مرۆڤ چ بەڵایەکە … دانا ئەحمەد
هیچ شتێ وەک خۆی نیە
منداڵیمان لە گەرەکە گۆراوەکانی شاردا ون بوو
گەورەبوون درۆیەک بوو تەمەن پێی کردین
پێکەنیەکان هی دلخوشی نین
ئەوەندەی گلەیین لە ڕۆژگار٫
گریان بێدەنگیەکی پر هاوارە٫
لێرە هەواش عەتر لە خۆی دەدات
تا بۆگەنی خوی بشارێتەوە٫
مانگ خەریکی میکیاژە
تا لە سیلفیەکاندا جوان دەرکەوێ٫
خۆر بۆ موجامەلە هەڵدێ و
دەرگای هیچ ئاسوێیەکمان نیشان نادات٫
گوێ لە یەکتری ناگرین و
قسەی دلمان بۆ ئاوێنە دەکەین٫
بەر پەنجەرەکانمان گۆڕییەوە بە بەر شاشەکان
تاقەتی مرۆڤ بوون نەما و
لە وێنەکاندا خۆمان دەکەین بە سەگ و پشیلە٫
بە دەم ناردنی گوڵی ئیمۆجی بو یەکێ لە دۆستەکامان
سەیرکردنی گولەباخەکانمان لە بیر کرد
گوێ بە شکانی دڵەکان نادەین و بەدیار شوشەیەکی شکاوەوە دنیایەک ئەسەف دەخۆین٫
لە نێو هەزاران لاشەی خومان
چاوی کامێراکەمان دەخەینە سەر کەلاکی سەگێک و
نەفرەت لە دڕندەیی مرۆڤ دەکەین
وێنەیەک دەگرین و لە فەیسبووک بڵاوی دەکەینەوە
لە سەری دەنووسین
مرۆڤ چ بەڵایەکە تووشی زەوی بووە
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
