Skip to Content

كورتە چیرۆك …دایكینی …. عبدالرحمن بامه‌رنى

كورتە چیرۆك …دایكینی …. عبدالرحمن بامه‌رنى

Closed
by ئاب 27, 2018 General, Literature

بەری ئەم ژ ئێك بهێینە ڤەقەتاندن، تەمەنێ‌ وی ژ هەشت حەفتیان دەرباز نەببوو.. ئەو ما ل زوزانا و ئەز بەرەڤ دەشتێ‌.. ئەو كەتە ناڤ دەستێن ژنبابێ‌ و ئەز كەتمە ناڤ دەستێن نوژداران.. ژنبابا وی، دەیكینی بۆ كر و دەیكا من، ژنبابی بۆ من..
ئەڤە خوە ل سالێن سیهاندا و دلوڤانیا دەیكینیێ‌ ناهێلیت، گیانێ‌ من بەرەڤ عەسمانان بچیت.. هەر پێنگاڤا ئەو بهاڤێژیت، ئەز دگەل ویدا مە و ئەز دزانم ئەو چەند پێدڤی منە.. پشتی سالەكێ‌ بتنێ‌ ل ئینانا من بۆ دەشتێ‌، قەدەرێ‌ بابێ‌ وی ژ دەشتێ‌ ژی پێداتر بر.. دبێژن بیابانێ‌ ئەو داعویرایە و ئەز ل دەشتێ‌ سنگە پێ‌ بوویمە و ئەو ل زوزانا دناڤ دەستێن ژنبابێدا..
ئەز دزانم ئەو چەند پێدڤی مەیە، ئەو پێدڤی دەیكەكا دروستە، بۆ لایە لایێ‌ و لوریكان بێژیت.. ئەو پێدڤی بابەكینە، خوە ل وان بكەتە خودان و بابینیێ‌ بۆ بكەت..
من ئەو هێلا و هێشتا ب سەر پەپیكا نەكەفتبوو، بابێ‌ وان ئەو هێلان و چارەنڤیسێ‌ وی ژیێ‌ وان باشتر نەبوو.. ئەز دكەمە ئەگەرێن وی و دبێژمێ‌ بلا تە خوە رادەست نەكربایە و ئەو دكەتە ئەگەرێن من و چاوا من پشتدا زارۆكێ‌ دوو هەیڤی!..
ئەو چەند پێدڤی مە هەردووكانە و ژ هینگێ‌ وەرە، هەر دەما تاریێ‌ دەهمەنێن خوە ب سەر عەردیدا كێشان، جار ئەز خوە بەرددەمە عەردی و ل پشتا سەرێ‌ وی و تا ئەلندا سپێدێ‌ د هەلێت، نەفرەتا لخوە و قەدەرێ‌ دبارینم و لاڤان بۆ دكەم، ژیارا وی ژ یا مە باشتر بیت.. هەر شەڤا دبیتە گەرا وی، چاڤێن وی ژ گریێ‌ سوور دبن و د وەرمن و ئەز دزانم، ژیارا زارۆكێن وی چەندا سەختە و نەفرەتا لخوە و هەر تشتی دبارینیت..
من گوتێ‌:
ـ ئەو چەند پێدڤی مەنە، ئەو پێدڤی بابەكینە چاڤدێریێ‌ بۆ بكەت و ئەو پێدڤی دەیكەكا وەكی منە، ل بەر سینگا خوە ئارام بكەت و بنڤینیت..
ئەوی دگوتە من:
ـ پێدڤییا وان بمە نینە، زەلام تژی رەخ و دوورێن وانن و دێ‌ شێن ژیارا وان یا سەخت بۆ ئاسان كەن و ژنبابا وێ‌ ژی یا دەیكینیێ‌ بۆ دكەت..
من دزانی كارێ‌ ژنەكێ‌ چەندا بزەحمەتە، تژی رەخ و دوورێن وێ‌ زارۆكێن هیر هیرك و زەلامێن ل رەخێن وێ‌، بچاڤێن مێیەكێ‌ تەماشای وێ‌ بكەن.
ئەڤە بیست و هەشت سالە و د چوار سالێن ئێكێدا، هەر شەڤا گەرا من با، ئەز ل بەر سەرێ‌ وی یا روونشتی بووم و گەلەك جاران من ژ لاندكێ‌ د ئینادەر و من ل سەر پێن خوە دنڤاند.. هەر شەڤا گەرا وی با، ئەو لهنداڤی ژنبابا وییا بۆ وان بوویە دایك و باب د روونشت و كت كتە زارۆكێن خوە د نخافتن و ب ئەنیێن وانڤە ماچیدكر..
ئەڤە بیست و هەشت سالە جار گەرا منە و جار گەرا وی، نە ئەو شیایە دڤان بیست و هەشت سالاندا ببیتە بابەكێ‌ باش و هەڤژینەك باش و زارۆكێن خوە لدوورێن خوە كومڤەبكەت.. نە ئەز شیایمە، ببمە دەیكەكا باش و كورێ‌ من سەروچاڤێن من باش مێزە بكەت و من تێر هەمبێز بكەت..

عبدالرحمن بامه‌رنى

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next