چەند تابلۆ شیعرێ.. شیعر/ کاوە عوسمان عومەر

سەرسامم بە جەستەی ئاڵتونیی پایز
گەرچی لاوێتیم تا هەتا هەتا نیە
سێرگی یەسێنین
(١)
لە سوچی ژورێکی
سارد و تاریکاو ڕزیوا
گەنجێکی بێهیوا
لولەی دەمانچەی ڕەش
وەک لێوی ژەهراوی کوژەری مار
نێوان هەردوو لێوی ووشک و لەرزیوا
گیرکردوە

(٢)
لە بالکۆنێکی جێهێڵراودا
ژنێک ، دڵێکی
نەخۆش و لاوازو
سیسبووی خۆی
بە دەنکە شقارتەیەک سوتاند

(٣)
لە ژێر پردێکدا
منداڵێکی برسی
دەست و پێ تەزیو، هەڵهاتوو
لە جیهانێکی ترسناک و مەترسیدارا
لە ژێر ئاسمانێکی
بێهاناو بێهودەو بێمانادا
چاوە گەشە ڕەشەکانی
بۆ ڕۆژێکی نوێی تری
پڕئازارو ئەشکەنجە لێک نا
(٤)
لە باخچەیەکی جێهێڵراوا
کۆمەڵە لاوێکی بێ لانەو
بێ نیشتمان
دووپارچە سەموونی کۆن، چنگێ
شیعری هەناسەسارد…و
چەند پەرتوکێکی
زەردی یاخیبونیان
لە نێوان خۆیانا بەش کرد

(٥)
لە ژێر چەتری فڕۆشگایەک
مۆسیقاژەنێ
کەمانچە شکاو
نۆتا دزراو
ڕۆح لەخاچدراو
جگەرەیەکی داگیرساند
قومێ دوکەڵی پڕ هەناسەی غەمگینی
ناردە نێو هەوای نائومدێدی شارێک
بە گریانی سووری هەورەکان
پرسەی مەرگی مرۆڤە نامۆکانی داناوە

وێنەکە کارێکی هونەری فۆتۆگرافەری قوبرسی
Dimitris Vetsikas
بە سوپاسەوە لە پەیجی فەرمی خۆی وەرگیراوە

شیعر/ کاوە عوسمان عومەر

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.