پێکەنین له چاوەکانتا ناڕژێ.. نەوزاد بەندی
لەناو ئوتومبیلا شیعر ئەنوسی ،
واتا تۆ لە نیشتمان دابڕاوی ..
ناتەوێ بە بیابانەکانیدا ،
پەنجەکانی قاچت بدەیتە دەستی پشکۆ..
ناتەوێ سییەکانت ،
بە دوکەڵی سووتانی هەموو شتێ ، سیخناخ کەی ..
جەنگ هەموومانی لێک دابڕی،
لەو کاتەوە،
وەک نزار قەبانی ،
لە جیاتی قەڵەم، بە چەقۆ شیعر ئەنوسم ..
لە جیاتی به کەناراوەکانی عەشقا بڕۆم ،
لە بەرەی جەنگەکانا،
تانکە سووتاوەکان ئەژمێرم ..
چاوەڕێی کۆدەتا ئەکەم ..
لە کۆڵانێکی شێدارا،
لەگەڵ قاچاخچییەکی نەخوێندەوارا،
مامەڵەی
( تا ئیتاڵیا )ئەکەم ..
لە لێواری برسێتیدا،
تەماشای ئەوانە ئەکەم کە برسێتییان کردووە بە بزنس ..
به بازاڕەکانا لەناو نەڕە نەڕی فرۆشیارەکانا ،
بۆ کافێیەک ئەگەڕێم
پەنجەرەکانی دژە قیڕە و
دژە سواڵکەر و
دژە گەرما و
دژە هەواڵی به پەللە بن ..
بۆ ژێر زەمینێ ئەگەڕێم،
بنمیچەکانی،
دژە شەڕه جنێوی حیزبەکان بن..
دژە ڕیکلامی هەڵبژاردن ..
دژە ڕیکلامی کاڵا تورکیی و ئێرانییەکان ..
دژە کچە مۆدێل و
کوڕە بێژەر و
تولفە مەسئولی خاوەن کۆمپانیا و زانکۆ بن ..
بە دوای گۆشەیەکا ئەگەڕێم،
بتوانم تیایدا بۆ تاوێ لە خۆیشم جیا ببمەوە ..
گۆشەیەک،
دژە قسە و
دژە شیعر و
دژە بیرکردنەوە و
دژە نیشتمان بێ ..
٭ ٭ ٭
تۆ لەناو ئوتومبیلێکا ،
بە چوار دێڕی پڕ هەڵەی چاپ،
باسی کەناراوەکانی عەدەن ئەکەی ..
باسی بەهارەکانی
دوو سەدە پێش ئێستا ئەکەی..
باسی تابلۆیەک ئەکەی،
ئەمڕۆ هیچ گەلەرییەک ڕازی نابێ وەری بگرێ..
هیچ دیوارێ ڕازی نییە،
بە لاقەدیا هەڵیواسێ ..
