لەبارەی پەلاماری هۆڤیانەی سەر هەردوو گەڕەکی شێخ مەقسودو ئەشڕەفیەی حەڵەب!؟.. تاهیر عیسا

ڕوداوەکانی هەفتەی ڕابردووی حەڵەب و پەلاماری وەحشیانە بۆسەر هەر دووک گەڕەکی کوردنشین، ئەشڕەفیەو شێخ مەقسود، ئەگەر لەلایەک نموونەیەک لەوەحشیگەری ئەودەستەوباندە تیرۆریستە ئیسلامیانەمان پیشان دەدات کە مشتاقی ڕژتنی خوێنی هاوڵاتیانی کوردزمانی ئەو دوو گەڕەکەبوون، کە لەلایەن حکومەتی کاتی عەڕەب فاشیست-ئیسلامی ئەمەوی سەر بە جۆلانی تیرۆریست و فاشیزمی تورکیای میراتگری ئیمپراتۆریەتی عوسمانی، لە ژووری عەمەلیاتێکی هاوبەشدا، وەک بڵێن پلان بۆ ڕزگارکردنی غەززە لەدەستی بکوژی هەزاران ژن ومناڵی بێتاوان لەو شارەدا، دادەڕێژن، دوو گەڕەکی شارنشین کە بۆ زیاتر لەدەساڵ بوو لەدژی دەستەو تاقمی تیرۆریستی جۆراو جۆری ناو ئەو پێگە جوگڕافیە پڕ لە تڕاژیدیاو کوشت و بڕینەدا، بۆ بەرگریکردن لەخۆیان و مانەوەی فیزیکیانەیان، خۆیان چەکدارو ڕێکخستبوو، لەو پەلامارە هەمەجیانەیەی کرایە سەریان ژمارەی شەڕڤانەکانیان لە چەند سەد کەسێک تێپەڕی نەدەکرد، کەچی دوو دەوڵەت بە حەشاماتێکی دەیان هەزار لە مرۆڤی دڕندەو خوێنخۆرو بارگاوی بەئایدیۆلۆجیای توندڕەوانەی ئیسلامی و بەپاڵپشتی دەیان تانک و کاتیۆشاو هاوەن ودرۆنی جاسوسی و بکوژو خۆکوژی هەردوو دەوڵەت و هاوکاتیش وەگەڕخستنی ماکینەیەکی زەبەلاحی ئیعلامی فاشیستی عەڕەبی و تورکی جۆراوجۆر کە ژەهریان دەکرد، بەعەقڵی ساویلکانەی عەڕەبزمانی حەڵەب و سوریاو جیهانی عەڕەبیداو لەدژی دوو گەڕەک وەک هاوپەیمانی ئیسڕائیل ودوژمنی لەمێژینەی عەڕەب و ئیسلام و سوریا پیشان دەدران، دواجار تواندرا، ئەو دوو گەڕەکە بەپێی پلانێکی لەمێژینەی پێشتردارێژراوو کارلەسەرکراودا، داگیربکەن. لەدیوێکی دیکەشدا وەحشیگەریی دنیای زاڵمانەی ئەم سیستەمە جیهانیەی ئەمڕۆمان پیشان دەدات، کە لەمامەڵەو سەوداکانیاندا، مرۆڤە هەرە بێتاوانەکانی وەک پشکەخێر تێدا دەکرێتە قوربانی.
بەرلەو ڕوداوە کۆبونەوەکان لەلانکەی دنیای بەناو دیموکڕاسی ڕۆژئاوادا وەڕێخران، ڕێککەوتنێک لەپاریس بۆ تەتبیعی عیلاقات لەنێوان (ئیسڕائیل)، بکوژی هەزاران لەمرۆڤی بێتاوانی غەزە، و حکومەتەکەی ئەحمەدجۆلانی، بەچاودێری ئەمریکاو فەڕەنساو بەئاگایی دەستەخوشکەکەیان تورکیای فاشیستدا ڕێککەوتنێکی ئەمنی ئیمزاکراو هەرلەوێدا جۆلان و جنوبی سوریاو هەردوو گەڕەکی شێخ مەقسودو ئەشڕەفیە سەوداو مامەڵەکران، ئەو ڕێککەوتنە دەستی ئەحمەد جۆلانی جولان فرۆش و تورکیای ئاوەڵاکرد، بۆ جێبەجێکردنی مەرامی فاشیستیانەی خۆیان لەدژی ئەزمونی باکورو ڕۆژهەڵاتی سوریا، کە بۆماوەیەکە خەونی لەفاشیستە عەڕەب و تورکەکان زڕاندووە، هاوکاتیش لەدوای بەئاکام گەیشتنی ئەم تاوانە جینۆسایدئاساییەدا، لەڕێگای وەزارەتی دەرەوەی سوریادا سوپاسگوزاری هەریەک لە ئەمریکاو بەریتانیاو فەڕەنساو سعودیەو قەتەڕو تورکیا و مەسعودبارزانی کرا، کە بەپێی لێدوانی وەزارەتەکە هاوکاربوون و ڕۆڵیان بینیوە لەسەقامگیری سوریادا، ئەوەی شایانی باسە هاوزەمان لە جەرگەی هێرشی سەر ئەو دووگەڕەکەشدا، ئەحمەد جۆلانی و مەسعودبارزانی پەیوەندییەکی تەلەفۆنییان ئەنجام دا، بارزانی بەبێ ئەوەی مەترسیەکانی ئەو کۆمەڵکوژیەی لەئارادابوو کەلەلایەن ئەو دەستەو تاقمە تیرۆریستانە دەکرایە سەر ئەو دوو گەڕەکە لەبەرچاوبگرێت و، ناڕەزایەتی دەربڕێت، سوپاسی ئەحمەد شەرعی کرد.
نووسینگەی مەسعوود بارزانی، سەبارەت بەو پەیوەندییە تەلەفۆنیەی بارزانی و ئەحمەد شەرع سەرۆکی حکومەتی کاتی سووریا بەو جۆرە بڵاوکرایەوە.
بەگوێرەی ڕاگەیاندراوەکە، لە میانی پەیوەندییە تەلەفۆنییەکەدا باس لەوەکرا کەدوایین پێشهاتەکان و بارودۆخی سووریا تاوتوێ کران، لە ڕاگەیاندراوەکەدا ئاماژە بەوە کراوە کە بارزانی ڕەزامەندی خۆی لە لێدوانەکانی ئەحمەد شەرع سەبارەت بە کورد دەربڕیوە و سوپاسی کردووە.
ئەوەی جێگای سەرنجە ئەو پەیوەندییە لەکاتێکدابوو، کە ماوەی چوار ڕۆژبوو گرووپە تیرۆریستەکانی سەربە ئەحمەد شەرعو تورکیا، لە گەڕەکەکانی شێخ مەقسوود و ئەشرەفیە هێرشی کۆمەڵكوژیان دژی خەڵکی ئەو دوو گەڕەکە، ئەنجام دەدا.
ئەمەش ئەوە دەردەخات مەسعودبارزانیش لەم پلان و سەوداو مامەڵانەی دژی ئەودوو گەڕەکە کوردیەکرا بەشێک بوو لەسیناریۆی ڕەش نەک سپی، بۆ پشتگیری ئەم بۆچونەشم، ئێستا کەناڵی ئەلشەمسی عەڕەبی سەر بەدەسەڵاتی پارتی خەریکن چاوپێکەوتنێک لەگەڵ ئەحمەد جۆلانی(شەرع) ئەنجام دەدەن، کەهێشتاش دیمەنە دڵتەزێنەکانی پەیوەست بەم ڕوداوەو ڕفاندنی دەیان کوڕو کچ و کوژرانی دەیان کەسی بێتاوان و هەڕەشەو تۆقاندن و بێڕێزی کردن بەرامبەر بەهاولاتیان بەتایبەت بەرامبەر ژنان، کەداعش لەسەردەستی جوامێری و قارەمانێتییان، هەم خۆیان وهەم ئاڵاکەیان لەژێر ناوی لائیلاها ئیلەڵا و محەمەد ڕەسولەڵا، کەوتە ژێر پێو پێڵاوەکانیانەوە، وەهەروەها بەتایبەتیش بێڕێزیکردن بەتەرمی ژنە تێکۆشەرێکی گیانبەختکردووی ئەو گەڕەکە بەناوی دەنیز و خستنە خوارەوەی لە باڵەخانەیەکی چەند قاتیداو وتنی ڕستەی نەشیاو لەبەرامبەریدا، ڕیسوایی وشەرمەزارییە بۆ کەناڵی ئەلشەمس و ستافەکەی کە تاوانبارێکی وەک ئەحمەد شەرع لەم ساتە وەختەدا چاوپێکەوتن وڕوماڵ بکات و لەڕێگای ئەم کەناڵەوە چەواشەکاری بکات و خۆی وەک دۆستی خەڵکی ئازادیخوازی کوردستان نیشان بدات.

تاهیر عیسا /12.01.2026

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.