Skip to Content

چیرۆک\ شەوەکی.. مەریەم کاکایی

چیرۆک\ شەوەکی.. مەریەم کاکایی

Closed
by ئازار 7, 2023 General, Literature


هەموومان به دەور ئاگرێكى هێڵ له نێو تەنەکە ڕۆنى نەباتى “قو” كۆبووينەتەوه . پياوەكان جزمەى درێژ و ڕەشيان له پێيه. ژنەكان به فۆته سپييەكانيان بان دەميان داوه و لەگەڵ قسەكردنياندا هەڵاوى سپی دێتەدەر . من دەسته هەڵقليشاوەكانم لە پێش ئاگرەکە ڕائەگرم و به پەنجە بچووکەکانم هەوڵ ئەدەم گەرماى ئاگرەكه بگەیەنمه لووته ڕچيوەكەم. پياوەكان جامانەيان بەسەر و گوێلاكيانەوه پێچاوه و شەرواڵى كوردييان له پێيه. “سيف زەمينى” وشەيەكى تازەيه بۆ من. يەکێك له پياوەكان به دەسته ئەستوورەكانى چوار پێنج دانه پەتاتە فڕێ ئەداتە ناو ئاگرەكەوە و چاوى ئەنووقێنێ تا ئەو پزویزکانەى لە کاتی هەڵدانى سيف زەمينييەكاندا تێكەڵی دوكەڵى ئاگره كه بوون، به چاويا نەچن. ددانێکی زۆر، بە بۆچوونی من زياتر له پێويست، له ناو دەميدان. به پێكەنينێكى ميهربانەوه به من ئەڵێ : بچكۆڵ وەره پێشەوە. ئەها ئەم سیف زمینیانەش بۆ نیوەرۆجەمان ئەبرژێنین…. پێئەکەنێ و ئەڵێ : قاش قاشیان ئەکین و خوێان پێیا ئەکەین و بە نانەوە ئەیخۆێن.
من له شەرما سەرم ئەخەمه خووارەوه، خۆم لە پشت پورە بەهێ ئەشارمەوە. له ناخەوەش خۆم سەرزەنشت ئەكەم كه بۆچى سەیری ئەوم كرد.
دەنگى مەڕ و ماڵات له كوشتارگەکەوه دێت. پياوێكى باڵا بەرزی سمێڵ ئەستوور له ساڵۆنى كوشتارگەکەوه دێته دەرێ و به ئەرەقگيرێكى کەسك و مۆر دەستى ئەسڕێ. جزمه ڕەشە لاستیکیەكانى تەڕن و ئەبریقێنەوە، بەمانى تر ئەڵێ: وەرن كوشتەكان ئامادەن. پياوەكان به گەپ و قسه و پێكەنينەوه له نێو كيسه گونييه سپييەكانى دەستيان چەقۆ و ساتوورەكانيان دەرئەهێنن. پياوه ميهرەبانەكەش بەدەم جگەرەکێشانەوه، چەقۆكەى تيژ ئەكات و بەرەو ساڵوونى كوشتارگەكه ئەڕوات. ئاگری نێو تەنەکەكە كز بووەتەوه و پشكۆكان سوور سوور ئەبريسكێنەوه. دوای چەند چرکەیەک ژنەكانیش به شوێن پياوەكاندا ئەچن و ئێمەيش پۆلێک مناڵى قەدو نيوقەد دووایان کەوتووین. هەموو ئەرزی ساڵوونەكه پڕه له خوێناو. ئەختيارێک به سۆندە ئاوێکەوه زەويەكه ئەشوات. ژنەكان پاڵدمی گجی و چەمکی کەواکانیان کۆ ئەکەنەوە و ئەیکەنه نێو تلیشی کەواو و گیرفانەکانیانەوە. ئەو بڕە پیم و بەزانه كۆ ئەكەنەوه كه بەدەم ئاوەكەوه بەرەو جۆگەلەكە ئەرۆن. ئەم بەزانه به خۆڕايين و ژنه ئاوارەكانى ئۆردوگاى كامياران رۆژانه دێن و بۆ مناڵەكانيان ئەيبەن. قەسابەكان سپڵ و سییەكانيشيان ئەدەنێ. من دەستى ميم بەهێم گرتووه. ميم بەهێ پێم ئەڵێ: ئابەقوربانت بم ڕوڵە… بڕۆ ئەو سپڵەم بۆ بێنه نيوەڕۆ بۆت سوورى ئەکەمەوه. من به قسەى ئەکەم لەگەڵ ئەوەشدا حەز ئەکەم نيوەرۆ لە سيف زەمينیە برژاوکانی نێو ئاگرەکە بخۆم.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish