فیلمی (شین) و سیناریۆی سوور.. حەیدەر عەبدولڕەحمان
یەكەم جارمە بەرهەمێكی سینەمایی بەناوی (محەمەد مستەفا ) دەبینم، چونكە پێشتر ئەوم وەك شانۆكار ناسیووە، دیارە ئەمجارە ئەزموونەكانی خۆی لەبواری فیلمسازیدا بەرجەستە كردووە، ئەمەش بازدانێكی پڕ لەسەركێشی بووە، بۆ چوونە ناو دنیای سینەما…
ئەو وشەی (شین) ی بۆ فیلمەكەی هەڵبژاردووە، بۆ ئەوەی بینە ر بەدوای نهێنیەكانی ناو ئەو فیلمەدا بگەڕێ و بزانێت، مەبەستی دەرهێنەر چی بووە بۆ هەڵبژاردنی ئەو ناوە؟
ڕەنگە بینەر لەدەستپێكی خوێندنەوەی دا یەكسەر بیری بۆ ڕەنگی (شین) بچێت و پێی وابێت، ئەو ڕەنگە كە هێمای هێور بوونەوەو ئارامی دوای جەنجاڵی و ڕەنگی ئاسمان و دەریاكانە، زۆر جار دەبێتە هێما بۆ حاڵەتە بێ سنوورەكان، یان نیشانەی بڕوا بەخۆ بوون .
هەندێكی دیكەش (شین) وەك وشەیەكی خەمبار، ئاوێزان لەگەڵ گریان و لەخۆ دان دەناسن، یان حاڵەتێكی گوزارشت بەخشی مرۆیی دوای كارەساتێك، یان لەدەستدانی ئازیزێك.
بەڵام كە فیلمەكەت بینی و بەدوای دۆزینەوەی وشەی (شین) و وابەستە بوونی بە ناوەرۆكی فیلمەكە گەڕایت، دەزانی مەبەست لە وشەی (شین) لە فیلمەكەدا لەو هەموو كێشەو گرفتانەیە كە بەسەر (سەركێش)ی پاڵەوانی فیلمەكەدا دێت ، لە ئەنجامی لەڕێ لادان و خەونی گەیشتن بە ئاواتە نەزۆكەكانی، كە لە ئەنجامدا هەموو شتێ لێك دەترازێ و خێزانەكە بە تێكڕایی بەرەو ڕوخان دەچێت.
سەركێش لەكاتی فرۆشتنی ئەو خانووەی تێیدا دەژین بۆ دەستەبەر كردنی ئەو پارەیەی مافیاكان داوای لێ دەكەن بەرامبەر بەنەكوشتنی، ئۆباڵی ئەو چارەنووسە ڕەشەی خۆی و خێزانەكەی، دەخاتە گەردنی باوكە نەخۆش و بێ هۆشەكەی و پێی دەڵێ : تۆ هۆكار بووی بۆ گەیشتن بەو رۆژە ڕەشە، كە رۆژێ لە ڕۆژان رێگریت لە هەڵەكانم نەكرد ، تا بەم رۆژە گەیشتین .
ئەنجامەكە هەر تەنها هەڕەشە نەبوو لەكوشتنی هەڵوێست، لەوە گەورەتر ئەوەبوو، سەركێش بۆ رزگار بوون لەمەرگی حەتمی خۆی بەدەست فەرهادی مافیاو قاچاخچی، كە مۆڵەتی چەند رۆژێكی دابوێ هەشت دەفتەر دۆلاری بۆ بێنێ، هەڕەشەی لەخوشكە پاك و بێ گوناهەكەی دەكرد كە شەڕەفی خۆی ڕادەستی پیرە دەوڵەمەندێك بكات بۆ دەستەبەر كردنی پارەكە.
لەو لەحزەیەدا بینەر بۆی دەردەكەوێت، كە شین ـ ئەو شین و وا وەیلایەیە كە سەركەش و خێزانەكەی هەر یەكەو بەدەست مەرگەساتێك بەدەستیەوە دەناڵن، كێشەی باوكە بێ هۆشەكەو بێ چارەییەكەی، كێشەی خوشكە گەورەكەی و دابڕانی لەگەڵ مێردەكەی و مردنی كوڕە تاقانەكەی بەهۆی دووركەوتنەوە لەباوكە خیانەتكارەكەی.
كێشەی خوشكە بچووكەكەی كە بۆ پارە ڕێكلام بۆ سۆشیال میدیا كان دەكات و كەس لەدەرگای نادا بۆ خوازبینی .
كێشەی (سەركێش)ی گەنج كە ژیانی پڕ بووە لە هەڵە: هەڵەی ئەوەی بەخێرایی بگاتە خەونەكانی، بەدوای مافیاو قاچاخ چیەكانەوە كەوت، تا لە ئەنجامدا هەموو شتێكی لە دەست دا.
هەڵەی ئەوەی (سەركێش) ماوەیەكی درێژ بەدرۆ خۆشەویستەكەی بەوە هەڵخەڵەتاندبوو كە دەیخوازێ و كچەكەش بڕوای پێ كردبوو، هەموو جەستەی خۆی ڕادەست كردبوو، لە پڕ دەركەوت سكی لێی هەیە.
بینەر كاتێ هەموو ئەو ڕووداوە ئاڵۆزانە دەبینێ، شایەتی ئەوەت بۆ دەدا كە بەڵێ ئەو هەموو كارەساتە جەرگ بڕانە شایەستەی ئەوەن شینی بۆ بگێڕیت، بە تایبەت شینی ئەو گەنجەی لەبری ئەوەی ڕێگای ڕاست نیشانی خوشكەكەی بدات بۆ ئەوەی ڕوو سپی بژیت، كەچی بەخۆی بەهێزو توندو تیژی بۆ پاراستنی ژیانی خۆی داوا لە خوشكەكەی دەكات، پیرۆزترین شانازییەكانی خۆی كە شەرەف و كەرامەتیەتی بفرۆشێ.
زمانێكی نوێ بۆ سینەما
محەمەد مستەفا ـ بەگشتی كەوتۆتە ژێر كاریگەری فیلمە فارسیەكان، كە لەو ساڵانەی دواییدا لە سەر دەستی نەوەیەكی نوێ ی سینەمایۆ ئێرانی وەرچەرخانێكی گەورە بەخۆیەوە دەبینێ، كە زۆربەیان لە ژێر كاریگەری سینەمای جیهانی و تەكنەلۆژیای نوێ دان، خەریكی داڕشتنەوەی زمانێكی نوێن بۆ سینەما ، كە لە زۆر ڕووەوە جیاوازە لە فۆرمە كلاسیكی و تەقلیدیەكی جاران كە سینەمای ئێرانی پێ دەناسرا.
ئەگەر جاران سینەمای ئێرانی لەچوارچیوە ئایینی و كۆمەڵایەتیە ڕوكەشەكانەوە چەق بەستوو كرابوو، ئیٍستا دەرهێنەرە گەنجەكان ڕاشكاوانە تر لە واقیعی ئێران دەڕوانن و پەنجە لەسەر وردەی كێشەكان دا دەنێن ، چەشنی هەژاری و هۆكاری تاوانەكان و لە ڕێ لادانی لاوەكان و ئاڵودە بوون و قاچاخچیەتی، لەژێر گوشاری سەختی ئابووری.
ئێستا زۆر لە فیلمەكان بەئاراستەی نیشاندانی تاوانكاری و توندو تیژی، ترس، كێشە دەروونیەكان دەچن، بۆ ڕاماڵینی ئەو واقیعە تاڵە، كە بینەر خۆی تێدا دەبینێ .
بەم ئاراستەیەی ئێستای گەنجەكان، دەكرێ سینەمای ئێرانی بكەوێتە بەربەرەكانی لەگەڵ سینەما جیهانیەكان و پێگەی خۆیان لەفیستیڤاڵە جیهانییەكاندا داگیر بكەن .
فیلمی شین ـ لەو فیلمانەیە كە هەمان ڕێچكەی گرتۆتە بەرو كەوتۆتە ژێر هەمان كاریگەری، بەڵام لە هەندێ لایەن دا لە سنووری كاریگەری دەرچووەو لاسایی هەندێ فیلم دەكاتەوە، تەنانەت لەناوی فیلمەكەش، چونكە فیلمێكی دیكەی ئێرانی هەیە هەمان ناوی (شین ) بە خۆیەوە هەڵدەگرێ لە دەرهێنانی ( مەیسەم گزازی) لە پاڵەوانیەتی شەهاب حوسەینی..كە لەدەوری كۆمەڵی پرسی دەروونی دەخولێتەوە، مەبەستم لە لاسایی كردنەوەی ستایلەكەو ناوەكەیە.
سیناریۆ:
زۆرێك لەو واقیعەی دەرهێنەر باسی دەكات، تایبەت نین بەكولتووری كۆمەڵگای ئێرانی ، ڕەنگە كۆمەڵگاكانی تریش هەمان ئەو كێشە كۆمەڵایەتیانەیان هەبێت كە فیلمی (شین) فۆكسی خستۆتە سەریان، بەڵام بەگشتی سەرلە بەری كێشەكان كولتوورو واقیعی ئەمڕۆی كۆمەڵگای ئێرانین، كە نغرۆ بووە لە ناشیرینترین و سەختترین رۆژەكانی .
جاران هەموو ئەو واقیعە تاڵانە لە ژێر پەردەی ئایینی و كۆمەڵگایەكی پەروەردەكار بینەری ئێرانی و جیهانی بەشێوەیەك چەواشە دەكرد، كە سینەما هیچ ڕۆڵێكی بەدەستەوەدا نەمێنێ بۆ چاكسازی .
كەواتە دەرهێنەر لە فیلمەكەی خۆیدا نەیویستووە كولتووری كوردستان بەڕووە جوانەكەی خۆیەوە نیشانی بینەر بدات، ئەگەرچی ئەركی سینەما ناشیرین كردنی كۆمەڵگا نیە، بەڵكو نیشاندانی ڕووە جوانەكانیشیتی.
كاتێ دەرهێنەر فیلمەكەی خۆی بردووە بۆ ئەوروپا، لەوێ دەیەوێ چ كولتوورێكی تایبەتمەند بەكوردستان نیشانی بینەری ئەوروپی بدات شانازی پێوە بكرێت ؟
خۆ تەنیا ئامانج نیشاندانی عەزەڵاتی دەرهێنان نیە، بێ ئەوەی بیر لە كۆمەڵگاكەت بكەیتەوە، ئێ خۆ دەرهێنەری وا لەئەوروپا زؤره كە هەمان عەزەڵاتیان هەبێت بۆ نمایشكردن .
فەراغی یاسا
بینەری ئەوروپی ناپرسێت ئەرێ كاكە لەناو ئەو هەموو تاوانكاری و فەراغە زۆرەی یاسا، ئەو كۆمەڵگایە لە داستاندا دەژیت هیچ یاسایەك نەبێت بیپارێزێ؟
كەسێك نەبێت لە پۆلیس و ئاسایش بەدواداچوون بۆ ئەو كوشتن و بڕۆیە بكات؟ یان بپرسێت بۆ ئەوەندە بە سووكی و بێ حورمەتی حیساب لە گەڵ یاسادا دەكەن؟
ئا لەو كاتانەدایە سینەما لە چوارچیوەی ئامانجە ڕاستەقینەكانی خۆی لا دەدات، ئەوە جگە لەوەی ناتوانێت لەڕووی دەروونیەوە ورەی بینەر بپارێزێ لەدەست بێ ئومێد بوون بەئایندەی ئەو كۆمەڵگایە.
گرێ كوێرەی چارەسەری درامی
ڕاستە كە لەسینەمادا گرێ چنی پرۆسەیەكی سەخت و دژوار نیە، سیناریۆ نووس دەتوانی وەك فیلمی (شین) زنجیرەیەك گرێ ی یەك لەدوای یەك بچنی، بەڵام دواتر هەموو ئەو گرێ كەڵەكە بووانە لەگەردنی دەرهێنەر دەئاڵێن نازانێ چۆن و بەچ فۆرمێكی لۆژیكی چارەسەریان بۆ بدۆزێتەوە.
دەبێ لەڕووی فەلسەفیشەوە دەرهێنەر ئەوە بزانێ كردنەوەی كۆمەڵێ تەوەر، بەمانای بەهێزی گوتاری فیلم نیە، بەڵكو چڕ كردنەوەی هەموو مژارەكان بەدەوری یەك گوتاری سەرەكی، باشترین بژاردەیە بۆ گەیاندنی ئامانج و فەلسەفەی فیلم.
محەمەد مستەفا ـ لە فیلمی (شین) دا هەموو شتێكە، نووسەر، دەرهێنەر بەرهەم هێنەر، بەڵام ڕەنگە تواناكانی هاوسەنگ نەبێت لەتێكڕای ڕەهەندەكاندا، بەتایبەت لەڕووی سیناریۆو نووسیندا توانای ئەوەی نیە وەك سیناریۆ نووسێكی پرۆفیشنال كار لەسەر فیلمەكە بكا.
ڕەنگە ئەگەر فەلسەفەی فیلمێك، هەموو دیمەن و ڕووداوەكانی بەدەوری تەنیا یەك ئامانجی بنەڕەتییدا بخولێتەوە، پێكانی یەك ئامانجەكە ئەگەر لق و پۆپی بەهێزی لێ بكرێتەوە، بەهێزتر دەبێت لەپارچە پارچە بوون و لاوازی ئامانجە پەرت و بڵاوەكان.
تەوەرە كراوەكان
ا. تەوەری قاچاخ چیەتی كە تەوەرێكی سواوو تەقلیدیە لە دراماو سینەمای كوردی، تا ئێستا هیچ لەو بەرهەمانە نەیانتوانیووە هیچ كاریگەرییەك لەسەر كۆمەڵگا دروست بكەن، چونكە نمایشكردنی كێشەكەو ڕێگاكانی چارەسەركردنیان لاواز بووە.
2.مافیا
لەو ماوەیەو لە فیلمە نوێكاندا دەرهێنەرە كوردەكان وەك لاسایی فیلمە توركی و فارسییەكان بۆتە تەقلیدو هیچ كاریگەریەكیان نەماوە.
هەندێ لەدەرهێنەرەكان وەك محەمەد مستەفا پێی وایە ئەكشن بە بەرزكردنەوەی ریتم تەنیا لەكاری ئەشكەنجەدان و توندو تیژیە ، بۆیە لە یەكەم گرتەدا بە ئەكشن دەست پێ دەكات، بۆ ئەوەی هەر لەسەرەتاوە بینەربەو دیمەنە توندو تیژانە چەواشە بكات ، بەڵام دواتر نازانێ چۆن چارەسەری ریتم بكات و ساردی كاتەوە.
- تەوەری شیرین و هاوسەرەكەی، كاتێ لەسەر خیانەتكاری بەخۆی و كوڕەكەی و دەگەڕێنەوە ماڵی باوكیان و لە ئەنجامی بێ ئاگایی دایك و باوكیان كوڕەكەی دەكوژرێ..دواتر لەناكاو تەوەری مردنی ئەو كوڕە كاڵ دەبێتەوە، بێ ئەوەی بینەر هەستی پێ بكات .
4.تەوەری دڵداری )سەركێش) و سك پڕ كردنی كچە خۆشەویستەكەی .
5.تەوەری خوشكەكەی شەرمین كە براكەی بۆ پارە داوا لەخوشكەكەی دەكا شەرەفی خۆی بفرۆشێ.
6 تەوەری باوكە نەخۆشەكەو مردنی بەهۆی خەمخواردنی فرۆشتنی خانووەكەیان .
هەموو ئەو هەموو تەوەرانە دەكرا بۆ زنجیرەیەكی درامی هەناسە درێژ جێگەیان بۆ بكەیتەوە، نەك بۆ فیلمێكی یەك سەعاتی.
دراما مەودای زۆرتری تێدایە، بە دروست كردنی سیناریۆو دیالۆگ، بۆیە گرێ چەند زۆر بێت لە درامادا ئاسانە، بەڵام لەسینەمادا مەودا نیە بۆ دیالۆگی درێژ، بینەر بەدوای وێنەدا دەگەڕێ، نەك دیالۆگ.
چارەسەری سەقەت
هەر فیلمێك كە لەسەرەتاوە تەوەرێكت بۆ دەكاتەوە ، بەڵێنێك بە بینەر دەدات كە كێشەكان بەپێی لۆژیكی ناو چیرۆكەكە چارەسەر بكات.
كاتێك دەرهێنەر بەشێوەیەكی ناواقیعی و نالۆژیكی، كۆتاییەكی دڵخۆشكەر بۆ بینەر بە فۆرمێكی دروست كراو نیشان دەدت، ئەوە بەئاشكرا دیارە كە دەرهێنەر خەریكی تیرۆر كردنی لۆژیكی ناوەوەی فیلمەكەیە، ئەمە وا دەكات بینەر هەست بەلاوازی و بێ دەسەڵاتی دەرهێنەر بكات لەچارەسەری درامیدا ، چونكە بەچاوی خۆی دەبینی دەرهێنەر چۆن بەمەقەسێكی نا لۆژیكی دیمەنەكان دەقرتێنێ ، لە پێناو چارەسەرو خۆ بەدەستەوەدانی كۆتایی.
بەهەمان شێوە محەمەد مستەفای دەرهێنەر سەركەوتوو نەبوو لەچارەسەركردنی گرێ چنەكانی فیلمەكەو كۆتاییەكەی وەك فیلمی هیندی لێكرد، ئەو پێی وابوو ، تاقە چارەسەری تەنیا كوشتنی فەرهادی سەرۆك مافیا بوو، كە وەك لاسایی كردنەوەیەكی دەقاو دەقی فیلمی پێستی شێر ـ لە حەمام مافیاكەی كوشت ، بەڵام زۆر بەلاوازی ، كە هیچ هێزێكی درامی تێدا نەبوو، بە پێچەوانەی پێشینیەكانی بینە ركە دەكرا دەرهێنەر هەموو تواناكانی خۆی لەو دیمەنەدا بەرجەستە بكات ، نەك هەوڵی خۆ رزگاركردنی خۆی بدات .
دەرهێنەر چونكە ئامانجە بازرگانیەكە ئامانجێكی سەرەكی بوو، ئەو تەكتیكە نا مەعقولەی دروست كرد، دەرگای گەش بینی موزەییەفی بۆ بینەر خستە سەر پشت، بۆ ئەوەی لە ڕووی بازرگانیەوە ئەو بینەرە بە خەفەتباری هۆڵی سینەما بەجێ نەهێڵێ و پەشیمان بێتەوە لە هاتنەكەی..
چارەسەر
بەڵام هەندێ دەرهێنەری زیرەكیش هەیە، كۆتاییەكەی بە كراوەیی بۆ بینەر بەجێ دەهێڵێ ، بە تایبەت ئەگەر ئەو واقیعەی فیلمەكە باسی دەكات، واقعێكی بەردەوام بوو، ئەم كۆتایی هاتنە لای زۆر لە دەرهێنەرە ئێرانیەكان پیادە دەكرێت .
لە هەمان كاتیشدا زەمینە خۆش دەكات كە دەرهێنەر لە ئایندەدا بەشێكی تر لە فیلمەكە بەرهەم بهێنێ.
فۆرمی نوێ لە نواندندا
لە زۆر فیلم و دراماو بەرهەمی شانۆیییدا ( شەماڵی عەبە ڕەش ) م وەك ئەكتەر دیوە، تا ئیًستا جگە لەشانۆ، لەهیچ بەرهەمێكی سینەمایی و درامایی دا شەماڵم بەقەد تواناو دەسەڵاتی هونەری ئەو نەدیوە، كە وەك پێویست ئارەزووم تێر بكات .
لەفیلمی (شین) شەماڵم بەشێوەیەكی جیاواز لەجاران بینی:
1.فۆرمی سینەمایی :
لەو فیلمەدا ( شەماڵی عەبە ڕەش ) م بینی بە فۆرمێكی سینەمایی دوور لە فۆرمی شانۆیی ، كە بەلای زۆر ئەكتەر دۆزینەوەی فۆرم ئاستەمێكی گەورەیە، بەتایبەت لای ئەو ئەكتەرانەی لە هەر سێ بواری شانۆو دراماو سینەمادا كار دەكەن، ڕەنگە ئاسان نەبێت بتوانیت تواناكانی خۆت وەك پێویست بەرجەستە بكەیت .
دۆزینەوەی ئەو حاڵەتەش وا بەستەیە بەهوشیاریی خودی ئەكتەرو تێگەیشتنی لەهونەری ئایتینگ. - بەتوانای دەرهێنەرو ڕێنماییەكانی
پێم وایە (محەمەد مستەفا) دەسەڵاتێكی باڵای هەبووە، لەسەر هەم (شەماڵ) و هەم ئەكتەرەكانی دیكەش بۆ ئەوەی هەست بكەن كە ئەوان لەبەردەم كامێرای سینەماییدا نواندن دەكەن، نەك لەسەر شانۆ . - ناسینی كاراكتەر
ڕەنگە یەكەم جار بێت بۆ( شەماڵ) كە گۆڕانێكی نوێ لە گۆڕینی كاراكتەر بەم قەفزە نوێیەوە لە گۆڕینی كاراكتەر بەخۆیەوە ببینێ ( كاراكتەری سەرۆكێكی مافیا ) بۆیە ناسینی ئەو كاراكتەرە بۆ شەماڵ ئاسان نەبووە.
بەڵام هەستم كرد بەهەقیقەت (فەرهاد) سەرۆك مافیایەكە، كە بۆنی دڵ ڕەقی و چاوچنۆكی و بێ بەزەیی بوونی لێ دەهات، بێ ئەوەی هیچ هەستێكی مرۆیی یا ناسیاوی جیاوازی پێ بكات.
بۆیە دەرهێنەر هوشیارانە ئەو كاراكتەرەی بۆ شەماڵ هەڵبژاردووە، كە جگە لەئەداو جوانی ئاكتینگی ، لە هەمان كاتیشدا شێوەو ڕوخسارێكی لێوەشاوەشی هەبوو بۆ ڕۆڵەكە،خستنی جگە لەو ئارایشتە جوانەی یاریدەی دەرخستنی شەڕانگێزی ئەو كاراكتەرەی دابوو.
هەڵوێست محەمەد وەك ئەكتەر
هەڵوێست محەمەد ـ لە دەروازەی دەنگ خۆشییەوە هاتە دنیای سینەماو نواندن، چونكە ساڵی 2019 كاتێ دەرهێنەر (شوان عەتوف) فیلمی (پەیكەری دڵ)ی وەك فیلمێكی مۆسیقایی و درامی بەرهەم هێنا، ئامانجی سەرەكی ئەوەبوو، فیلمەكەی لە ڕووی بازرگانییەوە داهاتێكی زۆر بەدەست بێنێ، چونكە هەڵوێست خاوەن هەوادارێكی زۆر بوو، قۆرخ كردنی بۆ سینەما، ئامانجێكی بازرگانی باش بوو، بۆ گەشەی سینەماو گەڕاندنەوەی بینەری سینەما.
دواتر زۆر كۆمپانیای دیكە جارێكی دیكە هەوڵیان دا چەند بەرهەمێكی دیكەی دراماو سینەما لەگەڵ (هەڵوێست) ئەنجام بدەن، لەوانەش درامای (بەرەو بەرزاییەكان) ی شوان كەریم، كە هەڵوێست ڕۆڵی سەرەكی تێدا بینی.
هەروا دەرهێنەر (محەمەد مستەفا) ئەمجارە بەرگێكی نوێ ی لە كەسایەتی (هەڵوێست) كردو كردی بە ئەكتەر كە گۆرانی بنەمای گشتی نەبێ لە رۆڵ بینینی هەڵوێست لە سینەمادا، بەڵكو وەك ئەكتەرێكی سەرەكی لە فیلمی (شین) بەكار هێنا، پێشبینیەكەی دەرهێنەر بۆ ئەو هەنگاوە نوێیە لە تواناكانی (هەڵویست) بەڕاست دەرچوون، ئەمجارە هەڵوێست وەك ئەكتەر تواناكانی خۆی نیشاندا زێتر لە دەنگ و گۆرانی.
لەم ئەزموونەدا (هەڵوێست) وەك ئەكتەر سەركەوتنێكی باشی بەدەست هێنا، بەهۆی ئەو ئەدا جوانەی بەرجەستەی كرد، جگەلە لێوەشاوەیی لەگەڵ كاراكتەردا.
ڕووبار خالید
ئەوانەی تا ئێستا ڕووبار خالید ـ یان ناسیووە، لە رَێگەی نمایشە شانۆییەكان و بەشداری كردنی بووە لە چەند درامایەكدا، لەو چەند قۆناغەشدا توانیوویەتی شوناسێكی پڕ لە بەهرەو توانا بۆ خۆی دابنێ و ئاشنایەتیەكی باش لەگەڵ هەوادارانی پەیدا بكا.
بەڵام ئەمجارە لە دەرگایەكی بەر فرەوانتر هاتە پێشەوە، دەرگای سینەما ، كە دەروازەیەكە بۆ بە جیهان بوون و رۆڵی كاراكتەری (شیرین) ی لە فیلمی شین دا بینی ، كە لەو فیلمەدا بەهێزترین كاراكتەرە لە ڕووی كەسایەتیەوە ، چونكە شیرین كارەكتەرێكی ئەرێنی خاوەن هەڵوێست بوو، بەرامبەر بەمێردەكەی كە خیانەتی لێ كردبوو زۆر بە توندی ڕوو بەڕووی بۆوە، بەرامبەر (سەركێش)ی براگەورەی كە فشاری دەخستە سەری، بەهەڵەكانی مێردەكەی ڕازی بێت، بەڵام ئەو بەرپەچی دەدایەوە تا ئاستی تەئدیب كردنی و شەق لێدان لە براكەی.
بەهەڵوێست بوو بەرامبەر بەخوشكەكەی كە لەدەست غەدری براكەی و فشاری ئابڕۆ بردنی بۆ پارە، ڕێگەی ماڵ جێ هێشتنی لێ دەگرت و زور هەڵوێستی تر، كە كاراكتەری شیرینیان گەورە نیشان دەدا..
جگە لە كاراكتەر (ڕووبار خاید) لە ڕووی نواندنەوە، ئاكتینگێكی بەرزی نیشاندا، لەڕووی فۆرمی و بەرجەستە كردنی كاراكتەرەكەی.
ئێستا ڕووبار وەك ئەكتەرێكی ئافرەت، لای زۆرینەی دەرهێنەرەكان لە بەرچاوە، چونكە جگە لە بەهێزی كەسایەتیەكەی، سەركەوتنی لە رۆڵەكانیدا زامنە .
جگە لەو چەند ئەكتەرە سەرەكییانە، تێكڕای ئەكتەرە بەشدار بووەكانی تریش، هەر یەكەو بە قەد ئەو رۆڵەی پێی سپێر درابوو، لە ڕووی ئاكتینگەوە ،توانیان وەك پێویست رۆڵەكانی خۆیان ڕاپەرَێنن، جگە لەرۆڵی بەرزی دەستەی كامێراو ڕووناكی و دەنگ و مۆنتاژ و موزیك كە رۆڵی باڵایان هەبوو لە جوانكردنی فیلمەكە.
وەك ئەنجامیش دەڵێین:
محەمەد مستەفا بەو فیلمە وێنەیەكی لە فیلمی مۆدێرنی كوردی نیشانداین، كە دەكرێ بەردەوامی بەو رێچكەیە بدرێ و سینەمای كوردی بەرگە كلاسیكیە تەقلیدیەكەی خۆی فڕێ بداو بە زمانی ئەو سەردەمەی پێشكەوتنی تەكنیك بدوێ، بەڵام بەو ناوەرۆكەی ڕاستگۆیانە خزمەتی كولتوورو كۆمەڵگای كوردی بكات، بەو كێشەو ئاریشانەی هەیەتی و ئازادانە دوور لەهەر دەست تێوەردانێك .
پرسی بازرگانی لە سینەمادا پرسێكی ڕەوایە بۆ بونیاتی ئایندەی سینەمای كوردی، بەڵام بەو مەرجەی بازرگانی دوور بێت لە شێواندنی شوناسی نەتەوەیی و كۆمەڵایەتی و ناشیرین كردنیان .
