دوا لێکۆڵینەوە.. شیعر\ نەوزاد بەندی

بە باخچەکاندا گەڕام ،
نەک له باخێ ڕوا بی ..
کە پاییز‌ هات دێمەوە ،
نەک له بەهار تۆرا بی !

٭ ٭ ٭

خۆ ئەزانم هەندێ جار ،
خۆت دیل ئەکەی لە خۆتا
وەک جۆرێک لە خۆکوژیی ،
وەک کۆچێکی بێ کۆتا ..

٭ ٭ ٭

تەنها من بۆت ئەگەڕێم ،
بێ شوێن پێ ..بێ ناونیشان
نە جارێکیش‌ بینیومی !
بۆ سۆراخت ، پەرێشان ..

٭ ٭ ٭

ئەڵێن چۆن نەتبینیوە و
بە دوایشیدا ئەگەڕێی ؟
ئەی کێ ئەدۆزیتەوە ،
نایناسی و نازانێ کێی ؟!

٭ ٭ ٭

ئەڵێم بینین ، تاوێکە ،
زۆر زوو کاڵ ئەبێتەوە ..
وێنە دێ و وێنە ئەڕوا ،
یەک جێی ئەو ئەگرێتەوە ..

٭ ٭ ٭

بەڵام بە چرپەی خەیاڵ ،
لە باڵکونی هۆنراوە ..
ئاڵودەی خەونێ ئەبی ،
کە هێشتا نەبینراوە ..

٭ ٭ ٭

لە هەواڵت ئەپرسێ ،
وەک گوڵ کە دێ بە باوە ..
دەستت ئەبا بۆ قەڵەم
وەک هەوێنی هۆنراوە ..

٭ ٭ ٭

هەموو ساتێ لە گەڵتە ،
ئەچێتە جێی ترپەی دڵ ..
گەر پاییزە و گەر زستان ،
ئەو داتئەپۆشێ بە گوڵ ..

٭ ٭ ٭

خەمت ئەخوا ، بۆت ئەگری ،
وەکو عەشقی مانگ و خۆر ..
بێ ئەوەی یەک ببینن ،
دوو تەن ، یەک ڕوناکی زۆر

٭ ٭ ٭

ڕوبارەکان ئەگەڕێم ،
بن بەرد ، ناو پونگی کەنار
بەناو ئەو شەپۆلانەی ،
لە شاخەوە دێنە خوار ..

٭ ٭ ٭

ئەڕۆمە ناو ئەشکەوتێ ،
دەفتەری تاریکایی ..
پەڕە پەڕە ئەگەڕێم ،
بە ووردیی ، بە ئاسپایی

٭ ٭ ٭

ئەچمە ناو کزەی باوە،
بە بای وەشتا ئەگەڕێم ..
ئەتوت ئەچمە ناو شەماڵ،
کە لە هاوین ئەتۆرێم ..

٭ ٭ ٭

ئەچمە کافێیەکی مات ،
پڕ لە دڵی شکاوە ..
هەواڵی تۆ ئەپرسم ،
لە تاڵاوی دوو قاوە ..

٭ ٭ ٭

ئەڕۆم بۆ ماڵێکی‌ کۆن ،
شێ وەختە بیڕوخێنێ ..
ئاخر جارێکیان ووتت ؛
ئارامیم تیا ئەڕوێنێ ..

٭ ٭ ٭

گەلەرییەکان ئەگەڕێم ،
پشت تابلۆ و پەیکەرەکان..
ناو ڕێبەری پێشانگا و
پاستیل و سێبەرەکان ..

٭ ٭ ٭

ئەچمە فڕۆکەخانە ،
ئاخۆ هەورێکی ڕوون ڕوون
بە پاسپۆرتی سان کیتس ،
ئەمڕۆ سەردانی کردوون ؟

٭ ٭ ٭

هیچم لێ حاڵیی نابێ ،
بێ تۆ ئەگەڕێمەو ە ..
نازانم بڕۆم بۆ کوێ ،
بێ ئامانج ئەخولێمەوە ..

٭ ٭ ٭

دنیایەکی بێ وەفا ،
پڕە لە وون و مردوو ..
دەبەنگ بووین کەوتینە دوای
کڵاوێکی با بردوو ..

٭ ٭ ٭

نالی ئەو هەموو جەورەی
بۆ دوو چاوی خێل کێشا ..
تا لە دنیا دابڕا ..
تا تەواو دڵی ئێشا ..

٭ ٭ ٭

چۆڵی کرد خاک و خۆڵ و
میرنشینەکەی بابان ..
ڕاژەی مەرگی گواستەوە
بۆ هەواری غەریبان