تەنز/ جەلۆ و عەلۆ.. عەبدولڕەحمان فەرهادی
برادەرێکی هاوزای خۆمم هەیە ناوی فەهمی یە، ئەوێ ڕۆژێ گوتمێ: فەهمی گیان، دوای ئەم نەخۆشییە قورسەت، ئیتر کاتی ئەوەیە بەتەنگ تەندروستیتەوە بیت، لەمەودوا بەسە و چیتر نامەوێ جگەرە لە پەنجەکانتەوە ببینم و هەوڵدە خواردنەوەکەیش وردە وردە کەم بکەیتەوە، ئەی ئەوە نییە دختۆر لێی مەنع کردوویت! وەرامی دامەوە: پیاااااح! بەخوا گێلیت! شێتە، ئەوە تۆ لەگوێی گۆلکەسۆر نوستوویت؟ بەخوا ئاگات لە هیچ نییە! شەش مانگیش دەبێ فڕم لێی نەداوە و ئێستا کە بۆنی ئارەق و جگەرەیشم بۆ دێت، قێزم لێیان دەبێتەوە و یەکسەر ئیستیفراقم دێ، ئیتر تەواو! بەشەرەفم باوەڕکە تەواو. زۆر کەیفم هات و لەدڵی خۆم گوتم دیارە دنیا باش گۆڕاوە! لەو گفتوگۆ و چەقەچەقەمان، برادەرێکی دیکەمان لە تەنیشت دانیشتبوو، وادیاربوو فشەی بە فشەکانی فەهمیی فشەستوور دەهات! شەوی دواتر ئەو برادەرەم وێنەیەکی فەهمیی بەدەم جگەرەکێشان و پەیمانە هەڵدانەوە لەڕێی وەتساپ بۆ ناردم و لێی نووسیبوو “نها”. ئەو فشەیەی فەهمی سەربردەی دوو برادەری هاوبادەی بیرخستمەوە با بۆتانی بگێڕمەوە:
دوو برادەری گیانی بە گیانی هەبوون، ناویان جەلۆ و عەلۆ بوو، ئەم دووە بێ یەکتر هەڵیان نەدەکرد، شەوانە بەدەم جامی بادە و مەزەی جۆراوجۆرەوە بەسەریاندەبرد، شەوێکیان جەلۆ بە عەلۆی گوت: عەلۆ گیان وەسییەت بێ ئەگەر من مردم، لێرە لەسەر ئەو مێزە لە خواردنەوە بەردەوامبە، جگە لەوەی ئارەق بۆخۆت بانگ دەکەیت، دەبێ لە غیابی منیش عارەق و مەزە بانگ بکەیت، وەک ئەوەی چۆن ئێستا منت بەرانبەرە! ئاوا بۆخۆت هەمووی نۆشکە، عەلۆ ڕازی بوو و داواکەی پەسەند کرد و گوتی: بەسەرچاو جەلە گیان، بەڵام کێ دەڵێ من پێش تۆ نامرم! ئەگەر منیش مردم توخوا تۆیش هەمان شت بکە. جەلۆ سەری ڕەزامەندیی بۆ لەقاند، ئیتر ڕێککەوتن و دەستیان نایە دەستی یەک. دوای ساڵانێک، شەوێکیان پاش هەڵقوڕاندنی قاپێ ئارەقی تام ڕازیانە، عەلۆ لەکاتی گەڕانەوەی بۆ ماڵەوە، لەنزیک گۆڕستانی ئیمام محەمەد، بەردەبێتەوە و حەییاتی لەبەر دەبڕێ. جەلۆ بێ هاوبادە مایەوە و یەکەم شەوی تەنیاییی، بە مەڕبێنی بۆی یانەکەی گوت: مەڕبێن گیان، شەوانی پێشوو چیت بۆ من و عەلۆ دێنا، بێ کەم و زیاد هەر ئەوە بێنەوە، واتا بەشەکەی عەلۆش بێنە و ئیتر من هەمووی دەنۆشم. مەڕبێن بەردەوام جگە لە ئارەق و مەزەکەی جەلۆ، ئارەق و مەزەی عەلۆیشی دەهێنا و هەمووی لەبەردەم جەلۆ لەسەر مێزەکە دادەنا، ئیتر جەلۆ جارجارە بەدەم فرمێسک هەڵڕشتنەوە پەیمانە لەدوو پەیمانەی هەڵدەقوڕاند، دۆستانی جەلۆ ئامۆژگارییان دەکرد و دەیانگوتێ: جەلۆ گیان، ئەگەر ئاوا بڕوات و تەرکی نەکەیت، تۆش شەوێکیان لەو ڕێوبانانە سەگتۆپ دەبیت! جەلۆ فشەی بەم قسانە دەهات و بەرسڤی دەدانەوە: قوربان نەک هەر سەگتۆپ، بەڵکوو سەگتۆپ و کەرتۆپ!.. شەوێکیان جەلۆ بە مەڕبێنی گوت: مەڕە گیان بڕۆ هەر ئارەق و مەزەکەی خۆمم بۆ بێنە، لەوەی عەلۆ گەڕێ! مەڕبێن گوتی: بەسەرچاو جەلە گیان، بەڵام توخوا پێم بڵێ چۆنت دڵ دێ وەسییەتی عەلۆی ڕەحمەتی بدەیتە بەر لووشکە و فەرامۆشی بکەیت؟
جەلۆ وەرامی دایەوە:
مەڕە گیان من خواردنەوەم تەرک کردووە، ئەوەی داوای دەکەم کە بۆم بێنیت، هەر ئەوە دەخۆمەوە کە بەشەکەی عەلۆیە و بە خەیاڵی وییش هەڵدەقوڕێنم، ئیتر من خۆم تەرکم کردووە و تەواو!
