Skip to Content

وڵاتی شەیدایی   …  مارف عومەر گوڵ

وڵاتی شەیدایی … مارف عومەر گوڵ

Closed
by شوبات 12, 2019 General, Poems

ناحەوێتەوە ،
دڵ دێوانەیە لە دووریت ،
چرایەکی بەدەستەوەیە ،
بردمی بەرەو سنورێکی دوور دوور ،
ئێوارە چوومە باوەشی هەور
ئەوەندە باسی ئەستێرەی بۆ کردم ،
تا تاریک داهات و کەوتە جریوە بەسەر سەرمەوە
هێشتا مەیە ، عەشق و شەیدایی
لەودیو هەورەوەیە ،
هەتا باڵ نەگری مەیە !
ئەو ڕێگایە پێدەزانی ،
دەگاتە خەرمانەی مانگی شەیداییم
یا هێشتا باڵی فڕینت بێ پەڕە ؟
هێشتا لەماڵ مەیە دەرێ ،
تەپوتۆزی لەناکاوی جەنگی ژیان
بیناییت ڵێڵ و چاوی منیش کوێر دەکات
جارێ چاوەڕێ بە ،
هەتا عەشق ئەبێتە سنەوبەرێکی کەڵەگەت
جارێ چاوەڕێ بە ،
لە دەمەو بەیانیەکا من بە تەپڵی شادمانیەوە
مژدانەیەکم پێیە بۆم هێناویت
تۆ بە پەڕوباڵی خۆتەوەو
من بەڕێگایەکی تردا ،
دەچینەوە بۆ وڵاتی شەیدایی !
هێشتا مەیە ، عەشقت زەرنەقوتەیە
ئەم جەنگی باروتە دەتپڕوکێنێ
خەرمانەی شەیداییم وێران مەکە
بێ ماڵ و حاڵ دەمێنمەوە
هێشتا مەیە
هێشتا پەپولە ناوێرێ قۆزاخەی گوڵ جێ بهێڵێ ،
ماڵی خۆت و ماڵی منیش وێران مەکە ، مەیە
سەرتاپای ژینم ،
بەسەر باڵەخانەی شەیداییمەوە
هێلانەیەکم بۆ تۆ دروست کردوە ،
هەر من دەزانم باڵی بەختەوەریت
بۆ کوێم دەبات !
لەم پەرێشانیەدا خۆت بگرە ،
لەو خەڵوەتی بێ پەڕ و باڵیەدا بحەوێوە ،
لە دەمەو بەیانێکدا پەیدا دەبم !

٢٦ – ٢٧ / ٦ / ٢٠١٨
کەرکوک – سلێمانی
تێبینی: ئەم شیعرە لە ڕۆژنامەی کوردستانی نوێ / ئەدەب و هونەر ، ژمارە (٧٧٦٦) لە ١٧/١/٢٠١٩ بڵاوکراوەتەوە.

Previous
Next
Kurdish