چەکی کاریگەر لە دژی هێرشی کێمیاوی حکومەت بۆ سەر قوتابخانەکان مانگرتنی مامۆستایان و خوێندکارانە!.. حامید تەقوایی
وەرگێڕانی بۆ کوردی:کاوە عومەر
تا ئێستا زۆرێک لە دامەزراوە و ڕێکخراوەکان ئیدانەی کیمیابارانی قوتابخانەکانیان کردوە و داوای کۆبوونەوە و ناڕەزایەتیان دەکەن. لە نێویاندا شورای هەماهەنگی ڕێکخراوەی پەروەردەکاران، کۆمەڵێک لە خوێندکارانی زانکۆی شەریف، زانکۆی ئازادی تاران، خوێندکارانی ئازادیخوازی زانکۆی خواریزمی، یانەی نووسەران، خوێندکارانی شۆڕشگێڕی تاران، سەندیکای کرێکارانی قامیشی شەکری هەفت تەپە، ڕێکخستنی خوێندکارانی پێشکەوتنخواز، و چەند دامەزراوە و ڕێکخراوێکی تر. ئەم بانگەوازانە ماوەی لە ڕۆژی شەممە ١٣ تا ١٧ی ئازار، ڕۆژی جیهانی ژنان دەگرێتەوە و دەکرێت سەرەتای هێرشێکی بەرفراوان بێت بۆ سەر حکومەت، بەڵام پێویستە لەوە زیاتر بڕوات. کۆبوونەوەی ناڕەزایەتی لە بەردەم قوتابخانەکان و لە حەوشەی زانکۆکان و شەقامەکاندا میحوەرێکی گرنگە بۆ بەرەنگاربوونەوەی هێرشی کیمیاوی ڕوو لە زیادبوونی حکومەت بۆ سەر قوتابخانەکان، بەڵام ئەمە بەس نییە. ئەم سیاسەتە تاوانکارییە دەکرێت و دەبێ بە مانگرتنی سەرتاسەری لەناو بچێت. بەتایبەتی چاوەڕوان دەکرێت مامۆستایان وەک ناڕەزایەتییەک بەرامبەرهێرشی کیمیاوی قوتابخانەکان لەلایەن حکومەتەوە مان بگرن و ڕای بگەیەنن کە ناگەڕێنەوە ناو هۆڵەکانی خوێندن تا ئەوکاتەی فەرماندەران و ئەنجامدەرانی ئەو تاوانە دەستنیشان نەکرێن و ئاسایشی قوتابخانەکان نەپارێزرین. هەروەها پێویستە خێزانەکان خۆیان لە ناردنی منداڵەکانیان بۆ قوتابخانە بەدوور بگرن. ئەم کارە دەکرێت بە مانگرتنی قوتابیان تەواو بکرێت و تەواوی سیستمی پەروەردەیی حکومەت بخەوێنرێت.
لە لایەنی ئینسانیەوە مانگرتن کارێکی بەپەلە و دەستیجێیەە. قوتابخانە و بەشەناوخۆییەکانی خوێندکاران کە ڕۆژانە زیاتر و زیاتر دەکرێنە ئامانجی هێرشی کیمیاوی، شوێنێکی سەلامەت نین بۆ خوێندکاران. پێویستە قوتابخانەکان دابخرێن بۆ ڕزگارکردنی ژیانی منداڵەکانمان.
دەگوترێ مەبەست لە ژەهراوی کردنی زنجیرەیی ڕژیم بۆ قوتابیان داخستنی قوتابخانەی کچانە و هەر بۆیە نابێ مانگرتن بکرێ. هەندێک کەس هۆکاری ژەهراویبوونەکان دەگەڕێننەوە بۆ باندی ماددە هۆشبەرەکانی حکومەتی تاڵیبان و پێیان وایە ئامانجی حکومەت بێبەشکردنی کچانە لە خوێندن. بەڵام ئەمانە بۆچوونی دروست نین. ئێران ئەفغانستان نییە و کچان لە ماڵەوە ناهێڵرێنەوە، ئەوەش لە دڵی شۆڕشی ئێستای ژناندایە. حکومەتیش ئەمە دەزانێت. ئامانجی سەرەکی دەسەڵاتداران وەک لە حاڵەتی هێرشکردنە سەر فڕۆکەی نەفەر هەڵگر و سووتاندنی زیندانی ئەڤین، ترساندن و بەلاڕێدابردنی زەین لە قەیرانێکەوە بۆ قەیرانێکی تر. پێیان وایە دەتوانن کۆمەڵگا بترسێنن. بەڵام ئەگەر نوخبە دەسەڵاتدارەکانی ئێران لەگەڵ ئەفغانستانیش تێکەڵیان کردبێت، پێویستە بە مانگرتن وەڵامیان بدرێتەوە. مانگرتنێکی یەکگرتووی مامۆستایان و خوێندکاران بە داواکارییەکی ڕوون بۆ ڕاگرتنی دەستبەجێی ژەهراویکردنەکان و دەستگیرکردن و دادگاییکردنی تاوانباران و بەرپرسانی ئەم تاوانە و پاراستنی ئاسایشی ژینگەی پەروەردەیی گورزێکی بەهێز دەبێت لە حکومەت.
هەندێک مانگرتن بە پێچەوانەی کۆبوونەوە و خۆپیشاندانی ناڕەزایەتی دەزانن. ئەمەش تیۆرێکی دروست نییە. بەپێچەوانەوە مانگرتنی قوتابخانە و زانکۆکان هێزی قوتابیانیش دەهێنێتە مەیدان و گردبوونەوە و خۆپیشاندانی ناڕەزایەتی لەبەردەم قوتابخانەکان و حەوشەی زانکۆکان بەهێزتر دەکات. داخستنی سیستەمی پەروەردە، کە ئەمڕۆ بۆتە سیستمی تاوان بەرامبەر بە خوێندکاران، توانای ئەوەی هەیە کە مانگرتنی چینەکانی دیکەی کۆمەڵگا، کرێکاران و بازرگانان و هتد، سەرەتای دەست پێکی مانگرتنی گشتی و لێدانی گورزی کۆتایی بێت لە دەسەڵاتی تاوانکاری کۆماری ئیسلامی.
هیوادارم ئەو دامەزراوەو و ڕێکخراوانەی داوای ناڕەزایەتی دەکەن، بەتایبەتی ئەنجومەنی هەماهەنگی یەکێتییەکانی پەروەردە، هەنگاوێکی تر بەرەو پێشەوە بنێن و بانگەواز و ڕێکخستنی مانگرتن و داخستنی قوتابخانەکان بخەنە کارنامەی خۆیانەوە. ئەمە بابەتێکی بەپەلەیە. ئاخر ژیان و تەندروستی منداڵەکانمان بەستراوەتەوە بەم کارەوە. تا ئێستا زیاتر لە هەزار منداڵ و تازەلاو ژەهراوی بوون و کەوتونەتە نەخۆشخانە و دوو کەسی ئازیزمان بە ناوەکانی فاتمە ڕەزایی و ساناز جەمشیدی بەهۆی ژەهراوی بوون گیانیان لەدەستداوە. با نەهێڵین هێرشی کیمیاوی دەسەڵاتداران بۆ سەر قوتابخانەکان منداڵ و لازەلاوانی زیاتر بکاتە قوربانی.
١٣ی ئەسفەند ١٤٠١، ٤ی مارسی ٢٠٢٣
