد ..
هەموو شاندەکانت گەڕاندەوە ..
پەرلەمانت هەڵوەشاندەوە ..
باڵوێزەکانت لە هەموو ووڵاتەکان کشاندەوە ..
وەزیرەکانت یەک لە دوای یەک ناردەوە بۆ ماڵەوە ..
هەموو پردەکانت تەقاندەوە ..
قوتابخانەکانت داخست و ..
مامۆستاکانت هەمدیسان تۆراندەوە..
قاچاخچییەکانت وا لێکرد هەموو نیشتمانی شیعرم ،
بخەنە ناو یەختێکەوە و
لە زەریایەکی نەناسراوا ، نوقمی کەن ..
من هێشتا چاوەڕێم عەسرێ ،
ئوتومبیلێ لە تەنیشتما ڕاوەستێ و
باسکێکی بلووری و
دوو تکتی فیلمی ئەدڤانچەری لێ بێتە دەرێ ..
بڵێی ، سەرکەوە هەموو شتێکم ! ، سەرکەوە ..
دوو سەعات با ئەکتەرەکان تەماشامان کەن ..
من هێشتا بە ساویلکەیی خۆمەوە ،
نیوە شەوێ لە خەو ڕائەبم ،
ئەڵێم تۆ بڵێی ئەو نەبێ ،
وەک لۆرێنزۆ ، لەبەردەرگا وەستابێ ؟
بە تەمام پرسگەی فەرمانگەکەم ،
بڵێ کەسێک چاوەڕوانتە ، لە ژێر دارگێلاسەکەی ئەوبەر ..
بە تەمام دایکم پێم بڵێ :
کەسی وا باشت لە کوێوە ناسیوە ، کوڕم ..دوو ڕۆژە بە باوەشێک گوڵەوە دێ ،
ئەڵێ هەنگەکەت لێم زیزە ، خانم !
من هێشتا له ژوورەکەت نەڕۆیشتووم ،
ئەبم بە هەڵم و پەنجەرەکەت دائەپۆشم ،
هیچم لەسەر نانوسی ..
لەسەر مێزەکەی ژوور سەرتا ،
مۆمێ دائەگیرسێ ، منم ، لە ڕوناکییەکەما هیچ ناخوێنیتەوە ..
لەگەڵ پانکەی بنمیچەکەتا ، ئەخولێمەوە ،
خۆت دائەپۆشیت تاکو شنەی منت بەرنەکەوێ ..
قەیتانی ناو ڕۆمانەکەی بەردەمتم ..
ئەمپچڕێنی ، ئەڵێی قەیناکا با لاپەرەکەم لێ وون بێ ..
من هێشتا لە سەربانی ژوورەکەت دێم و دەچم .. تەلەفۆن بۆ 114 ئەکەی ، ئەڵێی دزێک لە سەربانی ماڵەکەمە ، خێرا وەرن ..
لە باخچەی حەوشەکەتان ،
ئەو مینایە منم .. لەناو ئینجانەی ڕێڕەوەکەتا ، گەڵا تۆخەکەی گوێچکە فیلەکە ، منم .. لە دەرگای سەلاجەکەتا ،
ئەو پەرداخە ئاوەی کە هەر گەرمە ..ئەو سەوزەیەی لق و چڵەکانی شێواون .. ئەو گوڵدانەی تۆزی لێنیشتووە ، منم …
تۆ دوور ڕۆیشتووی .. من لەوێم ..
دووربینێ ، ناتدۆزێتەوە ئەمجارە ..
تەنانەت لەگەڵ ڕەشەبایش نایەیتەوە ..
هیچ هەورێ ناتوانێ قۆڵت ڕاکێشێ ،
پەڵەی ساڵێکت پێ ئیمزا کا ..
تەنانەت باڵندە کۆچەرییەکان ،
ناتوانن بارکۆدی هەنگاوەکانت تێبگەن ..
پۆلیسەکانی سەر سنوور ،
لە هیچ جوڵەیەکت ئاگادار نین ..
من هێشتا وەکو ئاڵودە ،
لای فرۆشگاکانی یادگاریی هەڵکورماوم ..
وەک سمۆرەی زستانێکی ڕێبەندان وام ..
تیشکەکانی خۆر .. تریفەکانی مانگیش دیار نین …
ئەو درەختەی لە پەنجەرەکەوە ئەیبینی ، منم ..
تۆ وەک گێژەڵوکە ڕەت ئەبی ..
ئەو بۆڵە ترێیانەی لە ژێر کەپرەکەدا ووشکبوون ..
ئەو زریانەی پاپۆڕەکان نوقوم ئەکا ، تۆی ..
خاڵخاڵۆکە مردووەکانی سەر تاقەکان ، منم ..
سەبحەبەحە لق شکاوەکانی سەر شەقام ..
شەڕە چەقۆی نیوە شەوان ..
دەنکە شەونمەکانی سەرشانت ..
مینە چێنراوەکانی ناو مەزرا ..
کۆلاره خەمگینەکانی ئێواران ..
سنەوبەرە سووتێنراوەکانی قەراغ شار ..
ماسییە ڕەنگا و ڕەنگەکانی ناو کەمۆڵەکان ، منم ..
شاخە بڕاوەکانی شار ، ڕقی تۆ ..
برینەکانی فیشەک ، من ..
فیشەکەکانی ناوەندی برین ، تۆ ..
تۆ … دوور ڕۆیشتووی ..
من …هێشتا …
نەوزاد بەندی
