لەمسەر و لەو سەریش.. شیعری نەوزاد بەندی
بۆ / سۆز
ئێمە ئەوانەین
تاکو نان کەڕوو لێی نەدا،
نایدەین بە مەڕ ..
تا گەنم ژەنگ نەکا،
نایدەین بە کۆتر ..
چەڵتوک بۆخاک بوو ..
کە ماش کون کون بوو ..
برنج ئەسپێی کرد..
کە هەنجیر ترشا ..
کرم بەناو ئاردا،
وەک سوپا ڕێی کرد ،
جا بەزەییمان دێتە کوڵ و جۆش،
ئەیدەین بە گەدا
٭ ٭ ٭
تازە دوو ژمارە،
نابن بە تۆ و من ..
هەرگیزا و هەرگیز ..
هیچ ئامرازێکی پەیوەندی، ئیتر ،
لە نێوانمانا، نابێ بە قەفیز ..
٭ ٭ ٭
ئەزانم لە پاڵ تۆپەڵێ وشەی
تێپەڕ و .. ناوی
ساختە و دیواری
خەریتەی چاو و
مۆری ئەنگوست و ..
پەیجی پریڤەیت،
خۆت مەڵاس داوە و
بۆ من ئەڕوانی ..
بەس مافی خۆتە ،
کە تۆیش بزانی ..
ویستم پێت بڵێم :
خانەنشین بووم !
٭ ٭ ٭
لە دیار هیچ شتێ قەت دانەماوم،
ئەوەندەی لە دیار تۆ دامام، ئازیز ..
دواجار هیچیشم نەکەوتە بەرچاو ..
تەنها چاوشارکێ و
هەندێ چاو و ڕاو ..
٭ ٭ ٭
وێنەکەت کێشام ..
ئاگام لێ نەبوو ..
بەو هەموو ڕەنگە تۆخ و
کۆنەدا،
ڕۆحت هەڵکێشام ..
٭ ٭ ٭
گەر پێکیشەوە بووینایە، ئازیز ..
یان لەسەر پردێ، هاژەی ڕووبارێ بۆی ئەڕوانین و شەوگار دادەهات ..
یان لەسەر گردێ، چەپکێ تریفەی مانگ لێی ئەداین و
جا خۆر هەڵئەهات ..
٭ ٭ ٭
تەنیایی لە هەموومانا،
کوتلەیەکی گەورەی هەیە ..
زۆربەی کورسێکان هی ئەون ..
٭ ٭ ٭
لە بیرتە نەخشەمان دانا،
بۆ ئەوەی یەکتر نەبینین..؟
دنیایەک قسەمان ئەکرد،
بۆ ئەوەی یەکتر بێدەنگ کەین..!
لەسەر یەک ڕێ بووین ،
ئەیشمانووت :
تۆ به ڕێی خۆت
من بە ڕێی خۆم …
٭ ٭ ٭
جاران دوو مناڵی قەبارە گەورە ..
بۆنی بنێشتی بۆبی و دارچینیی ..
ئێستا دوو پیری قەبارە بچووک ..
لەناو زریانی دین و بێ دینیی ..
٭ ٭ ٭
قەت لە بیرم ناچێتەوە،
عەسرێک ، کام جلە تازە بوو،
لەبەرم کرد ..
هاتم بۆ کۆڵانەکەتان ،
بۆ ئەوەی نەتبینم، ..ئازیز !
٭ ٭ ٭
تۆ لە ماڵ مەیەرە دەرێ ..
منیش ڕوو ناکەمەوە ماڵ ..
بەو جۆرە ئیتر
کورسی و مێز و کوپ و قاوە و گەشت و سەفەر
با بۆ خۆیان سیر بخۆن و
زۆڕنا لێدەن ..
٭ ٭ ٭
هاتم بۆ کۆڵانەکەتان ،
تا سەیری بەرپێی خۆم بکەم ..!
لە بیرت دێ،
ووتت وەرە بۆ کۆڵانە شێدارەکەی بابەگەورە ..
لە نزیکی ڕەیحانەیە ..؟
کە ویستم بێم، ووتت مەیە..!!
ووتم نایەم بۆ غەزەلنوس،
ووتت سەعاتێ زیاترە،
دوو قاوەم داواکردووە و ..
سارد بوونەوە، جێیان دێڵم
هەزار ئەفسوس ..!!
٭ ٭ ٭
غەزەلنوس و .. ڕەیحانە و ..
کافێیەک نەما،
یەکتری تیا تیرۆر نەکەین ..
چەندێ سەلەفیی بووین، ئازیز !
وەک دێڕ پڕبووین لە خاڵ و نیشانەی پرسیار ..
لە هەڵەی چاپ و فاریزە ..
ووتت با بچین بۆ موسڵ،
بەڵام من باوکم ئەهێنم ..
تۆیش بیهێنە..!
ئەمە گەشتە یان کۆبوونەوەی باوکان ..
یان ئەشکەنجەدان بوو ..؟ ئازیز ..
٭ ٭ ٭
بە دەست خۆم نییە ،
بەفر تۆم بیر ئەخاتەوە ..ئەمساڵیش ..
دەرگای هەموو ئەو شارانە ئەکاتەوە ،
بە تەمابووم تیایانا بژیم و
نەژیام ..
نازانم بۆ وا ئەزانم
تەنها بەفر نێوانمان چاک ئەکاتەوە ؟؟!
٭ ٭ ٭
هەر ووتمان ئەوا ئەگەین و
هەر نەگەیشتین ..
گوایا ئیتر تێ ئەگەین و
تێیش نەگەیشتین ..
٭ ٭ ٭
نازانم من درەنگ کەوتم ،
تۆ زوو هاتی ؟
من پێش وەخت گەیشتم ،
یاوەخود تۆ نەهاتی .. ؟
تۆ هاتیت و ..
من ڕووداوێ بەستمیەوە ؟
نازانم .. نا
شتێ تۆی لە من وون کرد و
منیشی لە تۆ شاردەوە ؟
نازانم ..نا
بەڵام ئیتر ئەوەبوو ئەو قاوەیەمان به یەکەوە نەخواردەوە ..!!
