چرکە ئیرۆسییەکان.. ستیڤان شەمزینی
ئەمە یاسایەکی ماتماتیکیی کۆنە
ماچێکی من لەگەڵ ماچێکی تۆ
یەکسان نییە بە دوو ماچ
نا، دەکاتە یەک ژوانی ئیرۆسی
ھەر لێدەرکردنێکی تۆ لە من
ناکاتە خودی خۆم بە تەنھا
نا، یەکسانە بە ھیچ
ئەمشەو پێکەوە دەخۆینەوە
من ئارەقی ئۆزۆی گریکی نۆش دەکەم
خۆم دەبینم لە یەکەم پێکدا مەست دەبم
بە تیلەی چاو سەرنجی تۆ دەدەم
ماچەکانم دەخەیتە پەرداخی ھەوەسەوە
تاکو مەستبوون لێی دەخۆیتەوە
ئەمڕۆ وەڕس بووم لە خۆم
سیگارەکەم کوژاندەوە
خەمە جاویدەکانم یەک یەک داگیرسان
لەناکاو زەنگی تەلەفۆنەکەم لێیدا
ژنێک وتی ئەمشەو بە دوو شیلانەوە
لەناو پێخەفەکەتدا رۆژ دەکەمەوە
چەند سەیر لێوەکانم داچڵەکین
غەمەکانم کلو کلو توانەوە!!
دەتەوێت کراسم لەبەر داکەنیت
نامەوێت خۆم رووت بکەمەوە
نامەوێت لەژێر کراسە سپییەکەمەوە
برینێکی گەورەی رەش ببینیت
تۆ ئینکاری دەکەیت
منیش خۆم رادەست دەکەم
دەست دەھێنیت
بە مووی سەر سینگما
شوێنەواری ھیچ برینێک
دیار نامێنێت
لە قەرەقولێکی تورکان دەستبەسەرکرام
ھیچ ناسنامەیەکم لە باخەڵدا نەبوو
پێیان گووتم ناوت چییە؟
بە رەوانی وەڵامم دانەوە: عیشق
گووتیان بەرزیی باڵات چەندە؟
کەمێک راوەستام و گووتم
مەترێک و حەفتا و سێ ماچ
ئەوسا وەک شێتێک ئازادیان کردم
پۆلیسەکانی دەوڵەت
بەدوامدا دەگەڕان
بە تۆمەتی کۆمۆنیستبوون
لە کۆڵانێکی تەنگی شاردا
دەستگیریان کردم
لەبەردەم دادوەردا ھاوارم کرد
بە پرچی شۆخە ژنێکەوە ھەڵمواسن
بە ماچی ژنێک
حوکمی خنکانم بدەن
لەژێر داروپەردووی حوزنێکی ئاڵەوە
تا چاوم روون دەبێتەوە
تەماشات دەکەم
لە ورشەی گەڵای پێکەنینت دەڕوانم
سەرنجی درزی نێوان
ھەردوو مەمکت دەدەم
لە خۆم ورد دەبمەوە
لە دەمی رژانت
بەسەر لەشی رووتمدا
دواجار بڕوات بەوە ھێنا
مانگ لە دەریا دەپاڕێتەوە
سەبەتەیەک تریفەی
بە دیاری لێوەربگرێت
چرا تکا لە شەوەکان دەکات
تۆزێ کلی رووناکی بکاتە چاویان
شیعرەکانم بە شەرمەوە
تکات لێ دەکەن
لە باوەشمدا رووت بیتەوە
ئەگەر ئێمە یەکتر ماچ بکەین
بارانی بۆندار
زەوی دەکاتە شوشەیەک عەتر
رووباری حەسرەت
سەرەوڕێژ دەبێ
لە ماسی خۆزگە
بێزاریی لە چەمی خەندەدا
خۆی دەشوات
ژیان بە توندیی دەرگا
لەسەر مەرگ دادەخا و
تابووتەکان لە داخدا
خۆیان دەکوژن
ئێستا لە نەخۆشخانەم
بۆنی مردن
لە راڕەوی سەرەکییەوە دێت
چەندان رۆژە مەرگ
لە نزیکەوە خۆیم نیشان دەدا
ئەوەی داڵغەی منی داگیرکردووە
مەرگێکی تەنھا نییە
لە بەیانییەکی پڕ ژاوەژاودا
خەریکم
بیر لە دیمەنی
رووتبوونەوەی تۆ دەکەمەوە
لە بەردەم شەوقی شیعرێکمدا
رەنگە ئەوە وابێت
رۆژێک تۆ
لە شیعرەکانمدا نقووم بیت
یان لەژێر ماچبارانی
مندا بخوسێیت
رەنگە بەو جۆرەش بێت
شەوێک من
لە باوەشی تۆدا نغرۆ بم
لە ھەژانی ئارەزووتدا
سەر ئاو بکەم
لە ھەنووکەوە دەڵێم
ھەردووکیانم قبوڵە
ھەمیشە جلوبەرگم پێ گرنگە
من کراسی گوڵگوڵی شیعر و
کورتەک و شەرواڵی
موسافیرێکی ونبووم لەبەردایە
کڵاوی غەمێکی قووڵیش لە سەرمدا
پێم خۆشە تۆش
بە تەنورەیەکی کورت چەشنی ھایکۆ
ستیانێکی پەمەیی لە رەنگی سۆزم
بێیتە سەر سیسەمی ژوانم
شمشاڵی ماچە تەڕەکانت
بە لێوەکانی من نەبێت ناژەنرێن
گیتاری مەمکە بەپێوە راوەستاوەکانت
بە پەنجەکانی من نەبێت لێ نادرێن
تۆوی گوڵی لەززەتی شەوانت
لە ئینجانەکانی مندا نەبێت ناڕوێن
رەنگە پێت سەیر بێت
گشت شادمانییەکانت
لەلای من کۆبوونەتەوە!
جەنگەکان
کوڕە گەنجەکانیان برد و نەگەڕانەوە
رووبارەکان
داڵغەی بەلەمەکانیان برد و
پێیان نەدانەوە
پیریی، ھەرمێی لاویی رفاند
ئاوی ئاموون قووتی دا
چەکەکان
رەنگە تۆخەکانی ژیانیان برد و
نەھاتنەوە
لەشی رووت و
مەمکی پڕ جریوەی تۆ
ھەست و ھۆشیان منیان برد و
ھەرگیز نەمبینینەوە
لەناو کاسە سەری مندا
ژنێک سەما دەکات
لە بری شیعر
دڵی شاعیرێک دەدزێت
لە بری زەردەخەنە
فرمێسکەکانی ھەڵدەگرێت
ئەو ژنە
ھەموو کاتێک گۆرانی دەڵێت
لە ھەموو بەستەکانیدا
شاعیرێک بانگ دەکات
تا درەختی لەشی
تێر تێر ئاو بدات
ئای چەند حەز دەکەم
ئەو شاعیرە من بم
شەوانە خەونی زۆر دەبینم
ژنێک دانە دانە
خەونەکانی تەفسیر کردم
وتی، راکردنت بە دوای ھەوردا
لێزمەی ماچەکانی منە
باوەشکردنت بە تریفەی مانگدا
بریسکانەوەی مەمکەکانی منە لە دەستتدا
توانەوەت لە دەمی فریشتەی خەیاڵدا
نیشتنەوەی روانینتە
لەسەر لەشی رووتی من
