حەوتەمین خولی فیستیڤاڵی فیلمی کوردی “یۆتۆبۆری” لە وڵاتی سوید بەڕێوەدەچێت
مەنسوور جیهانی ـ حەوتەمین خولی فیستیڤاڵی فیلمی کوردی “یۆتۆبۆری” بە نمایشی بەرهەمی سینەماکارانی کورد و بیانی بە شێوەی ئۆنلاین لە شاری یۆتۆبۆری لە وڵاتی سوید بەڕێوەدەچێت.
حەوتەمین خولی فیستیڤاڵی فیلمی کوردی “یۆتۆبۆری” Goteborg بە بەڕێوەبەرایەتی “دڵشاد ئەحمەد” سەرۆکی کۆمەڵەی هونەرە جوانەکانی یۆتۆبۆری و بە نمایشی بەرهەمی سینەماکارانی کوردستانی ئێران، هەرێمی کوردستان و سینەماکارانی کورد لە ئەورووپا و هەروەها چەندین کۆڕیی پسپۆڕانەی هونەریی سینەما لە ڕۆژانی 27 و 28 و 29ی نۆڤەمبەری 2020 لە ڕێگای لاپەڕەی فەیسبووکی کۆمەڵەی هونەرە جوانەکانی یۆتۆبۆری بە ناونیشانی https://www.facebook.com/kurdiskafilmtraffen بە هۆی بڵاوبوونەوەی پەتای ڤایرۆسی کۆڕۆنا بە شێوەی ئۆنلاین لە شاری یۆتۆبۆری لە وڵاتی سوید بەڕێوەدەچێت.
لە یەکەمین ڕۆژیی ئەم ڕووداوە سینەماییەدا و لە کاتژمێر 4ی ئێوارێی ڕۆژی هەینی 27ی نۆڤەمبەری 2020 بە کاتی ئەورووپا سمینارێکی پسپۆڕانەی سینەمایی بە ناونیشانی “خوێندن و بواریی فیلمسازی لە هەرێمی کوردستان” بە ئامادەبوونی دکتۆر “دڵشاد مستەفا” مامۆستای زانکۆی سلێمانی و زانکۆی بەریتانیا و خاوەن بڕوانامەی دکتۆڕا لە بواریی فیلمسازیدا و بە بەشداریی “هاوڕێ مستەفا” دەرهێنەر و سینەماکار لە وڵاتی فینلاندا بەڕێوەدەچێت و لە درێژەدا کورتە فیلمی “گاڕاژ” Garag لە دەرهێنانی “یاد دێن” Yad Denn بە ماوەی 10 خولەک، کورتە فیلمی “دوا وێنە” لە دەرهێنانی “مەریوان ئیبڕاهیم” بە ماوەی 16 خولەک لە هەرێمی کوردستان، کورتە فیلمی “تارا” لە دەرهێنانی “فاتمە دەستمەرد” بە ماوەی 6 خولەک لە کوردستانی ئێران و کورتە فیلمی “هەرمان” لە دەرهێنانی “مەهدی جەودەت / ئاسۆ” بە ماوەی 10 خولەک لە هەرێمی کوردستان، بە شێوەی ئۆنلاین نمایش دەکرێن.
لە دووهەمین ڕۆژیی حەوتەمین خولی فیستیڤاڵی فیلمی کوردی “یۆتۆبۆری” و لە کاتژمێر 4ی ئێوارێی ڕۆژی شەمە 28ی نۆڤەمبەری 2020 بە کاتی ئەورووپا سمینارێکی پسپۆڕانەی سینەمایی بە ناونیشانی “فێستیڤاڵ و ئیڤێنتەکان لە کوردستان” بە ئامادەبوونی “دانەر عومەر” بەڕێوەبەری هونەریی فێستیڤاڵی فیلمی نێودەوڵەتی سلێمانی بەڕێوەدەچێت و پاشان کورتە فیلمی “ماڵی خاڵی” Empty Home لە دەرهێنانی “هەوراز محەمەد” بە ماوەی 19 خولەک لە هەرێمی کوردستان، کورتە فیلمی “رۆزا” Roza لە دەرهێنانی “محەمەد فریا” بە ماوەی 16 خولەک لە هەرێمی کوردستان، کورتە فیلمی “ژۆڕنالیست” لە دەرهێنانی “فاتمە ئەحمەد” و “مێهران مەجدۆ” بە ماوەی 19 خولەک لە هەرێمی کوردستان و کورتە فیلمی “هاواری کەلەوانشین” The Screm of Slium لە دەرهێنانی “سروشت عەبەڕەش” بە ماوەی 19 خولەک لە هەرێمی کوردستان، بە شێوەی ئۆنلاین نمایش دەکرێن.
لە سێیەمین و دوایین ڕۆژی حەوتەمین خولی فیستیڤاڵی فیلمی کوردی “یۆتۆبۆری” و لە کاتژمێر 4ی ئێوارێی ڕۆژی یەکشەمە 29ی نۆڤەمبەری 2020 بە کاتی ئەورووپا سمینارێکی پسپۆڕانەی سینەمایی بە ناونیشانی “پێگە، گرینگی و کاریگەریی بەڵگەفیلم” بە ئامادەبوونی “سالار سەعید” خاوەنی بڕوانامەی ماستەر لە بواریی فیلمدا و مامۆستای کۆلێژی هونەرە جوانەکانی سلێمانی و “عومەر محەمەد” بەکالۆریۆس لە بواری فیلم و ڕۆژنامەوانی و سەرنووسەری گۆڤاری ئەنفالستان بەڕێوەدەچێت و لە درێژەدا کورتە فیلمی “پێڵاوی گەرم” Warm sho لە دەرهێنانی “عەدنان عوسمان” بە ماوەی 22 خولەک لە هەرێمی کوردستان، کورتە فیلمی “دەست لێدان” Touch لە دەرهێنانی “وەرمان سەعید” بە ماوەی 22 خولەک لە هەرێمی کوردستان و کورتە فیلمی “پیاوێک لە ئاڵتوون” لە دەرهێنانی “مەریوان ئیبڕاهیم” لە هەرێمی کوردستان، بە شێوەی ئۆنلاین نمایش دەکرێن.
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
