کەڵەشێر شیعری … نزار قەبانی
وەرگێڕانی بەدەستکاریەوە : پشکۆ ناکام
لەگەڕەکەکەمانا
کەڵەشێرێکی خوێن رێژ هەیە
پەڕی هەمو
مریشکەکانی گەڕەکی دەرهێناوە
بەیانیان
بەر دەنوکیان ئەیا
راویان ئەنێ
سواریان ئەبێ
و
دوایی بێ ئەوەی
ناوی یەکێکیان بزانێ
جێیان ئەهێڵێ …
***
لەگەڕەکەکەمانا
کەڵەشێرێک
وەک رۆستەمی زاڵ
هەمو بەیانیەک
بەدەنگێکی زوڵاڵ
ئەقیڕێنێ
بەڕیشە سورەکەیەوە
شەوو رۆژ
دامان ئەپڵؤسێێ
ئەو کەڵەشێرە
تاک و تەنیایە
….. نەمرە
دەسەڵاتێکی
زەبەلاح و بەزەبرە
***
لەگەڕەکەکەمان
کەڵەشێرێکی دوژمنکاری
فاشیستی
هەڵگری .. بیری .. نازی ..
هەیە
کەکاتی خۆی
بەدەبابە
دەسەڵاتی دزی
ئازادی و ئازادی خوازانی
دەست بەسەرکرد
نیشتیمانێکی سڕیەوە
گەلێکی سڕیەوە
زمان و فەرهەنگێکی
سڕیەوە
یادی لەدایک بوونی
مناڵانی سڕیەوە
ناوی هەمو گوڵەکانی
سڕیەوە
***
لەگەڕەکەکەمانا
کەڵەشێرێک هەیە
لە بۆنە نەتەوەییەکانا
بەرگی ژەنراڵ
ئەپۆشێ …!!
سێکس ئەخوا
سێکس ئەخواتەوە
بەسێکسیش
سەرخۆش ئەبێ
سواری پاپۆڕێکی
پڕلە “لاشە “ئەبێ
و
سوپایەک لە “گۆی مەمک “
ئەبەزێنێ
***
لەگەڕەکەکەمانا
کەڵەشێرێکی بەناو
رەسەنی کوردی
هەیە
بەهەزار پیاو
هەمومانی داگیر کردوە
***
لەگەڕەکەکەمانا
کەڵەشێرێکی نەخوێنەوار
هەیە
سەرکردەی یەکێک
لە میلشیاکانی
ئەم ووڵاتەیە
جگە لە راونان و وێرانەکاری
هیچ فێر نەبوە
جگە لەساختەکردن لە
دراوەکان
هیچ فێر نەبوە
بۆی بکرێ
موڵکی باوکی ئەفرۆشێ
ئەڵقەی دەستی ئەخاتە
مەزادەوە
و
دانی مردوەکانیش
ئەدزێ … !!
***
لەگەڕەکەکەمانا
کەڵەشێرێک هەیە
هەمو بەهرەی
گوللەیە
و
بینێ بەسەری
هەرچی ووشەوە هەیە
***
لەگەڕەکەکەمانا
کەڵەشێرێکی شێتی توڕە هەیە
وەک حاجیەک
قسە ئەکا
و
وەک خەلیفەیەک
خۆی بائەیا
و
لەسەکۆی مزگەوت
هاوار ئەکا
خوای گەورە، خوای گەورە
منم دەوڵەت
و
منم یاسا
***
کێ بەدەنگمانەوە دێ
و
دەغڵ و دانمان
چؤن پێ بگا !؟
و
خێرو بەرەکەت
بەئێمەش بگا!
ئەم وڵاتە
خوا تیا حاکم نیە
” کەڵەشێر” ەکەیە
چۆنی بوێ
وا حوکم ئەکا
***
لەلای ئێمە
کەڵەشێرێک یەت و
کەڵەشێرێک ئەڕوات
داپڵؤسێنەر
هەر یەکەو
نابێ بەدوان
دەسەڵاتێکی چەپ ئەڕوخێت
و
دەسەڵاتێکی راست
پەلامار ئەدرێت
و
ئەوەی کە تیا ئەچێ
پێ ی ئەڵێن ، ئینسان
***
کاتێک
کەڵەشێرەکە
بەپەڕی پوخت و رەنگاو ڕەنگ
ئەڕوات
سەرشانی رازاوەتەوە
بە
خەڵات وئەستێرەی
رزگارکردن و جەنگ
هەر مریشکەو هاوارێتی
جەنڕاڵی ناو جێ و
قارەمانی مەیدان
تۆ خۆشەویستی لامان
کۆیلەیەکت ناوێ ؟
نۆکەرێکت ناوێ ؟
پشت شێلانێکت ناوێ
گەورەی هەموان !
***
کاتێک حاکم
چیرۆکەکەی بیست
فەرمانی سەبڕینی
کەڵەشێرەکەی دەرکرد
بەدەنگێکی پڕ لەتوڕەیی
هاواری کرد
چۆن ” کەڵەشیرێک ” ی گەڕەک
دەسەڵاتی منی ” حاکم ”
ئەبا بۆ خۆی ؟!
چۆن جورئەتی کرد !
لەکاتێکا
تەنیاو بێ شەریکم
منی “حاکم ”
شوبات 2018
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
