زیوەبارانێ.. شیعر/ کاوە عوسمان عومەر
تۆ سەرلە نوێ
وون ئەبیتەوە
پەڕەسێلکەکانی
نێو زیوە بارانێ
دەخولێنەوە
سۆراخی دیدەنیت ئەکەن
………….
لە سۆراخدام، بە دوای
وونبوونی قەشەنگی تۆ
لە نێو کەرنەڤاڵی
ئەو گەڵاڕێزانە پەمەیی.. و
پرتەقاڵیە رەوشەنانەی
مەستی زیوە بارانێکن
………….
شەوان سەرهەڵگرتن
نیشتمانمە، بە دڵم ئەڵێم
بۆ لەودیو چیاکانی خەفەت
پشویەک نەدەین!..تا
سەرلەبەیانیەکی
تامخۆش و بەچێژ! وەک شلیکی
دەستی یارێکی نادیار
………….
مەیخانەی ڕۆحمەستبوون
لەوێندەرێیە، هاوڕێ
کە زەردەپەڕ، کانیەکی هێندە دوور
شەرابی ئەرخەوانی لێئەڕژێ ، ژێێ گیتاری
گیا تەڕەکانی ژێر پەلکەزێڕینەیەکی
قژ تێکەڵ بە سەرابی ئاسمانێکی
چین بە چین بە هەوری گڕکانئاسا
وەک بەندەرێکی جەنجاڵ
پڕاوپڕن لە کەشتی شێتانەی گڕین
………….
لە تەنیاییا، وونبوون
دڵڕفێنە، مەست وبێهەودا بدرەوشێیتەوە
خۆت بدەیتە شنەیەکی میهرەبان
لە ئەڤینێکی لەدەستچوو
بەخۆت نەزانیبێ
لە ژێر زیوەبارانێ
هەر وا هەوانتە خەوت لێکەوتبێ
نەزانی لە کوێی،
ڕوخسارت پڕ لە تەم بێ
کەس سۆراخت نەزانێ، بتبا
هەنگاوەو بێ ئارامەکان، لەوێیەک
لە هەژماردن نایەن
تۆپەڵە گوڵی سپی
لە دەشتایی کاکی بە کاکی
تابلۆی نەخشێنراوی بەفری هاوینەی وێناکردوە
………….
چی پێویستە چیتر پەنجەکان
ووشەت بۆ بنوسن، نابینی
هەر لیوێکی پڕ خوێنی
گوڵە لەیلەکی نێو زەلکاوی
خەوتووی ئێوارەی ڕەوشەن
هەنگوینی ئەڤینێکی وونی تۆی لێ ئەچۆڕێ
تێبینی/ وێنەکە کارێکی هونەری فۆتۆگرافەری ئئنگلیزی
Kend alf
بە سوپاسەوە لە پەیجی فەرمی خۆی وەگیراوە
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
