قەشەنگترین نەفرەت.. شیعر/کاوە عوسمان عومەر
سوتان بە حەزی عیشقێکەوە و بێ دەنگ بیت لێی
چی تراژیدیایەکی مەزنە بەسەر خۆمانا دێنین
گارسیا لۆرکا
ئای لەو رۆژەی
دەستبەرداری گزنگ و
عیشق و زەریا بووم
ئیتر ئەی وەرزە
تێپەڕیوەکانی تەمەن
بێباکم لە گریانی بێ هەودای
هەورەکانی پایز، لە سوتانی
دارستانە تەنیاکانی هاوین
لە خوڕەی مێرگە سەوزەکانی بەهار
لە تەزینی پەنجە
نازدارو ناسکەکانی
قەدو پەلی ئەو دارانەی
وەک کریستاڵ
بەسەر چۆگە بەستوەکانی ڕۆژەکانما
شۆڕبونەتەوە
دەزانم
دەکرا ڕۆژگارەکانم
قەشەنگ تر بونایە
لە خاچدام
لە بەردەم میحرابی بەزەیی
خانمێک لە گڕو کڵپە
بە بەزەییانە تر بوایە
لازوردی دڵ پەمەیی ترو
زایەڵەی گیتاری ڕۆحم
سازگار تر بوایە
ئای !دەروازە ڕەوشەنکراوەکانی
ئەو ئێوارانەی
بە نێو ڕێڕەوە بەردە مەڕمەڕیەکان
بە چرایەکەوە
بەرەو کەنارە تەمهەڵگرتوەکان ڕێگەم ئەگرت
شەوان وەک سۆفیەکی سپیپۆشی
ڕوخسار پڕ لە نوری عیشقی پیرۆز
ئارامم ئەگرت
بە دوای سۆراخی تارمایی
شازادەیەک
لە نێوان ڕاستی و ناڕاستی
نیوە شەوێکی زومردی دەر ئەکەوت
ئای لەو ڕۆژانەی
کە ئارەزووی ئەبەدیەت
لام وابوو
وەک کانیەکی بە خوڕ
لە ناخما ووشک ناکات
گەرچی هیچ گوڵێک
وەفای بۆ چنگێ خۆڵی عاشق نەبووە
هیچ ئەفسوونێکی هەڵهاتن
بەرەو شاڕێیەک
لە شادومانی ڕەها
تا سەر نەبوو، ئەفسووس
لە تێکڕای هەموو ئەو پەلکەزێڕینە بەهەشتیانەی
بزە و خەندەکانی ئەوی ئەهێنا
کوا ئاسەواری
خەڵوەتە غەمگینەکان
لە بەردەم نووری هەموو ئەو مانگە شەوانە
ڕوخساری خەمناکمی تارا پۆش ئەکرد
جوانی مەلەکانی سەرگوزشتەی ژوانێکی
نێو گێژەنەو سەرابی سەفەرێکی دوریش
تابلۆیەکی بێهودە بوو
چەند گەمژەیی بوو
واتێبگەیت
یاری شیعر
و حیکایەتە بە چێژەکانی منداڵی
لە نێو گژو گیای ناسکی
ژێر زیوە بارانێ
تا هەتا هەتا بمێنێ
ببینە ئەی بەخشندەیی
جێپێی پڕهەورازی نێو ئاگری بریسکاوی
چیای تەنیاییم گرتوە
ئەم بەندەرە ئەرخەوانیە
دوا مەنزڵگەی وونبوونمە…و
دوا مەشخەڵی زەردەپەڕێکی دڵپڕ
بە کۆچی نەورەسە عاشقەکانم هەڵگرتوە
دەزانم ژیان جارێکی تر
هەلێکی تری وونبوون و
سەرەڕۆییەکی ترم ناداتێ
منیش بێباکم
بە کاتژمێرە لمینەکەی تەمەنی وەریوم
ئەوەتا، لە بەندەری تەمهەڵچنی ئەمشەوی سەفەرا
ستایشی یەک بە یەک
لە بیرەوەریە فرمێسکاویەکان ئەکەم
دەزانم لە بێ سۆراخی ئەوێک
لە تەم وخەیاڵ و سەراب
سەرهەلگرتن
مەسترین وونبوون..و
قەشەنگرین نەفرەتە
وێنەکە کارێکی هونەری فۆتۆگرافەر بەریتانی
Lee Watts – Lees Design
بە سوپاسەوە لە پەیجی فەرمی خۆی وەرگێراوە
شیعر/کاوە عوسمان عومەر
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
