دوو کوردە چیرۆک.. نەوزاد بەندی
ــ لەپێکردن ــ
لەیادی کردبوو کە لە پێی کردووە، سڵاوێکی لێکرد، ئەویش به قێزلێهاتنەوەوە تیلەیەکی چاوی تێگرت؛ هەی لەوە، لە پێم کردووە کەچی سڵاوم لێ ئەکا، مەگەر بە بەلوعەی ئاودەستخانەکەیش ڕات دەگرم ؟
ئەم نەیزانی چۆن باری لاری خۆی ڕاست کاتەوە بۆ کەسێکی بێ لایەن ئەگەڕا پێی بڵێ، من بە تەواوی ئاگایی و دەسەڵاتی خۆمەوە لە پێم کردووە و قەتیش بیرم لەوە نەکردۆتەوە سڵاو یان تەنانەت تفیشی تێبکەم، دەستم بۆ پێشکە بەرز کردۆتەوە ئەو بە سڵاو لێکی داوەتەوە.. ئەویش هەر کەسێکی ببینیایه ڕایدەگرت و پێی دەگوت: خۆ بوارت هەیە دوو سێ قسەت بۆ بکەم ؟
پێش ئەوەی وەڵام وەربگرێ، قسەکانی بۆ دەکرد: ساڵ زیاترە لەپێم کردووە، ئێستا بەم سبای ساڵحانە هاتووە سڵاوم لێ دەکا، مەگەر سەربازیت و ڕوتبەی سوپاسالارت لەسەر شانم بینیوە ؟ مەگەر بە نیازیت دیسان بکەومە ناو فاک و فیکەکانتەوە ؟ .. مەگەر نازانیت مەسینەی ئاودەستخانەکەم کون بێ، بە مەسینە ڕاتناگرم..
ئیتر نازانم ئەو بابەتە تاکو کوێ درێژەی کێشا ..
ـــ سێ پەککەوتە ـــ
هەڵبەت سێ کەس بووین، دوو باڵا مام نەوەندیی و مەتر و حەفتایەک .. مووی سپی وەک خۆڵ و دۆ بە سەر و پۆتەڵاکمانا هاتبووە خوارەوە ..ئەتوت کوێخای شاربەدەرکراوی کوێرە دێیەکی دڕین ..
دووانمان دەستێکمان بە خۆڵ و دۆکەدا هێنا بوو..
ئەوەی سێیەم لە بەریتانیا هاتبۆوە، داوەتی چای خەڵوزی سەهۆڵەکەی کردبووین.
شەوەکەی تا ڕادەیەک سەر و پۆتەڵاکی داپۆشیبووین، هەر بۆیه هەروەک سێ مۆدێله کۆنە سونەتییەکە شەقامەکەمان ئەبڕی ..
کە گەیشتینە بەردەم چای خەڵوز .. ڕوناکی تیژ و حەیابەرەی لیدی چایخانەکە بە هەموو جێگایەکمانا ڕژا… کاورای بەریتانیی لە قاقای پێکەنینی دا، بە جۆرێک دەستی بە سکییەوە گرتبوو، نەک شەپۆلی یەک لە دوای یەکی پێکەنین، مەد و جەزر بە وورگی بکا و کاوبۆی داکشێتە خوارێ و عەورەتی بکەوێتە سەر جادە..
ووتی : کورە ئەوە چیتان لە سەر و سورەتتان کردووە؟ ناشێ لەگەڵ پێڵاوەکانتان لێتان تێک چووبێ ؟
پێم ووت: هەتیو تۆ بە لای خۆی لەگەڵ ئینگڵیزان ئەژیت.چۆن ڕێ بە خۆت ئەدەی خۆهەڵدەیتە ناو ئازادییەکانمانەوە؟؟؟
ئەو لە حیلکە حیلکی خۆی نەدەبۆوە ..
ووتم : من یەک پارچەم بۆیاخە، ئەو سێ دانە پارچەی بۆیاخە ..
کە سەیری جووتبرۆی قەوام سەڵتەنەی کرد، ئەوەندەی تر بوورایەوە لە پێکەنینا ..
