Skip to Content

وەرزێکیتری سەراب دادەگیرسێنم.. شەماڵ بارەوانی

وەرزێکیتری سەراب دادەگیرسێنم.. شەماڵ بارەوانی

Closed
by December 27, 2021 General, Poems

من عاریفانە خۆشم ویستی
ئەفسوس
تۆ وەک ژەنەڕاڵێک ناپاکیت لێکردم

تازە
کتێبی تەمەنم تەواو بوو
من جگە لەلەتێک یەئس
و
سەتڵێک فوغان
چیترم نەماوە

بۆچی دێیت
دوای ئەوەی گۆچانێکی ماندوو
هات و لێواری ڕستەکانی گەنجێتی
پڕکردم لە ئیعرابی پیری

دوای ئەوەی
دارستانی وشەکانم
ڕەنگی بیابانێکی داماویان گرت

دوای ئەوەی فەهرەستی
مەراقم
خاڵی بووەوە
لەمەجاز
و
ئیدیۆمی ئۆقرەییم
ئاوس بوو بەژان

دوای ئەوەی
مەوسمی خەونەکانم
پڕبوون لەخەمی هەراش
لەهێشووی هەڵوەرین
لەبەڵێنی شەهیدکراو

دوای ئەوەی
گەڵایەکی تەماشام
نەما بۆ ڕوانین
و
پایز بوو بە ناسنامەی شیعرەکانم

دوای ئەوەی
درۆکانت
ئیفلاسیان کرد
و
بەرماڵی عیشقم
تژی بوو لەکفری فیراق

تازە کات درەنگە
ببورە
من ئیتر
هەموو پێکەنینەکانم
لەتابووتی گریان
مۆمیا دەکەم

وەرزێکیتری سەراب دادەگیرسێنم
و
دۆسیەی دڵپاکیم
دادەخەم

ببورە
من دەڕۆم و
هەموو خەونە دڵشکاوەکانم
دەبەمەوە عەدەم

دەڕۆم و
ئارشیفی
حوزنە کاڵەکانم
دەبەمەوە
بۆ دەڤەری دەهری بوون
بۆسەر نەسلی خۆڵەمێش

چیتر میزاجی
لۆژیکی دۆڕانم نەماوە

دەڕۆم و دیالیکتیکە تەواو نەبووەکانی
عیشق
و
پاشماوەی ئازارە هەڵکڕووزاوەکانم
دەبەمەوە
بۆ سنووری فەنابوون
بۆ دەڤەری خنکان

Previous
Next