ڕاپۆرت بۆ دۆنکیشۆت.. شیعری نەوزاد بەندی

نزیکەی هەمو کوژراوەکانتان
هی شەڕەکانی براکوژیی بوون ..
خەباتتان تەنها شەڕە جنێو و
دیوار نوسین و بمرێ بژی بوون ..

کە بە داخوازی ئەمریکا لە پڕ
ئەم دارە زڕە هاتە بەر بۆتان ..
پەلامارتان دا لە هەر چوار لاوە
دزی و وەڕە وەڕ ، لە خەڵک و خۆتان

تەلار ..باخ ..ڤێلا ، دوکان و بازاڕ
بیری نەوت ، مەسفا ، بەنزینخانەی زۆر
هێنانی کچی سەماکەری شام
بەڕاست و چەپا ، زیان وەک مشەخۆر

هەر زوو گێمێکی براکوژیتان ،
کرد بە پاشماوەی ئەنفالی بێکەس
بەشێکتان ناو نا لیوای تایبەت و،
بەرامبەرەکەی کۆماندۆی بێ دەس

دەهەزار کەسێ لەم یارییەتانا
ناویان چوو به ناو کۆڵەکەی ئاشا
ئیتر ڕۆژ بە ڕۆژ خەڵک ئەتوایەوە و
گەورەتر ئەبوو شکڵی دوو پاشا

دەرمانی ساختە ، تیمارگەی قۆڵبڕ
خواردنی خراپ بازاڕی پڕ کرد
شێرپەنجە وەکو پەسیوی لێهات ،
هەر لە ژێرەوە هەژارتان قڕ کرد

کۆمپانیا و باج و سەرانەی جیاجیا
لە هەموو لایەک هەڵپە بۆ دۆلار
بەربوونە گیانی خاکی نیشتمان ،
وەک گورگی برسی ..وەکو سەگی هار ..

هیچ نەمایەوە گڵاوی نەکەن ،
بوون بە سیخوڕی هەرچی ووڵاتە
هێشتا لە ڕووتان دێ قسە بکەن ،
هەر چرکەیەکتان سەد کارەساتە ..

بۆ یەکەمین جار لە مێژووی گەردوون ،
دەمتان ژەندە ناو موچەی فەرمانبەر
شەرمەزار نەبوون ، چونکە بێ شەرمن ..
لە دەرد و کێشەی میللەت بێ خەبەر ..

ئامۆزا و برا و خزم و ناسیاوتان
کران بە وەزیر ..بە پەرلەمانتار
بەس کورسی سەرۆک هەر یەک کورسییە
شەڕە لە سەری نەک جارێ سەد جار

شەڕی سندوقی هەڵبژاردن تا ،
شەڕی سیخوڕی و پشکی ئەم و ئەو
یەکێ لە ئێران تەپ و تۆز ئەکا و
یەکێ بۆ تورکیا ڕا ئەکا بە شەو

کوشتنی دیل و ڕادەستکردنەوەی
بە دوژمنانی کورد و کوردستان
ئەوەی کە دژی ئەم میللەتە بوو ،
جێبەجێتان کرد ، هیچ لێی نەوەستان ..

ئێستایش چی ماوە بیکەن بەو خەڵکە ؟
لە گەڕاندان بۆی ، تاکو پیادەی کەن ..
هەرچییەک ژەهر و دەرد و بێ کەڵکە ،
پێشبڕکێتانە تا ئامادەی کەن ..

بەس دڵنیابن ، هەرچی هەتانە ،
لە پڕ ئەبێتە تاریکە گۆڕێ ..
چاو تروکانێک ، هەمووی جێ دێڵن ،
سەدا سەد بار و دۆختان ئەگۆڕێ ..

بەس بە داخەوە ، ئێوە بێ ئاگان ،
ئاڵودەی پارە و پولی حەرام بوون ..
تا لوتتان نەدا لە بەردی ئەلحەد ،
لە لاتان وایه براوەی جام بوون