بە بەشداریی بەرهەمی سینەماکارانی کورد فیستیڤاڵی کورتە فیلمی تاران بەڕێوەدەچێت … مەنسوور جیهانی ـ

بە نمایشی بەرهەمی سینەماکارانی کورد و 41 وڵاتی جیهان سی و سێیەمین خولی فیستیڤاڵی نێودەوڵەتی کورتە فیلمی تاران بەڕێوەدەچێت.
سی و سێیەمین خولی فیستیڤاڵی نێودەوڵەتی کورتە فیلمی تاران بە سەرۆکایەتی “فەرید فەرخوندە کیش” و بە نمایشی بەرهەمی سینەماکارانی کورد و 100 فیلم لە سینەماکارانی 41 وڵاتی جیهان لەوانە: ئیتاڵیا، تورکیا، ئەرمەنیستان، کۆریای باشوور، چین، ژاپۆن، هیندستان، قرقیزستان، عێراق، فەڕەنسا، ئەڵمانیا، کەنەدا، ئەمەریکا، ئەڕژانتین، سویسڕا، سوید، ئیسپانیا، هۆڵەندا، بەریتانیا، یۆنان، رووسیا، شیلی، ئێکوادۆر، بڕازیل، پۆڵەندا، دانیماڕک، قیبرس، ئۆرۆگۆئە، ئەندونیزی، پڕۆ، ئیرلەندا، هەنگاریا، زیلاندێنۆ، ڤییەتنام، ئێران و هەروەها هەرێمی کوردستان لە چەندین بەشی جۆراوجۆر، لەوانە: بەشی پێشبڕکێی نێودەوڵەتی، بەشی پێشبڕکێی “سینەمای ئێران” لە لقەکانی فیلمە چیرۆکییەکان، فیلمە دیکۆمێنتارییەکان، فیلمە ئەزموونییەکان و فیلمە ئەنیمەیشنییەکان، بەشی پێشبڕکێی “وڵاتانی ئاسیایی”، چەندین بەشی دەرەوەی پێشبڕکێی و چەندین بەشی دیکە لە ڕۆژانی 8 تا 14ی نۆڤەمبەری 2016 لە کۆمەڵەی پەردیسی سینەمایی “چارسوو” لە شاری تارانی پێتەختی ئێران بەڕێوەدەچێت.
لەم خولەی فیستیڤاڵدا، هەروەها ڕێوڕەسمی ڕێزلێنان لە سینەماکاری ناوداری ئێرانی “عەباس کیارۆستەمی”، کۆڕ و کۆبوونەوەی پسپۆڕانەی “سینەما و یەک ڕوانین” لە لایەن چەندین دەرهێنەری بەرچاویی ئێرانی لەوانە: “ئیبراهیم حاتەمی کیا”، “ئەحمەد ڕەزا دەرویش”، خاتوو “نازەنین موفەخەم”، “مێهدی کەرەم پوور” و “محەمەد عەلی حوسێن نیژاد”، ڕێوڕەسمی ڕێزلێنان لە چەندین سینەماکاری کورد و ئێرانی، لەوانە: “خوسرەو سینایی”، خانمە ئەکتەری کورد “مریەم بووبانی”، سینەماکاری کورد “هووشەنگ میرزایی”، “مەجید بەرزگەر” و “مستەفا ئاڵی ئەحمەد”، کۆڕیی “یوکا ـ پێکا لاکسو” Jukka-Pekka Laakso بەرپرسی فیستیڤاڵی نێودەوڵەتی فیلمی “تامپێرە” Tampere لە وڵاتی فینلەندا، کۆڕیی “یۆتا ویلە” بەرپرسی بەشی کورتە فیلمی وڵاتی ئەڵمانیا، کۆڕیی “سایۆکۆ کینۆشیتا” Sayoko Kinoshita بەرپرسی فیستیڤاڵی نێودەوڵەتی فیلمی “هیرۆشیما” Hiroshima لە وڵاتی ژاپۆن، نمایشی بەرهەمە هەڵبژێردراوەکان لە لایەن “خوسرەو سینایی” دەرهێنەریی بەئەزموونی ئێرانی، چەندین ڤۆرکشۆپی پسپۆڕانە لە لایەن: “فەرهاد تەوحیدی” ـ سیناریۆنووسی، دکتۆر “ئەحمەد ئەلەستی” ـ بنەمای کورتە فیلم، “ئەمیر مێهران” ـ تیتراژ لە سینەما، “کریستۆف رەزاعی” ـ موزیکی فیلم و “بێهرووز شەهامەت” ـ جوانناسی دەنگ، بەشی “کتێب و سینەما”، سیمیناری نێودەوڵەتی کورتە فیلم (رابردوو، ئێستا و داهاتوو)، چاوخشاندنێک بە کورتە فیلمەکانی وڵاتی ئەڵمانیا، ئەو فیلمە ئەڵمانیانەی کە براوەی خەڵاتی ئۆسکاربوون، بەشی “ڤیدیۆ ئاڕت”، فیلمەکانی ئیسلام و ئاشتی جیهانی و چەندین بەشی دیکە لە شاری تاران بەڕێوەدەچێت.
ئەندامانی لێژنەی دادوەرانی بەشی پێشبڕکێی نێودەوڵەتی سی و سێیەمین خولی فیستیڤاڵی نێودەوڵەتی کورتە فیلمی تاران بریتین لە: “خوسرەو سینایی” دەرهێنەر و سەرۆکی لێژنەی دادوەران لە وڵاتی ئێران، خاتوو “ژولیت دۆرێت” Julliete Duret بەرپرسی هونەریی لە وڵاتی بەلژیکا، “یوکا ـ پێکا لاکسو” Jukka-Pekka Laakso بەرپرسی فیستیڤاڵی نێودەوڵەتی فیلمی “تامپێرە” Tampere لە وڵاتی فینلەندا، خاتوو “شوبرا گوپتا” Shubhra Gupta نووسەر و ڕخنەگری سینەما لە وڵاتی هیندستان و خاتوو “ئانا هێنکێل ـ دۆنێرسمارک” Anna Henckel-Donnersmarck دەرهێنەر لە وڵاتی ئەڵمانیا.
ئەندامانی لێژنەی دادوەرانی بەشی پێشبڕکێی “سینەمای ئێران”ی ئەم فیستیڤاڵەش بریتین لە: دکتۆر “ئەحمەد عالەمی” ـ مامۆستای زانکۆ، سینەماکاری دیکۆمێنتاری، ڕخنەگر، نووسەر، وەرگێر و سەرۆکی لێژنەی دادوەران، “محەمەد رەزا هونەرمەند” ـ دەرهێنەر، “رەزا میرکەریمی” ـ دەرهێنەر، سیناریۆنووس و بەرهەمهێنەر، “موحسین ئەمیر یۆسفی” ـ دەرهێنەر، سیناریۆنووس و بەرهەمهێنەر و “داوود خەیام” ـ دەرهێنەر.
فیستیڤاڵی نێودەوڵەتی کورتە فیلمی تاران بە یەکێک لە فیستیڤاڵە گرینگ و بەرچاوەکانی کورتە فیلم لە ئاستی دنیا دێتە ئەژمار و لە نێوان دەرهێنەرانی کورتە فیلمی دنیادا پێگەیەکی تایبەت بە خۆی هەیە و هەموو ساڵێک فیلمسازانی سەرتاسەری جیهان بەرهەمەکانی خۆیان بۆ نووسینگەی ئەم فیستیڤاڵە رەوانە دەکەن.

بۆ زانیاریی زیاتر:
www. tisff.ir

بەڕێوەبەرایەتیی راگەیاندنیی گشتیی فیستیڤاڵی نێودەوڵەتی کورتە فیلمی تاران.

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.