بوومەڵێڵ.. شیعری شاهۆ حوسێنی
لە تەمتوومانی تەمایک و
وەنەوزی نووزەیەک و
زەردەی زراوێک
لە سەرەمەرگی خۆمدا
لەگەڕەکێکی قیرتاوی شەوێک
چریکەی چاوم چرکاندی و
دەمم بە گۆپکەی مەمکی ئەم جیهانەوە نا
من لەگەڕەکی گەڕۆکەکانی ناو شار و
لە هەراوترین ناو هەراو هوریای خەفەتا
بەگریاناوی‌ترین چاوی گەڕاودا
بڵیند بڵیند باڵام کردوە
سەرم بە سەکۆی پەنجەرەی نیگای
کۆڵانا داکردوە و
قاپی نیگام
لە تەمەننای مانای مانێکا پڕ بوە
من نیوەڕۆی ڕۆڕۆیەکم لەگەروودا
ئاوێنەی ئەوینێکی شکاوم لە دڵدا
خەونی خەندەیەکم لەسەر لێوە و
ماسی ماچێکم لەسەر گۆنا خنکاوە
زەروودیی زەردەیەک لەسەر لیوم زاوە
لەمندا
جانووی جەوانی دەکورێنێ
کە لەهەلدێرگەی ژانی ژینێکی وەخێرنەگەڕاودا هەڵدێردراوە
لاقەکانم
پنگی ڕێگایەکی نەپێواویان بە لاقەوە
دەستم
تاسەی ملێکی لەئامێزنەگرتووی هەر بە دەستەوە
جەستەم
شەکەتی ژیانێکی ژاواناوی هەر بە جەستەوە
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
