هەڕەشەی حکومەتی کات بەسەرچووی هەرێمی کورستان لەفەرمانبەران، هەڕەشەیەکی مافیاییە!.. تاهیر عیسا

لەناو جەستەی بۆگەن کەوتووی حکومەتی هەرێمی کات بەسەرچوودا، ڕۆحی میلیشیایی و مافیایی هاوار دەکات.
ئەم حکومەتە سەلماندی کە نیگەرانی وترسی فەرمانبەران لەهەژماری من ،لەجێگای خۆیدایە.ئەوان دواجار هەڕەشەی ئەوەیان کرد کە ئەگەر فەرمانبەران هەتا کاتی دیاریکراو لەهەژماری من ئەکاونتیان نەکەنەوە، موچەکەیان دەبڕدرێت.
ماوەیەکی زۆرە دوابەدوای ڕیفڕاندۆمە شکست خواردووەکەی بنەماڵەی بارزانی و بەرتەسک بوونەوەی قەڵەمڕەوی حکومەتی هەرێم و لەدەستدانی ناوچەدابڕێندراوەکان و گەڕانەوەی هەرێم بۆ دۆخی بەرلەدۆخی دیفاکتۆیی، پارسەنگی هێز، لەنێوان هەرێم و ناوەند، بەقازانجی ناوەند وەرچەرخا، لەوساوە مشت و مڕ لە نێوان حکومەتی هەرێم وناوەند، بەچەند ئاقارێکدا گوزەری کردووە، هەر لە مایەپووچبوونی سیاسەتی ئابووری سەربەخۆو قەرزاربوونی حکومەت بەزیاتر لەسیی و سێ ملیاردۆلارو هەتا دەگات بەڕاگرتنی هەناردەی نەوت لەڕێگای بۆڕیەوە و هەڵوەشانەوەی پەڕلەمانی ماوە درێژکراوەو بەسەرچونی ماوەی کۆمیسیۆنی هەڵبژاردنەکانی کوردستان و، ئاڵ و گۆڕ لە ژمارەی کورسیەکانی پەڕلەمان و کۆتاکان و ئاڵ وگۆڕلەبازنەی هەڵبژاردنەکاندا لەبازنەیەکەوە بۆ چوار بازنەو…هتد، هەموو ئەمانە مەیدان گەلێک بوون، کە حکومەتی ناوەند لەڕێگای دادگای فیدڕاڵیەوە هەل ومەرجی سیاسیی و ئیداریی و ئابووری فەرمانڕەوایانی حکومەتی هەرێمی بەتایبەت پارتی تیادا لەمه نگەنەداوە .ئێستاش مەسەلەی مشت ومڕی تەوتینی موچەو هەژماری من، وەک مەیدانێکی دیکەی ململانێی نێوان هەرێم و بەغدا، لەنێوان هەژماری ئەوان و تەوتینی ناوەنددا، سەرباریی پێداگریی دادگای فیدڕاڵی ناوەند، لەسەر تەوتین، بەهەڵواسراوی ماوەتەوە. وە لەلایەکی ترەوە کۆنتر لەم مململانێی نێوان حکومەتی هەرێم وحکومەتی ناوەندە، ململانێی زیاتر لەسی ساڵەی نێوان حکومەتی هەرێم و خەڵکی کوردستانە، بەتایبەت فەرمانبەران و موچەخۆرانی، چەندین ساڵە لەگەڵ ناشیرینترین نموونەی حوکمڕانی لەدنیادا دەست و پەنجە نەرم دەکەن، مانگرتن و بایکۆت و هەڵڕژانە سەرشەڤامەکان، بەتایبەت لەزۆنی سەوز، لەسەر موچەو قوت و لێبڕین و پاشەکەوتکردن، بەشێکی بەردەوامی سیراعی نێوان حکومەت و موچەخۆران بووە، تا دواجار کار بەوە گەیشت، مووچەخۆران تەواوی متمانەیان بەرامبەر بەم حکومەتە خۆماڵییە لەدەستبدەن و گواستنەوەی ناوەناوەی ناڕەزایەتیەکانیشیان بۆ ناوەند، دادگای فیدڕاڵی ناوەندی ناچار بەبڕیارێک بەقازانجی موچەخۆرانکرد، کەتەوتین و موچەدانە بەفەرمانبەر وەک باقی فەرمانبەرانی دیکەی عێڕاق، بەڵام فەرمانڕەوایانی حکومەتی ماوەبەسەرچوو، هەتا ئێستاش نایانەوێت بڕۆنە ژێر باریی بڕیارێک کەلەقازانجی موچەخۆرانی هەرێم بڕیاری لەسەردراوە. هۆکارەکەش زۆر ڕۆشنە، فەرمانڕەوایانی هەرێم، وەک بنەماڵەی دزو مافیاو گەندەڵ، تەنیا شتێک کە دەتوانن بۆ ئیدارەی پێگە ناشیرنەکەیان لەدەسەڵاتدا بەدەستەوە بگرن، هەژماری منە. هەژماری من بۆ ئەوان ، واتای درێژەدانە بەو ناوی ژێردیوارانەی کە دەیانەوێت ئەوان تەنیا ئەرکیان ناردنی لیستی موچەخۆران بێت، بۆ وەزارەتی دارایی ناوەندو ناوەندیش مووچەی مفت تەسلیمی ئەوانی بکات و ئەوانیش دوای لێدەرکردنی حیساب و کیتابی خۆیان ئینجا بۆ بانقەکانی بنێرن، بەڵام نازاندرێت هێشتا هەڵوێستیان لەبارەی بڕینی موچەی هێزەکانی ڕۆژی سەربەئەردۆغان و ناپاکی سەر بەیەزدان پەنای بەکێگیراوی بنەماڵەی بارزانی، لەلایەن ناوەندەوە چی دەبێت؟ وەلەهەمان کاتیشدا هەژماری ئەوان، ڕێگایەکی دیکە دەبێت، بۆ بەبارمتەگرتنی بەردەوامی موچەی فەرمانبەران، هەتا لەهەر کاتێکدا پێویستی کرد، لەو ڕێگایەوە جڵەوی فەرمانبەران لەڕێگای دەستگرتن بەقوتیانەوە بگیرێت. دەنا لەڕاستیدا لە هەر پێگەیەکی ستانداردی حوکمڕانیە جۆراوجۆرەکانی دنیای مۆدێرنەی ئەمڕۆدا، فەرمانبەر ئازادە لەوەی لەکام بانقدا هەژماری بانقی دەبێت وە لەهەمان کاتیشدا ئازادە لەوەی لە چەندین بانقی جۆراوجۆری دیکەدا هەژماری هەبێت! بەڵام، تەنیا یەکێ لەهەژمارەکانی ئازادانە تایبەت دەکات بە موچەیەک یان بیمەیەک لەهەردوو حاڵەتی سەرکاریی و بێکاریدا، ئینجا چ لەلایەن دام و دەزگای دەوڵەتیەوەبێت یان لەلایەن کۆمپانیا جۆراوجۆرەکانی سەرمایەدارانەوە بێت، ئەوا مووچەکەیان، یان بەدوو حەفتەجارێک یان مانگانە بەجارێک،دەڕژێندرێتە حیسابەکەیانەوە، ئەمە مافێکی بێچەندوو چوونی هەر فەرمانبەر یان کرێکار یان بێکارێکە لەناو دنیای مۆدێرنەی ئەمڕۆدا. بەڵام وادیارە حکومەتی ئێکسپایەری مەسرورو قوبادی داویی(بەن) دوای هەمبانێ، پێچەوانەی ئەم دنیای ستانداردە، دەیانەوێت لەڕێگای هەڕەشەی موچەبڕینەوە، فەرمانبەران ناچار بە وەبکەن بڕۆنە ناو هەژمارێک کە دیارە بانقەکەشی سەربە مەسرورو بنەماڵەکەیەتی و لەو ڕێگایەشەوە دەیانەوێت سودێکی یەکجار زۆر بۆ خۆیان هەڵلوشن.

تاهیر عیسا
17.07.2024

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.