زاڵبوون بەسەر کۆسپەکانی بەردەم راپەڕینی گەل لە ئێراندا.. عەبدولڕەحمان گەورکی

دوایین بارودۆخی راپەڕینی خەڵکی ئێران و ئەرکەکانی ئۆپۆزسیۆنی دیکتاتۆرییەت
عەبدولڕەحمان گەورکی، نووسەر و لێکۆڵەری سیاسی

خەڵکی ئێران بەر لە چوونە ناو ساڵی نوێ، رێزیان گرت لە سەدان شەهیدی راپەڕینی ساڵی رابردوو (1401) و بەڵێنیان نوێ کردەوە و سەری کڕنۆشیان بۆ دانەواندن و لە بڕیارێکی پتەوتر لە رابردوودا، پێداگرییان کرد لەسەر درێژەدان بە رێبازی شەهیدانی راپەڕین لە پێناو رووخاندنی دیکتاتۆرییەت و دامەزراندنی ئازادی و سەربەخۆیی و سەروەریی نیشتمانی و جەماوەری و ئەمەیش وەک یەکەم هەنگاوی خەڵک بۆ چوونە ناو ساڵی نوێ، کە ساڵی زۆرێک گۆڕانکاریی گەورە و گرینگە.
ئێستا دوای تێپەڕبوونی نزیکەی حەوت مانگ بەسەر راپەڕینی قارەمانانە دژی دیکتاتۆرییەت، خەڵکی ئێران زیاتر هەست بە توانست و هێزی خۆیان دەکەن و راپەڕینەکەیان بەهێزتر دەبینن و بە ئومێدبەخشی دەزانن. چونکە پێیان وایە سەرکەوتن بەسەر دیکتاتۆرییەتدا لە نیوەی رێگادا تێپەڕیوە!
لە بیروڕای گشتی و لە چاوی گەلانی جیهانیشدا، بە پێچەوانەی ئیدیعا و پیلانەکانی دەسەڵاتی دیکتاتۆری لە ئێران و لایەنگرانی کۆلۆنیالیزم، باوەڕێکی پتەو هەیە کە “ڕاپەڕینی گەل” نەک هەر دانەمرکاوە، بەڵکو بەرپاکردنی “جەژنی سەرکەوتنی گەل” بەسەر “دیکتاتۆرییەت” لە داهاتوویەکی نزیکدا هەستی پێدەکرێت.
ململانەی دوو بەرەی دژ بە یەک!
ئەوەی لە حەوت مانگی رابردووی راپەڕینی خەڵکی ئێراندا بەرچاو کەوتووە، رەنگدانەوەیەکی بچووکی ئەو راستییە گەورەیە کە لە ئێراندا بوونی هەیە. چونکە سیاسەت و ستراتیژەکانی “کۆنەپەرستی و کۆلۆنیالیزم” پێکەوە رێگریان کردووە لە رەنگدانەوەی راستەقینەی راپەڕین و هەروەها خێراکردنی پرۆسەکە لە دژی دیکتاتۆرییەت و هەوڵیانداوە بە “سانسۆر” و “فیلتەرینگ” رێگەری بکەن لەو گۆڕانکارییە گەورەیەی بەڕێوەیە لە ئێران و بەمجۆرە، دیکتاتۆرییەتێکیتر بەسەر خەڵکی ئێراندا بسەپێنن!
لە قوڵایی ئەم ململانەیەدا شەڕێکی خوێناویتر لە نێوان دوو بەرەی “گەل” و “دیکتاتۆری”دا هەبووە و ئێستایش بەردەوامە. لە قووڵایی دیمەنی راستەقینەی شەڕەکەدا، سنوور و ریزەکانی ئەم دوو بەرەیە “شێواو” نین. زۆر “ڕوون” ن و، دەستی رەش و شاراوەی کۆنەپەرستان و کۆلۆنیالیزم بە ئاشکرا دیارە. لەم گۆڕەپانی راستەقینەی راپەڕیندا، لە دوو بەرە بەدەر نەماون. “بەرەی گەل” و “بەرەی دیکتاتۆری”. زۆر هەڵەیە گەر پاشماوەی دیکتاتۆریی پێشوو بە بەشێک لە بەرەی گەل و نەیاری دیکتاتۆرییەتی ئایینی دابنێین!. ئێستا هەندێک دەوڵەتانی زلهێز و تەنانەت دەسەڵاتی کۆنەپەرستی ئێرانیش ئەوانەی (قوت) کردووەتەوە بۆ شێواندنی راستییەکانی راپەڕین.
پەلەقاژەی دیکتاتۆرییەت بۆ مانەوە لە دەسەڵات!
هەموومان لەبیرمانە کە لە سەرەتای راپەڕینی ساڵی رابردووەوە دەسەڵاتی دیکتاتۆرییەتی ئێران و پاشماوەکانی دیکتاتۆریی “شا” چۆناوچۆن بە دروشمی جۆراوجۆر هەوڵی بە لاڕێدابردنی مەسێری راستەقینەی راپەڕینیان داوە. ئەوان دەیانویست بەهاکانی خەڵک و راپەڕین و کۆمەڵگا بشێوێنن و بەم شێوەیە راپەڕینەکە بە لاڕێدا بەرن و دواتر دایمرکێنن. ئەوان دەیانویست بە داتاشینی “سەرکردایەتی” و “ئەڵتەرناتیڤ” بۆ راپەڕین و بۆ لەباربردنی بەهاکانی کۆمەڵگا و شۆڕش، بە “دانسینگی سەر شەقام” و “قژبڕینەوە” و لێکترازاندنی ریزەکانی راپەڕین بە رێگەی “ئیسلامی و غەیرە ئیسلامی”، “ژن و پیاو”، “بە حیجاب و بێ حیجاب”، “فڕێدانی مێزەری ئاخوندان”، “دووبەرەکی نانەوە لە ناو نەتەوەکان و ئایینزاکان”دا و… گۆڕەپانی راپەڕینەکە ئەوەندە “قوڕاوی” و “لێڵ” بکەن کە خەڵک لە درێژەدان بە راپەڕینەکەیان بێهیوا بکرێن و دیکتاتۆرییەت لە دەسەڵاتدا بمێنێتەوە.
لە سەرەتای راپەڕیندا، کۆنەپەرستی و کۆلۆنیالیزم، سیاسەتی ” چەکوچ و سەندان”یان بەکارهێنا بۆ ئەوەی خەڵکی ئێران ناچار بکەن لە نێوان دوو بژاردەی “شاپەرستی” و “ویلایەتی فەقیهی”، یان بە واتایەکی دیکە “دیکتاتۆرییەتی پاشایەتی” یان “دیکتاتۆرییەتی ئایینی”، یەکێکیان قبووڵ بکات. ئەوان بەم دوو بژاردە دژە مرۆییە، دەیانویست هێزی سەرەکی گۆڕەپانەکە و هێزی راستەقینەی سەر شەقام پەراوێز بخەن و ئەڵتەرناتیڤی دڵخوازی خۆیان بەسەر ئێران و ئێرانییەکاندا بسەپێنن و جارێکی دیکە سەرکردایەتی راپەڕینی خەڵكی ئێران بە تاڵان بەرن!
تێهەڵچوونێک لە دوو دیوی سنوورەکانی ئێراندا!
عەلی خامنەیی و کاربەدەستانی دەسەڵاتی دیکتاتۆری، راپەڕینیان بە “ئاژاوەگێڕی” و راپەڕینکارانیان بە “ئاژاوەگێڕ” ناوبرد و رایانگەیاند کە راپەڕینەکە لەلایەن “بیانییەکان”ەوە رابەرایەتی دەکرێت!
لە دەرەوەی سنوورەکانی ئێرانیش، ئەکتەرە کۆلۆنیالیستەکانیش هەر لە سەرەتای راپەڕینەوە بە نیاز بوون لە ژێر ناوی “ناتوندوتیژی” و “خۆ بەدوورگرتن لە تۆڵەسەندنەوە”دا، “داڕمانی رواڵەتیی دەسەڵات” و “تێپەڕبوونی هێمنانە بەسەر دەسەڵات”دا، لە جێگەی “ڕوخاندنی دیکتاتۆرییەت” دابنێن و لە جیاتی رووبەڕووبوونەوە بەرانبەر بە دیکتاتۆرییەت لە سەر شەقام و گۆڕەپانەکاندا، بانگەوازی خەڵک بکەن کە “لە ماڵەوە”دا بمێننەوە و “پاراستن و مانەوەی سوپای پاسداران و هێزە سەرکوتکەرەکانی دەسەڵات”یان کردبوو بە درووشمی خۆیان!
سنووری سووری نێوان گەل و دیکتاتۆر!
بەڵام خەڵک، بە هێڵی سووری “نا با شا و نا بۆ ئاخوند” و فراوانکردن و بڵاوکردنەوەی درووشمی سەرەکیی “مەرگ بۆ دیکتاتۆر” و “مەرگ بۆ خامنەیی” و “مەرگ بۆ ستەمکار، چ شا بێت و چ رابەر (واتا وەلی فەقێ)” و لادانی درووشمی لاوەکی، پیلانگێڕی و ئاستەنگەکانیان یەک لە دوای یەک تێکشکاند.
لە تێڕوانینێکی راست و درووست بۆ سەر حەوت مانگ راپەڕینی خوێناویی خەڵک لە ئێران، دەبینین رێگایەکی دوور و درێژ خراوەتە پشت سەر و خەڵکی ئێران زۆرێک کۆسپ و پیلانی کۆنەپەرستانە و کۆلۆنیالیزمیان (کە بەداخەوە هەندێک تاک و لایەنی “کورتبین” و “بەرژەوەندخوازەکان” بە “فێڵکردن و “لەخشتەبردن” خستبووە پاڵ خۆیان) تووشی شکست کردووە و هاوکات دەسەڵاتی دیکتاتۆریی ئاخوندییان بەرەو لێواری رووخاندن برد. ئەوەی ئێستا لە گۆڕەپانی راپەڕیندا پێی لە ناو “راستییەکان”دا نییە، پاشماوەی دەسەڵاتی دیکتاتۆرییەتی شا و ئەو ئەکتەر و رەوتە هەلپەرستانەن کە لەلایەن کۆنەپەرستان و کۆلۆنیالیزمەوە هێنراونەتە سەر شانۆ!
ئازار و دەرمانی هاوبەشی گەل!
لەمڕووەوە خەڵکی ئێران بە پەرەپێدان و توندترکردنی هەنگاوەکانی راپەڕینەکەیان و بە تایبەتی پێشکەشکردنی زیاتر لە ٧٥٠ شەهید، پشتیان بە خۆیان و هێزی خۆیان بەستووە نەک بە هێزی “زلهێز” و “بێگانە”. ئەوان بە درووشمی “یەکڕیزی” و “برایەتی”، دەیانەوێت “ئازاری هاوبەش” بگەیەننە ئاستی “چارەسەری هاوبەش”. چونکە “رەمزی سەرکەوتن بەسەر دیکتاتۆرییەت”یان بە دەستەوەیە. درووشمی “لە زاهیدان و کوردستانەوە تا تاران، گیان بەخت دەکەم بۆ ئێران”، کە ئێستا بۆتە یەکێک لە درووشمە نەتەوەیی و جەماوەرییەکانی سەرتاسەری ئێران، پەیوەندی بەمەوە هەیە.
کەواتە بە هۆی هۆشیاربوونی خەڵک و هەبوونی موقاومەتێکی رەسەن و خاوەن پێگەی جەماوەری و مێژوو و پێکهاتەی دێرینیەوە، راپەڕینی خەڵکی ئێران لە کەوتنە ناو رێڕەو و مەسێری نادرووست، (کە لەلایەن دیکتاتۆرییەتەکان و پشتیوانانی جیهانی و ناوچەیی دیکتاتۆرەکانەوە کاری بۆ کراوە) پارێزراوە و توانیویەتی مۆنیزمی خۆی بپارێزێت لە گەیشتن بە ئامانجی سەرەکیدا و، مۆرکی “نا” بکێشێت بەسەر هەر وەستان و باجدانێکدا.
وانەیەکی گرنگ!
ئەو نەوەیەی لە گۆڕەپانی راپەڕینی دژەپاشایەتی لە ساڵی 1357 (1979) حزووری هەبووە، بە باشی بیری دێتەوە کە چۆن “سەرکردایەتی راپەڕین” لەلایەن “خومەینی” و “دەسەڵاتی دیکتاتۆریی مەزهەبی”یەوە دزرا و دیکتاتۆرییەتێکی زۆر خراپتر هاتە سەر کار و دەسەڵاتی بەدەستەوە گرت. راپەڕینی ساڵی رابردووی خەڵکی ئێران لە دژی دەسەڵاتی دیکتاتۆریی مەزهەبی، لەسەر بنەمای وانەیەکی وەها گەورەدا توانیویەتی پارێزراو بێت بەرانبەر بە چەتەکان و مشەخۆران و، پیلانەکانی دیکتاتۆرییەت تێکبشکێنێت. ئێستا ئەوە نەوە بەهێزەکانی کۆمەڵگای ئێرانن کە لە پێوەند لەگەڵ “دەزگای رێبەرایەتیی گشتیی راپەڕین” توانیویەتی بەردەوامی بدات بە بڵێسەی راپەڕین لە ئێران و خۆی ئامادە بکات بۆ هەنگاوێکیتری راپەڕین و بە تایبەتی بۆ وەدیهێنانی رووخاندنی دەسەڵاتی دیکتاتۆرییەتی ئێران. بە پشت بەستن بەو ئۆرگانەیە کە دەکرێت سەرکەوتنی شۆڕش و راپەڕینی گەل لە ئێران مسۆگەر بکرێت.
ئەرکێکی گرینگی سەردەم!
لەسەر بزووتنەوە جەماوەرییەکان، پێکاتە و رێکخراوە رەسەنەکانی ئێران و هێزە راستەقینەکانی ئۆپۆزسیۆنی دیکتاتۆرییەتە کە بەبێ گوێدانە هەر جیاوازییەک، بە دروشمی “نا بۆ شا و نا بۆ ئاخوند”، خێرایی بدەن بە گۆڕانکارییەکان لە ئیران و، ئەم وڵاتە بەرەو رزگاری بەرن و چیتر دەسەڵاتی کۆنەپەرستانە و کۆلۆنیالیزمی لە ئێران دووبارە نەبێتەوە و هەموو بەشەکانی خەڵکی ئێران بتوانن لە پێناو دامەزراندنی دەسەڵاتێکی نەتەوەیی و جەماوەری دێموکراتیک، شان بە شانی یەکتر بەردەوام بن لە راپەڕین!
کۆتایی

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.