بێنە ماچ کچم … سمکۆ ئەحمەد

دەمت بێنە نەبا ئەمە دوا ماچمان بێ
دایکت دەڕوا مێژوو بکڕێ
گەر ڕۆژێ گەورەبووی
وینەی منت لە گۆڤارێکی تورکیدا دی
نەکەی بڕوا بکەی بەو مانشێتەی دەڵێ
تیرۆریستێكی ئەتایست ئەمڕۆ کوژرا
مێژووی ڕاستی پشتی دایکتە
خەتێکی چەقۆی عوسمانەو
یەکیکی دی سەدامەو وئەوی تریشیان
ترامپ و نازانم کێ و کێ و ئۆردوغانە

بێنە کچم دەمت بێتە ئەز دچم
نەبا ئەمە دواماچمان بێ
من دەڕۆم هەتاو بکڕم
گەر ئەم بەهارەش گوڵی نەگرت
دوو دڵ نەبی
بەهارێك دێت نەك لە خونچە گوڵ
لە خونچەوە
چۆلەکەکانی بەهەشت سەریان هەڵدێ
ئەو بەهارەش ئەبەدیەو هەرگیز نامرێ

بێنە ماچ کچم دەمت بێتە
کات درەنگە دەبێ بڕۆم

سمکۆ ئەحمەد
۲٠۱۹

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.