ڕێوڕه‌سمی كردنه‌وه‌ی په‌یكه‌رێك … سه‌باح ڕه‌نجده‌ر
بۆ نه‌ژاد عه‌زیز سورمێ…
خودا به‌نیازی سڵاو چاوی داوه‌ته ده‌ستێك
ده‌بده‌به‌ی ڕه‌نگاوڕه‌نگی پێوه بشه‌كێته‌وه
قوماشی ڕه‌ش و سپی بڕی
پیت ڕژانه ناو ده‌مم
توانیم وشه لێكده‌م و داوا بكه‌م
مانگ به‌سه‌ر هه‌ولێره‌وه پڕ و نارنجی و له گڕوگاڵدا بێت
به‌و نازه‌ی داویه‌تییه ئاوی ڕژاوی حه‌فت چیایان
چه‌تر هه‌ڵدا
په‌یكه‌رێك حه‌فتا ساڵ پیاسه‌ی كردبوو
ئاوێنه‌ی دابووه ژن و شووشه بۆنی وه‌رگرتبوو
سه‌یری په‌ند و وێنه‌ی سه‌ر قه‌ڵغانی كردبوو
قسه‌ی توندیشی له‌گه‌ڵ وه‌ردیان كردبوو
نامه‌ی له‌سه‌ر باڵی به ناز و فیزی كۆلاره نووسیبوو
سه‌رسام بوو به
گوێی كه‌روێشك و
گواره‌ی شۆڕ و
پیاڵه‌ی چا و
ڕووناكی ڕووی زه‌وی
بلووری لامپای سڕیبووه‌وه
تووتن و پایپی خۆش كردبوو
زۆر ته‌ماشای ڕوخساری دایك و باوكی كردبوو
وایده‌زانی ده‌مرن و به جێی ده‌هێڵن
په‌یوه‌ندییه‌كانی نێوان دره‌خت و باڵنده و هێلانه و هێلكه‌ی باش ناسیبوو
گڕوگاڵ و داره داره‌ی منداڵیی ده‌بێته كاروانسه‌را
یه‌كه‌م هێلكه له‌وێ ترووكا
یه‌كه‌م ئاو له‌وێ ڕوونبووه‌وه
یه‌كه‌م باڵ له‌وێ فڕی
یه‌كه‌م شیر له‌وێ هه‌وێنكرا
له بریقه‌ی خان و مانی ڕه‌ش و سپی
ڕه‌نگه‌كانی دی له‌واندا ده‌ڕژێته سه‌ر نۆته‌ی سرووده‌كانمان
سروود بووه پشتی ئه‌سپ
به‌كامی دڵ سۆز و ئاوازی گیان ده‌دا به پاڵه‌وانی هیوا و فه‌رمووده‌كانمان
باڵنده‌ی هه‌مه‌جۆری شادمانی له‌شكری بوون
په‌لكه‌زێڕینه‌ش بیر و بۆچوونی
له‌شكر كه ده‌ڕژێنه بڵنداییی ده‌موچاوی
به‌نیازی ناسكبوونه‌وه‌ی نیشتنه‌وه و بڕیاردان له‌سه‌ر مانه‌وه و كۆچ
بیر ده‌كه‌نه‌وه و قسه و باس ده‌دركێنن
ئێمه زۆر پێویستمانه بیزانین
گوڵه‌كانی له ڕێوڕه‌سمی له‌دایكبوون و مردنی ده‌خرێنه سه‌ر په‌یكه‌ری
ته‌نیان وه‌ك ته‌ڵه شخارته‌ی به‌كارهاتوو بۆ داگیرسانی مۆمی سێبووری
بولبول له پاڵیان بانگی به‌چل باڵفڕین و نیانی جۆلانه‌ی ون كردووه
دوای سه‌رگه‌رمی دیته‌نییه‌ك
گۆشه‌نشین و خه‌واڵوو
ماسوولكه‌ی جه‌سته‌یان ده‌مه‌ته‌قێی له‌گه‌ڵ هێز به كۆتا ده‌گات
چێژ له زوڵاڵی ئاو و ئه‌و ڕۆژانه‌ی ده‌زانن ژیان چییه وه‌رناگرن
به‌ڵام خه‌یاڵ كه دووڕوویی مرداندووه
بێ بگره و به‌رده به هه‌موو شته‌كانی ده‌گه‌یه‌نێت
له بۆنه‌ی ئاشقبوونی شه‌ونمی سه‌ر گیا و شه‌ڕی چاوه‌زار
ده‌بێته ده‌ستی له‌ناو قۆزاخه‌دا ژیاو بۆ خۆشی و ناخۆشییه‌كان
هه‌ڵیده‌داته ناو ئاهه‌نگه‌كانی كۆچه‌رییان
بیره‌وه‌ری گوێڕایه‌ڵی ده‌بێ و سوودی پێده‌گه‌یه‌نێت
هه‌ڵه و نوێژه دروێنه‌ی له بیر ده‌باته‌وه
ده‌ستێك له گێڕانه‌وه ڕاستگۆ و ناهێڵی وه‌خت به‌سه‌رچێ
نامه‌كانی ده‌خاته پۆسته
نامه هاتووه‌كانیشی وه‌رده‌گرێت
ڕۆژی هه‌میشه بۆنخۆش به‌شه‌قبوونی خاك
كاتێك دومبه‌ڵان خۆی ده‌ناسێنێ
لێده‌گه‌ڕێ ئاقیق و نووسراوی ناوچه‌وانی هه‌ر هه‌موو پێغه‌مبه‌ره‌كان تێكه‌ڵی بن
له گه‌رمه‌ی سه‌ما و ناخ جریواندن
دڵی ده‌شوات و ده‌ڕوا
پڕ ده‌ستمان كڵۆ شه‌كر و مۆری به‌خت ده‌كات
ده‌توانین كه‌لوپه‌ل و وێنه‌ی به‌هره‌مه‌نده‌كانمان بكڕین
ده‌سته‌سڕی ته‌نكیش له‌گه‌ڵ خۆمان هه‌ڵگرین
بێباكی بڵندبوونه‌وه‌ی چنار
ده‌بێته شوێنێك وه‌ك قۆزاخه‌ی ئاوریشم
جوانكراو به‌سپێنه‌ی هێلكه
ئاسووده و پڕ به‌هره و په‌یماندار
هه‌موومان شه‌قامێكمان ده‌بێ تێیدا بچینه سه‌ردانی خزم و كه‌س و براده‌ره‌كانمان
ڕۆژ كه ئاوا ده‌بێ
ته‌واو ئه‌ڤینی خۆی كردووه
سڵاو
سڵاو په‌یكه‌ری به‌رتیشك و بارانی سێبووری
تێگه‌یشتی بۆ جارێ نامری
كانوونی یه‌كه‌می 2005 هه‌ولێر
