بەرزاییەکانی فەرامۆشی … ئومێد قەرەنی

لەبەرزاییەکانی فەرامۆشیەوە
با بەسەر وشەکانمەوە دەمرێت و
گوریسەکان گەمارۆی هەڵاتن دەدەن

هێشتا دایکم لەچیاکانە،
دڵی لەشمشاڵێکی قامیشدا
هێدی هێدی لێدەدا
بەناو کێڵگەی مینەکاندا
بەپێ دزکێ دێت و دەچێت،
تەڵە بۆ خۆشبەختی دەنێتەوە !

باهۆز هه‌ڵدەکا و
چیمەنەکان دەبن بەبەرد
زیخی جیایی باریونەتە چاوەکانی
وەک ئەسپێکی کێوی گلاو
:باوکم دەیویست بڕبڕەی پشتی
چارەنووس بکات بە کاڵانی شمشێرەکەی

قەلە ڕەشێکی پایزی
لەسەر بانێژەکە نیشتووە
با بەسەر باڵەکانیەوە دەمرێت
لەبەرزاییەکانی نادیاریەوە

بابەسەر نەستەوە دەمرێت
وەک مێوژی بەرهەتاو
وشک دەبنەوە ، خەونەکان
لەبەرزاییەکانی فەرامۆشیەوە
تەنانەت وەک خەونیش نامێننەوە
خەونەکان
_________________________________________

ئومێد قەرەنی

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.