بۆ ژەنگاڵ … ع. سەرکەش
کاتێ ڕشانەوەی داعش هات
لەگەڵ هەناسە سواریتان هەناسەم تووند دەبوو
لەگەڵ ترس و دڵە ڕاوکەتان زەندەقم دەچوو
لەگەڵ هەنگاوەکانتانا ڕام ئەکرد و
شپرزە دەبووم
چونکە ئەو چاوترووکانە
ئەوسا
نەخوا لەوێ بوو
نە فریاد ڕەسێ
کە ڕشانەوەی داعش هات
لەگەڵ ئێوە دەکوژرام و گولەباران دەکرام
لەگەڵ ئێوە ئەتک دەکرام و
گوێم لە ئەللاهو ئەکبەری
تەگە داوێن پیس و
تەگ گرگنە دەم بۆگەنەکان دەبوو
هەر ئەو ڕۆژە لەگەڵ کچۆڵە و
لەگەڵ کوڕیژگە جوانکیلە
دڵ پڕ ترس و
چاو پڕ ترس و
ڕۆحچووەکانتانا هەڕاج دەکرام و
دەکڕڕام و
دەفرۆشرام و
دەکرام بە کۆیلە
دەبووم کۆیلە
کەچی خوا لەوێ نەبوو
نازانم مردبوو
نازانم چاوەکانی مجرۆ ببوو
نازانم گوێچکەکانی کەڕ و کوند ببوو
نازانم زمانی شکا بوو یان لاڵ ببوو لاڵ!
ئەم دونیایە، بێ خودایەش
خەڵکی ئەم دونیایەش مردبوون
چاویان کوێر و مجرۆ
گۆێچکەیان کەڕ ببوو
زمانیان شکا بوو … بۆ بۆ
نازانم بۆ
کە داعش هات
وەکو ئێوە
وەکو خۆم
کە تەگە داوێن تەڕەکان
داوێنی پیسیان
لە پاکیزاکانتان هەڵدەسوو
لە ڕۆحی منیش دەپەڕین!
ئەوەی ئەوان دەیان کرد
ئەو فەرمانەی ئەوان دەیاندا
بۆ سەر ژەنگاڵ
بینینم و ئەوسا زانیم
خوا نەمابوو
چاوی کوێر و مجرۆ ببوو
دڵی لە ژێر پێی شمشیر بەدەستانی بیابان، لە گیانەڵا بوو
لە ئاوزینگدانی دوا هەناسەی بوو
کاتێ ڕشانەوەی داعش هات
ئێوە ڕاتان دەکرد و
برسی بوون
ئێوە ڕاتان دەکرد و
تینوو بوون
ئێوە ڕاتان دەکرد و
جڕ و جانەوەری ئال سعوود و
سوڵتانی تورکان
بە دواتانەوە بوون وەک ڕشانەوە
منیش وەکو ئێوە سەرا سیمە
لەگەڵ ئێوە ڕام دەکرد
ئەزانم
خوا لەوێ نەبوو
تا فریامان کەوێ
تەنیا شاخ و
تەنیا ئاسمانی چیا ژەنگاڵ مابوو
تەنیا ئاسمان و چیای ژەنگاڵ پشت و پەنا بوو
ڕووی تیبکەین.
ع. سەرکەش
ئوپسالای سوید 2018.08.06
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
