میزەڕێ.. نووسینی: ئامانج شێروانی
لە هەولێرێ، لە پایتەختی کوردستانێ، مرۆڤەکان ناتوانن بەسەر زەویدا بڕۆن. هەرچی شەقامە ئەوا بێگومان بۆ تڕومبێلەکانە، شۆستەش شوێنی پشوودانی تڕێلە و بارهەڵگرە ماندووەکانە. کۆڵانەکانیشمان شوێنی پێشبڕكێیە و شۆڵانەکانیش شوێنی پانکردنەوەی مرۆڤەکانە. هەرچی مرۆڤیشە، مەگەر بە پردە پڕ میز و گووەکانەوە لەمبەری شۆڵانەکەوە خۆی بگەیەنێتە ئەوبەر، یان سەربان و سەربانان خۆی بگەیەنێتە نانەواخانەی گەڕەک.
خۆ ئەگەر بەڕێوەبەرایەتیی هاتوچۆ نیازی بێت کە تڕومبێلەکان هێدی بکاتەوە، ئاسانە. شەقامەکانی نێو بازنەی شار تەسک دەکاتەوە، لە هەردوو کەناریشی داری بەرز دەچێنێت و ماوە ماوەش بەربەست و تاسە . دادەنێت. کە شوفێرێک ئەم دارە بەرزانە دەبینێت و تەسکی شەقامەکە دەبینێت، بێ ئەوەی هەستیش بکات خێراییەکەی کەمتر دەکاتەوە. ئەمە یەکێکە لە گرنگترین شێوازەکانی ئەندازەی ڕێگاوبانی شارە ئەوڕووپییەکان.
ڕەنگە بپرسیت، بەڵام ئەگەر شەقامەکان تەسکتر بن، جەنجاڵی زیاتر دەبێت و هەموو کەسێک هەردەم درەنگ دەبێت و ناچار تیژتر لێدەخوڕن. ئەمە بۆچوونەکی دروست نییە، لێکۆڵینەوەکان دەریان خستووە کە کاتێک شەقامێک پانتر دەکرێت، ئەمە وا دەکات کە شەقامەکە تەنها بۆ ماوەکی کەم چۆڵتر بێت، ئەمەش سەرنجی شوفێرەکانی تر ڕادەکێشێت و هەموو شوفێرەکانی ئەم ناوە ئەم شەقامە فراوانە نوێیە بەکار دەهێنن، ئەمەش جەنجاڵیی تازە دروست دەکات. بەڵام کە شەقامەکانی شار تەسکتر بوون، خەڵکی کەمتر حەز دەکات بە تڕومبێل بێتە نێو بازنەی شار و جەنجاڵی کەمتر دەبێتەوە.
بێگومان بەبێ باشترکردنی هۆیەکانی گواستنەوەی گشتی، ئەو شتانە هەرگیز ناکرێت. ئاشکرایە کە لێدانی تونێلی نوێ بۆ میتڕۆ یان تڕام تێچووی گەلێک زۆر دەبێت، بەڵام خۆ هەبوونی تۆڕێکی تۆکمەی پاس بە نرخێکی کەم هەموو کێشەی هاتوچۆ چارەسەر دەکات. خۆ ئەگەر ئەوەش نەبێت دووچەرخە (پاسکیل) هەیە! هەولێر شارێکە کە چڕییەکی زۆری هەیە و ڕووبەرەکەی ئەوەندە گەورە نییە. لە ساڵدا جگە لە سێ مانگی هاوینێ، ئەوانیتری هەمووی دوو شەشە بۆ لێخوڕینی دووچەرخەی! ئەگەر لە سەرما و سۆڵەی مۆنتڕیاڵ و ستۆکهۆڵم، کاتێک کە پلەی گەرمی ٢٧ی ژێر سفرە و هەموو زەوی بە بەفر داپۆشراوە، پاسکیل بەکار بێت، لە سەرمای هەولێریش بەکار دەهێنرێت.
نووسینی: ئامانج شێروانی
