Skip to Content

یەک سەعات دوای عاشقبوون یەک سەعات پێش مردن.. شیعری: ستیڤان شەمزینی

یەک سەعات دوای عاشقبوون یەک سەعات پێش مردن.. شیعری: ستیڤان شەمزینی

Closed
by December 27, 2021 General, Poems

عەشقت

عەشقی تۆ بوو
دەستی لە من وەشاند
شێتانە و بێ ئامانج رێ دەکەم
ناگەمەوە بە هیچ
جگە لە خەمەکانی خۆم
ناگەمە هیچ کوێ
جگە لە جەهەنمی خۆم
من مانگەشەوی تۆ
وێڵ و شەیدای کردم
نەمزانی ئەو هەموو
لاواندنەوەی من
وەک وەڕینی سەگ لێکدەدرێتەوە
ئیتر من ئەڕۆم
مۆمی تەمەنم
بەدەستی خۆم ئەکوژێنمەوە
چاوی چرای بینایم
کوێر ئەکەم
عەقڵم رەوانەی
شێتخانەیەک ئەکەم
هەستەکانیشم
لە گۆڕێکی تەنگ و تاریکدا
بە خاک دەسپێرم


هەرەس

ئەو دەمەی
وەک شاخێکی بەفرین
هەرەسم هێنا
تۆ لە ماڵی خۆرەوە
لە پەنجەرەی خەمەوە
لێت ئەڕوانیم
ئەو ساتەی لە ئامێزی غروبدا
وەک تیشکی رۆژ
کەوتمە دەریای ئازارەوە
تۆ لەگەڵ کازیوەدا
وەک خانمی سوورپۆش
بێهودە لە چاوەڕوانیما بوویت
من ئیتر بە تۆ ناگەمەوە
بەڵام تۆیت
فریودراوی وەهمەکانی خۆت
لە کاتێکدا، من
وەک خەیاڵێکی کورت و خۆش
هاتمە نێو
شەوە کابووسییەکانتەوە
هەر تەنها جارێک هاتم و
هیچ کات دووبارە نابمەوە


ئەڕۆم

من ئەڕۆم دواجارە گوێتان
لە نرکەی شیعرەکانم بێت
دواجارە ئازارەکانم ببیستن
ئەیدەم بەدەم رەشەبای سەفەرەوە
دواجارە ژوانتان لەگەڵ ببەستم
یادگاریی هەموو ژوانەکانم
ئەچنە بیری بێ بنی بیرچوونەوەوە
دواجارە من لەسەر رێی
ئەم گۆمە تەڵخەی ژیان ببینن
سەفەر ئەکەم، سەفەری بێ گەڕانەوە
بەرەو دوورگەی تەم و ونبوون
بەرەو باخچەکانی عەدەم
بەرەو هیچ


لێم ببوورە

ئەی نیشتمان لێم ببوورە
قاچەکانم هێزیان تێدا نەماوە
پیاسەیەک بە باخەکانی
رۆحتدا بکەمەوە
لێم ببوورە ئەی نیشتمان
بینایی چاوەکانم
کوێر بوونەتەوە
ناتوانم نیگا گەرمەکانم
لە کانیاوەکانت بگرمەوە
لێم ببوورە ئەی نیشتمان
دەستم چیتر
قەڵەم ناگرێت، تاکو
شانامەی سەربڵندیت بنووسمەوە
لێم ببوورە ئەی نیشتمان
هەناوم پڕ بووە لە گڕی غوربەت
چیتر ناتوانم
لێوی وشکم لە چەمی لێوی
کچە چاو قەترانییەکانتدا
تەڕ تەڕ بکەمەوە


بۆ “تاڤێن”ی کوڕم

دوای من نەهێڵیت
ئەو مەشخەڵی شیعرە
خامۆش بێت
دوای من نەهێڵیت
ئەو کانییە روونەی عەشق
لێڵ و کوێر بێتەوە
دوای من نەهێڵیت
ئەو خەونە جوانانە
پڕ بکرێن لە کابووس
دوای من نەهێڵیت
ئەو کۆترە جوانەی ئەوین
لە ئانی فڕیندا بکەوێتە خوارەوە
دوای من نەهێڵیت
ئەو پەرستگا پیرۆزەی دڵداری
بە رەهێڵەی درۆ بڕوخێ
دوای من نەهێڵیت
ئەو رووبارەی رۆژهەڵات
بەرەو باشوور لە رۆشتن بکەوێ
دوای من نەهێڵیت
گەڵای هیچ درەختێکی
ئەو باخچە رووخۆشەم بوەرێ


خەون

دوێنی شەو
بە کراسێکی تەنکی پەمەییەوە
هاتیتە خەونم
مەمکە هەنارییەکانتم
توند توند گووشی
تک تک
هەناراوی چێژمان
بەسەر یەکدا ئەباران
لێوەکانت پشکۆی داگیرساو بوون
لە نێو چەمی دەمی منا
خۆیان فێنک کردەوە
لەشت هێندەی رنوە بەفر
ناسک و تەزیو بوو
بە خۆرەتاوی جەستەی من
ورد ورد توایەوە
ماچەکانت منیان
لە فێی تەنهایی
ئارام ئارام کردەوە
لێوی حەزیشم
لە سێوەکانی سینگت
گیر کردبوو
لەو خەونە خۆشە
هەرگیز بێدار نەبوومەوە


تریفەیەک لە عەشق

تۆ هەروەک ئەو شەرابەی سوورەی
لەگەڵ یەکەم پێکدا
مەستم ئەکەیت
مەستبوونێک تا ئەودیو
سنوورەکانی لەزەت
تا باخچەکانی نێو
پرچە رەشەکەت
تا مژینی قۆخی گۆنا و
تامی ماچی مرەباییت
تا سەرخەوشکاندنێک
لە بناری مەمکەکانتا
تا شۆڕبوونەوە
بە سنەوبەری ئارەزووەکانتا
تا سەماکردن لەبەر
باراناوی جەستەمان
کە دڵۆپ دڵۆپ ئەبارێت
تا گووشینی نەرمایی ران و
خواردنەوەی هەناسەیەکی گەرمت
بە دەمی پڕ لە ئاوبووی حەسرەتم
تا توانەوە لە ژێر
لێفەیەکی سوورباو و
لە دایکبوونەوەیەکی تر
لە رامووسانی یەکتردا
ئاه تۆ ئەو شەرابە سوورەی
خوێنم رەنگی گرتوویت و
لە ئامێزی نێرگزیتدا
کوڵ و کۆم دائەمرکێتەوە


شەوێکی ئیرۆسی

شەوێک دێم ئاونگی ژنێتیت ئەخۆمەوە
لە نێو خەیاڵی حەزە ئیرۆسییەکانما
تاجی شاژنت لەسەر ئەنێم
لەسەر عەرشی رامووسان و ئاوێزانبوون
وەک ئیمپراتۆرێک ناوت ئەهێنم
لە پەرستگەی هەمیشەی ئاوەدانی دڵمدا
وەک خودای جوانی سەرت بۆ دائەنەوێنم
لە ماچستانی مەمکە لیمۆییەکانتدا
بۆ ئەبەد خۆم لە بناریاندا ئەگەوزێنم
لە باوەشی پڕ لەززەتی هەردەم بەهارتدا
بە چەشنی بولبول بۆ دڵی نەرمت ئەخوێنم


عاشقی ژنێکم

ژنێکم خۆش ئەوێ
هەر کاتێک باسی کۆتایی دەکەم
ئەو سەرەتایەکی ترم نیشان ئەدا
سەرەتایەک لە چڕینی گۆرانی
بۆ خوێنی شەپۆلە کوژراوەکانم
سەرەتایەک لە هێورکردنەوەی بارانەکانم
لە نێو باوەشی بەهاریی خۆیدا
سەرەتایەک لە ژەنینی تەمبور
لەسەر تەرمی خەونە بزربووەکانم
سەرەتایەک لە سڕینی ئەسرینەکانم
بە ئاوریشمی ماچە تامەزرۆکانی
سەرەتایەک لە خوێندنەوەی
لاپەڕەکانی رۆژانی تەنهاییم
سەرەتایەک لە راگرتنی ئاوابوونم
لە نێو هەتاوی پرچی خۆیدا
من عاشقی ئەو ژنەم


مردن

ئەوکاتەی ئەمرم
مەلێکی گەڕۆک تەرمەکەم ئەناسێتەوە
ئەڵێت، ئاه خودایە
ئەمە کوڕی ئاسمانی ئێمە بوو
بەرەو ئاسمانێکی تر فڕی
وا بزانم ئاسمانی عەشق بوو
لەوێ پێش ئەوەی
بگاتە بەهەشتی باوەشی یار
راوچییەکی سەرشێت
کە ناوی دڵشکان بوو
گوللەیەکی لە دڵی دا و
بەر بووەوە سەحرای مەرگ
ئاه خودایە
چەند بەدبەخت بوو!


Previous
Next