دەنگەکان، پێگەی هەمووان.. نەوزاد بەندی
ساڵەهای ساڵە هەمووان لەم لاپەڕە جوان و هەمەڕەنگەی دەنگەکاندا بەرهەم و بیر و بۆچوون و لێکدانەوەکانمان بڵاودەکەینەوە بە بێ ئەوەی جارێک دەستخۆشییەکی لێبکەین، یان لە ساڵبونیدا مۆمێک داگیرسێنین، کێکێک قاژ کەین و شیرینییەک دابەش بکەین.
جێگای ڕێز و پێزانینە بۆ ستافی دەنگەکان، کە هەموو بیر و بۆچوونە جیاوازەکان پەخش و بڵاو ئەکەنەوە، ئەمەیش جێبەجێکردنی پێناسەی ڕۆژنامەوانییە کە ئەبێ ئازاد بێ ..
چونکە لە زۆربەی ڕاگەیانەکانی کوردیی ئەمڕۆدا، تەنها ئەو نوسینانەت بۆ هەیە بیاننووسیت کە کاکی سەرنووسەر بە دڵێتیی و زمانحاڵی حیزب و ئایدیۆلۆژیاکەیەتی، واتا ئەوە ڕۆژنامە نییە، بەڵکو دیوەخانی حیزبێکی بنەماڵەییە، یان هەڵپەڕکێییەکی خزمانە بە یەک ئاڕاستە و یەک ڕیتمە و ..ئەوەی وا نەبێ، ئەبێ دەست بەربدات ..
بە ڕاستی جێی پێکەنینە، لە فەیسبووک، لە ڕێی کۆمێنتێکەوە ڕەخنەیەکی بچووکم لە پڕۆفیسۆرێکی!! زانکۆیەکی خۆمان گرت، بە قسەیەکی زبر وەڵامی دامەوە ڕەخنەکەیش ڕوونکردنەوەی ئایەتێکی قورئان بوو کە پڕۆفیسۆرێکی!!! تری کۆنکرێتیی کۆنکرێتییانە دایبەزاندبوو، ئیتر هەردوو پڕۆفیسۆر!! تێک گیرا بوون، منیش بە نیازی کردنەوەی تۆپەڵە دەزووە ئاڵۆسکاوەکە، ویستم هەردوو پڕۆفیسۆری بەشەڕ هاتوو، بهێنمەوە بۆ سەر مێزی گفت و گۆ و لێکتێگەیشتن ..
وەڵامی قسە زبرەکەم نەدایەوە، ووتم زۆر گەرم بوویت، تا سارد نەبیتەوە ڕەشە ڕەیحانەیش بە ئاڕبیجی لێک ئەدەیتەوە.
ڕۆژی دوایی شین و واوەیلایەکی به تامی ووتار دابەزاندبوو، گوایا ئەم ڕەخنەی لە ئیسلامییەک گرتووە، لە کاتێکدا بەشێک لە ئیسلامییەکانیش ڕەخنەیان لێگرتووە، ئیتر بۆچی بۆ ئەو نەبێ ڕەخنەی لێبگرێ ؟
منیش بۆم نوسی تۆ لە کۆمەڵگایەک و له شارێکدایت کە کفرێکی گەورەیە کەسێکی سەر بە حیزبێ یان سەر بە تیرە و بنەماڵەیەک، ڕای جیاوازی هەبێ، لەکاتێکدا پێناسەی دیموکراسیی ئەوەیە تۆ ڕەخنە و ڕای جیاوازت هەبێ تەنانەت لە خێزانەکەیشتا .. هەر بۆیە ئەو سەرسامبوونەت بە ڕای جیاواز لە ئیسلامییەکاندا، سەلمێنەری ئەوەیە تۆ لە دیموکراسیی تێنەگەیشتوویت و ئیسلامییەکان تێی گەیشتوون.. تۆ نازانیت یان ناتەوێت یان ناهێڵن یان ناوێریت، دیموکراسیی جێبەجێ بکەیت، بەڵام لەناو ئیسلامییەکاندا ڕای جیاواز هەیە و به پڕاکتیک جێبەجێی دەکەن و لەسەر کۆمێنت و ڕای جیاوازیش نە ئەبێتە شەڕیان نە یەکتر تیرۆر ئەکەن، وەک لە حیزبە عەلمۆخێڵەکییەکەی جەنابتاندا بینیومانە و ئەیبینین.
پڕۆفیسۆرەکە بلۆکی کردم !
لەم ڕۆژانەدا ووتارێکم کە لە پەیجی دەنگەکاندا دابەزی، لە هەمان کاتدا بۆ پەیجێکی تریشم نارد بە ئومێدی ئەوەی زۆرینەی خۆێنەرانی کورد بیخوێننەوە، چونکە ئێستا وەک چۆن هەر کەسێک حیزب و دەستە و تاقمی ڕیشتاشینی تایبەت بە خۆی هەیە بە هەمان شێوە هەر کەسێک ڕۆژنامە و پێگەی تایبەت بە خۆی وجەماعەتەکەی هەیه وهی ئەوانی تر تەماشا ناکات، هەر بۆیە منیش هەمیشە هەوڵ ئەدەم لە زۆربەی پەیجەکاندا بڵاو ببنەوە..
بابەتەکە باسکردنی حاڵەتێکی دەروونیی بوو، کاتێ تۆ لە پڕێکا تووڕه دەبیت، ئاگات لێ نییە ئەم توڕە بوونەت، تووڕه بوونێکی پێشترە، کە نەتتوانیوە تیایدا توڕە ببیت !
ئیمەیڵێکم له سەرنوسەری ئەو پەیجەوە بۆ هات، نوسی بووی : ڕاستە خەڵک لە دەسەڵاتی کوردیدا ئەچەوسێنرێنەوە، بەڵام ئەو دکتۆرەی تۆ باست کردووە ، سوک و خۆفرۆشە، لەبەرئەوە ووتارەکەت بڵاو ناکەمەوە!!
بە بێ ئەوەی ناوی هیچ دکتۆرێکم له ووتارەکەمدا بردبێ، بەڵام ئەو سەرنوسەر چونکە ڕقی له دکتۆرێکە ئەبێ تۆیش ڕقت لەو دکتۆره بێ و.. تەنانەت ئەگەر ووشەی دیکۆریشت بە کارهێنابێ، ئەو هەر به دکتۆر لێکی ئەداتەوە و نوسینەکەت لە فلتەردا دەرناچێ..
بۆم نوسی : ئەی ڕۆژنامەی ئازاد بە چی تێگەیشتوویت؟ ئەتەوێ کەسێک کە تۆی سەرنوسەر بە خۆفرۆشی بزانیت، هەموو نووسەرانی پەیجەکەیشت به خۆفرۆشی بزانن ؟؟ ئەمە عەقڵیەتی حیزبێکی بنەماڵەییە نەک ڕۆژنامەیەکی ئەلیکترۆنیی مۆدێرن، مادام وایه منیش لە لاپەڕەکەتا هیچ نانووسم .
ڕۆژنامەمان هەیه دوو سێ وتاری تیا بڵاوبکەرەوە، ئەکەوێتە شکەوە لێت، تۆ بڵێی مەبەستت لە جێ پێلەقکردنی ئەوان نەبێ؟ تۆ بڵێی لە ڕێی ئەوانەوە ناوبانگ پەیدا نەکەیت ؟ تۆ بڵێی زەرەریان نەبێ کە ووتارت بۆ بڵاو دەکەنەوە؟
وەڵڵا ئیتر مڵۆزمێکی کوتەک بەدەستت لێ ڕاست دەکەنەوە، ووتارۆکەیەک به پیسایی ئەنوسێت، کە هێرشە بۆ تۆ و هەموو ئەوانەی خزمی جەنابی سەرنوسەر نین و .. هاوحیزب و هاوڕێی مێز و گیرفانی نین ..
یان پەیج هەیە لە ڕێی بردەرێکەوە دوو سێ ووتارت بۆ بڵاو ئەکاتەوە، لە پڕ بایکۆتت ئەکا، لە هەمان کاتدا ووتاری کۆمەڵێ سەری گەندەڵیی بڵاو دەکاتەوە، وەک بڵێ : خاڵە ئێمە نوسەری وامان هەن، قمقمۆکەیەکی وەک تۆ چییە ؟
وەلحاسڵ من ئێستا تەنها دەنگەکانم بە دەستەوە ماوە کە تیایدا بنوسم ، چونکە تەنها دەنگەکان توانیوێتی لە عەقڵیەتی حیزب و خێڵ و خێزان ڕزگاری ببێ ..
هەرچەندە پێم وایە باش نییە بە کەسێک یان بە شتێکی کورد بڵێیت تەنها تۆم لا پەسەندە و جێگرەوەی تۆم نییە، چونکە لەو حاڵەتەدا وا خۆیت لێ وون دەکات بە هەرچی تەلسکۆب و میکرۆسکۆب و دووربین هەیە نەیدۆزیتەوە ..وەکو یارەکانمان لە قۆناغێک لە قۆناغەکانی ژیانماندا کە خۆیان لێ وونکردین ..
هههههههه …
